Read wanga ISAYA 63 Bible Online

ISAYA 63 - wanga bible

ISAYA 63

¹“Niwiina uno owitsa okhurula Edomu, okhurula Bozira nafwalile ebifwalo ebiakhanyu? Niwiina uno owifwalile ebifwalo ebioluyali, ouchenda mubunji bwamaanike?” “Nisie OMWAMI Nyasaye, ourumbulanga obulunjishi, omwene wobunyali bwokhuhonia.”

²“Ne mbushiina tsingubotsio nitsili tsinzakhanyu, ebiifwalobio shinga biomundu ouswalanga emitsabibu mushitiinyilo?”

³“Ndaswalile emitsabibu mushitiinyilo sienyene, ne abulaho owarulile mubandu okhukhoonya tawe; Ndatsiswalile muburuma, ninzitubanjila mubululu bwanje; amaatsi katsio kaamitsushiile khubifwalo bianje, nikatsiibia tsingubo tsianje tsiosi.

⁴Okhuba inyanga yokhumala eshikwoli yali mumwoyo kwanje, nakwo omwaka kwobununuli bwanje kwali nikulile.

⁵Ndahenga, nebutswa shindalola oukhoonya ta, ndaraangala, nebutswa shiyaliho oundeeterera ta; kho omukhono kwanje omwene kwandeerira obuhuli, nabwo obululu bwanje nibunzuuba.

⁶Ndaswalakana tsimbia tsiabandu muburuma bwanje, ndabatubula mubululu bwanje, mana nisundula amabanga kabwe khushibala.”

⁷Ndalarumbula akeshisa ka OMWAMI Nyasaye, ebikhole bieifuma ebia OMWAMI Nyasaye, okhulondana nende koosi aka yakhukholela ifwe, nende olukoosilwe olukhongo khubeinzu ya Isiraeli, olwa abakoosiye okhulondana nende obunji obweshirendashie, okhulondokhana nende obunji bwobuheelibwe oburalilu.

⁸Okhuba yaboola ari, “Toto mwene bano nabandu banje, abaana banje abalanyala okhukholela akobubatsa ta,” mana niyekhola omuhonia wabwe

⁹mukhunyakhana khwabwe khwosi. Shiyali omurumwa noho omumalaika owabahonia ta, habula okhubaho khukhwe; mubuheelibwe nende tsimbabasitsie yabahonokosia; yabachiinga nabahendera okhurula khale.

¹⁰Nebutswa bamukholela induli mana nibabeelesia Rohowe Omutakatifu; khulweshio yabakalukhanakhwo niyekhola omusuku; mana omwene nabaseera.

¹¹Mana nibetsulila tsinyanga tsia khale, etsia Musa omukhalabaniwe. Ali heena owabatikulusia okhurula munyaanza halala nende abaayi bebiayobie? Ali heena owabaramwo Rohowe Omutakatifu,

¹²owakhola omukhonokwe okwamaani, okhuchenda halala nende omukhono omulunji okwa Musa owakabula amaatsi imbeli wabwe okhwinyoolela omwene eliira elilahwaho ta,

¹³owabemilila okhubira mutsisiba? Shingana ifarasi mushiangalaamwe, shibayesichiralakhwo ta.

¹⁴Shingana tsing'ombe etsikholomokha mwibanda, Roho wa OMWAMI yabahelesia obuhuluushi. Nolwa wemilila abandubo, okhwinyolela eliira lioluyali.

¹⁵Henga hasi okhurula mwikulu olole, okhurula mushimenyoshio eshitakatifu khandi eshioluyali. Obulumilifubwo nende amaaniko bili heena? Amahofu komumwoyokwo nende eshisashio? Biikalilwe oburanzulakhwo ta.

¹⁶Okhuba iwe niwe seefwe, kata Aburahamu nalakhumanyire ta, naye Isiraeli nalafuchilila mbu khuli abebe ta; iwe, Iwe OMWAMI, niwe seefwe; Omununuli Wefwe nilio eliiralio okhurula khale.

¹⁷Mbushiina, Iwe OMWAMI, okhukosinjia okhurula khunjilatsio niwumia emioyo chiefwe mbu khuleshe okhukhuria iwe? Kalukha khulwa abakhalabanibo, khulwa tsimbia tsiobulaamebwo.

¹⁸Abandubo abatakatifu balia obulaame khulwa eshise shitiiti; nebutswa abasuku befwe basenachilila nibasasia eshimenyoshio.[10]

¹⁹Oluhoono olurambi khwafwanile shinga abandu aba olarukanga ta, shinga balia abalalangungwa eliiralio ta.