Read wanga ISAYA 62 Bible Online

ISAYA 62 - wanga bible

ISAYA 62

¹Khulwa okhubela Zayuni, shindalaholeela ta, khandi khulwa okhubela Yerusalemu, shindalahuluukha ta, okhuula olwobulunjishi bwalio bwangaala shinga obulafu bwa mumabwibwi, nabwo obuhonia bwalio shinga eshichienga shiomulilo eshiakhanga.

²Amahanga kalalola obulunjishibwo, nabo abaruchi boosi oluyalilwo; nawe olalangwa eliira liiyiakha eliira lia OMWAMI Nyasaye omwene alakhukulikha.

³Olaba olusimbi lweing'oono mumukhono kwa OMWAMI Nyasaye, khandi eshilemba shioburuchi mumukhono kwa Nyasayewo.

⁴Shiolalangwa khandi mbu, “Owalekhwa” ta, noho eshibalashio okhulangwa mbu, “Likunda” tawe; nebutswa olalangwa mbu, “Emusangalilanga,” nashio eshibalashio mbu, “Owateshibwa.” Okhuba OMWAMI akhusangaaliranga, naye alaba shinga outeshiye eshibalashio.

⁵Okhuba shinga lwomusolili ateshia omukhaana omushisila, nolwa oukhumbakha alakhuteshia, khandi shinga olwa eshibakhwa asangalila omwehawe, nolwa Nyasayewo alakhusangalila iwe.

⁶Khumasiisiko, Iwe Yerusalemu, ndemeeshekhwo abalindi; eshilo shiosi neshiteere shibalaholeela nahatuutu ta. Inywe abamuhabilanga OMWAMI, shimulahuluukha ta,

⁷kata shimulamuhelesia obuhuluushi ta, okhuula olwa aralisia litookho lia Yerusalemu nalihelesia ifuma mushialo shiosi.

⁸OMWAMI yetsubile khumukhonokwe omusaatsa nomukhonokwe kwamaani: Shindilibukulakhwo khandi imele yenywe okhuba eshiliibwa khubasuku benywe, kata abarende shibalinywakhwo idivai ya mwarulilakhwo oluuya okhukaasia ta;

⁹nebutswa inywe abachesa imele eyo mulachilia nimwitsoomia OMWAMI, ne balia ababuunjelesia emitsabibu balanywa idivai yachio mulwanyi lwanje olutakatifu.

¹⁰Rule, rule elwanyi weshilibwa, kasilie abandu injila; mubuche, mubuche omuhanda, mutoolekhwo amachina, musinjisie ipendera hekulu khubandu betsimbia tsiaukhaane.

¹¹OMWAMI amalile okhurumbula okhuula khunduukho weshibala: Boolela omukooko Zayuni mbu, “Lola, omuhoniawo yetsanga; achinjile omurungokwe, nashio eshihanwashie shili imbeliwe.”

¹²Balikulikhwa mbu, “Abandu Abatakatifu, Abanunule ba OMWAMI;” ne mulilangwa mbu, “Abakhaabwa, litookho elilaalekhwa tawe.”