Read wanga ISAYA 61 Bible Online

ISAYA 61 - wanga bible

ISAYA 61

¹ Roho ewa OMWAMI Nyasaye ali mwisie, okhuba OMWAMI yanzushiliilekhwo amafura okhunzahula; niyaruma okhuyaalila abamiinwa amakhuwa amalayi, okhuhotselesia abo aba emioyo chiabwe chiyenguushile, okhurumbula obulekhulwi khubabohe, nende obulekhuule khu abo abali mumbohe;

²okhurumbula akomuyika kwolukoosi okwa OMWAMI Nyasaye, nende akeinduukho yeshikwoli ya Nyasaye wefwe; okhulemia omwoyo abo boosi abekhuulanga;

³okhubakasilia abo abeekhuula mu Zayuni okhubahelesia eshisiaho mushilenje shiamakoshe, amafura komwikhoyo mushilenje shiokhwikhuula, eshiifwalo shiobwitsoomi mushilenje shia roho isitoohe. Balalangwa mbu emiruba chiobulunjishi, emiraache chia OMWAMI, okhulolosia habulafu oluyalilwe.

⁴Baliumbakha obuyia amakunda ka khale, nibabuusia amataala akali nikalikululwa; balikalusia habwene amataala akali nikasasibwa, amayindi ka tsinzibulo tsinyinji.

⁵Abarende balabuukha nibaaya ebiayo bienywe, abetsimbia tsindi balabalimila emikunda nibaachila emitsabibu chienywe;

⁶nebutswa inywe mulalangwa mbu, “Abesaaliisi ba OMWAMI Nyasaye,” mulakulikhwa mbu, “Abakhalabani ba Nyasaye wefwe;” mulalia emiandu chiamahanga, nimwikhoyela obuyinda bwabwe.

⁷Okhuba eshifimbwa murwe shienywe shiametekha, tsisoni tsienywe nitsilandibwa shinga omukabo kwenywe, mulanyoola obulaame eshikhabili; omwikhoyo kwinziayo kulaba okwenywe.

⁸Shichila isie OMWAMI eheelanga obuyaasi bwatoto, ndakiya obunuuli nende obumayaanu; mubwisiikwa ndalabarunga omurungo kwabwe, khandi ndalakhola ninabo indakano yobumeli.

⁹Abolwibulo lwabwe balamanyikha mubamahanga, nabo abaana babwe mutsimbia tsiabandu; boosi ababalolakhwo balafuchilila, mbu toto bo ni olwibulo lwa OMWAMI yahelesia ikhabi.

¹⁰Ndalekhoyela mu OMWAMI Nyasaye muno, omubili kwanje kwosi kulekhoya mu Nyasaye wanje; okhuba yafwalile ebiifwalo biobuhonia, niyafwimba eshiifwalo shiobulunjishi, shinga olwa eshibakhwa yesiahanga ebiisiaho, khandi shinga omweha olwa yesiahanga nebimilibie.

¹¹Okhuba shinga liloba olwa lirusinjia emirombo chialio, khandi shinga olwa indalo yikholanga eshirachilwemwo okhuromba, nolwa OMWAMI Nyasaye alakhola obulunjishi nende obwitsoomi okhulolekha habulafu imbeli ewa amahanga koosi.