Read wanga ISAYA 60 Bible Online

ISAYA 60 - wanga bible

ISAYA 60

¹Buukha Yerusalemu, washe shinga eliuba, okhuba oluyali lwa OMWAMI Nyasaye luli khwiwe.

²Eshilima shilafuunikha amahanga kandi, eshilima eshimali ti shilafuunikha abandu; Nebutswa oluyali lwa OMWAMI Nyasaye lulakhwashila, oluyalilwe lulalolekha khwiwe.

³Amahanga kaletsa khubulafubwo, nabo abaruchi baletsa khulwa okhwakha khwokhufwindakhwo.

⁴Chinguula tsimonitsio mana ohenje tsimbeka tsiosi; boosi bekhung'aasinjia, bakhwitsila. Abaanabo abasiani baletsa okhurula ehale, abaanabo abakhaana balachingwa mumakhono kabalesi babwe.

⁵Olalola kano ne nosaangaala; omwoyokwo kulekhoya nikutsaatsahala, okhuba olareererwa emiandu chiamahanga, obuyinda bulakhwitsila okhurula injelekha weinyanza.

⁶Omukanda omukhongo kwetsingamia kuleetsa okhurula Midiani nende Efa, tsilarula Sheba nitsireera itsahabu nende obubaane. Abandu balalandia ifuma yamakhuwa ka OMWAMI Nyasaye akholile.

⁷Ebiayo biosi bia Kedari nende Nebaiyotsi bilakhung'aasibwa nibireerwa ewa oli khulwa okhuukholela omusango. Bilahaanwa khushimalilo shianje shiemisango khulwa okhunjamisia. Nasi ndalakhola Ihekalu yanje okhuba eyoluyali muno.

⁸Ni beena bano abeeyuulanga shinga lileesi, khandi shinga amahusi akatsia mutsikhombe tsiako?

⁹Okhuba tsinguku tsilanindiilila, tsimeli tsia Tarishishi tsilaranjilila, okhureera abaanabo okhurula ehale, nibali nende ifeetsa neitsahabu yabwe, khulwa eliira lia OMWAMI Nyasayewo khandi khulwa Omutakatifu wa Isiraeli, okhuba yakhukholile owoluyali.

¹⁰Abarende balombakha amasisiiko, nabo abaruchi babwe balakhukhalabanila; okhuba mwiruma lianje ndakhuupa, nebutswa mubukoosia bwanje ekhukholeere aketsimbabasi.

¹¹Ebilibwabio bilabetsanga nibikuushe buli eshise, eshiteere neshilo shibileekalwa tawe, mbu amahanga kakhureerire obuyinda bwako, nibemiliilwe nabaruchi babwe.

¹²Okhuba lihanga noho aboburuchi abakhaya okhukhukhalabanila iwe balasikha, khandi balamululilwa elala pe.

¹³Oluyali lwa Lebanoni lulakhwitsila, omutaraakwe, omutitsari, nomuteyashuri, chilareerwa khulwa okhung'oona Ihekalu yanje, okhukaasia oluyali lwahabundu wanje.

¹⁴Obolwibulo lwa balia abakhusandia balakhwitsila nibakhwinamila, abo boosi abakhuchaayanga balikhwinamila habilenjewo; balakhulanga mbu, Litookho lia OMWAMI Nyasaye, Zayuni, litookho lia Omutakatifu wa Isiraeli.

¹⁵Kata nikaba mbu wasukunwa nochwangwa, nabulaho owakhalasia mwiwe ndalakhukhulunduyia inziayo nikhukhola omwikhoyo okhurula khulwibulo okhuula khulundi.

¹⁶Olanuuna amabeele kamahanga, olanuuna tsimbeele tsiabaruchi; mana olamanya mbu isie OMWAMI Nyasaye, nisie Omuhoniawo khandi Omununuliwo, Nyasaye wa Yakobo.

¹⁷Mushilenje shiomukasa ndalareera itsahabu, mushilanje shieshibia ndalakhureerera ifeetsa; mushilenje shiemisaala, ndalakhureerera omukasa, mushilenje shiamachina, ndalakhureerera eshibia. Abaruchibo shibalakhusandia khandi tawe. Ndalabakhola okhuruka nomulembe nende okhukhola aka habwene.

¹⁸Akamahababa shikalahuliilikhakhwo mushialoshio khandi ta, kata obumululwi noho obusasibwi okhuba mutsinzakhotsio khandi tawe; Olakulikha amasiisiko mbu Obuhonia, nabio ebiliibwabio mbu Obwitsoomi.

¹⁹Eliuba shililaba khandi obulafubwo mushiteere ta, noho omwesi okhukhwashila mushilo tawe; nebutswa OMWAMI Nyasaye niye oulaba obulafubwo bweinziayo, khandi Nyasayewo alaba oluyalilwo.

²⁰Eliuba shililayeelakhwo khandi, kata omwesikwo okhurulaho ta; okhuba OMWAMI Nyasaye alabetsanga obulafubwo inziayo, natsio tsinyangatsio tsieshibeela tsilahwa.

²¹Abandubo boosi balaba abalunjishi; balalaamilwa eshialo inziayo. Bo nomuroombo kwa ndaraaka, emilimo chiamakhono kanje, kho mbu enyoole oluyali.

²²Ouli omutuutu muno hakari wabwe alekhola oluyia, naye omuhele mu boosi alekhola lihanga likhongo. Isie nisie OMWAMI Nyasaye; khubise ebikhoyeele, ndalakakhola ako mubwangu.