Read wanga ISAYA 64 Bible Online

ISAYA 64 - wanga bible

ISAYA 64

¹Shiakhuha warandula likulu mana wekha hasi, mbu ebikulu binyale okhutechela imbeliwo

²shinga lwomulilo kufululusinjia eshitsakha nikukhola amaatsi okhupapachila okhukhola eliiralio okhumanyikha khubasukubo, mbu amahanga kanyale okhutechela imbeliwo!

³Olwa wakhola akokhuchenyia aka khulaali nikhulindililanga ta, wekha hasi, mana ebikulu nibirenga olwa biakhulola.

⁴Okhurula khale nakhale abulaho owahulilakhwo, lishili okhukwakhwo mushirwi shiosi shiosi, kata yibulaho imoni eyakhalolakhwo Nyasaye undi nalali iwe, oubatetsanga abo abamwisikanga ta.

⁵Waakanilanga abo abekhoyelanga okhukhola akobulunjishi, abo abakhwitsulilanga munjilatsio. Nebutswa wasinyikha, mana nikhwonoona; okhubeela wakhwibisila, khwakhola obumayanu.

⁶Fwesi khuli shinga omundu womusilo, nabio ebikhole biefwe ebiobulunjishi biosi bili shinga eshifwalo eshionooniibwe. Fwesi khwaniala shinga lisafu, nabwo obumayanu bwefwe bukhutuumula shinga omuyeka.

⁷Abulaho kata mulala ouhabilanga eliiralio, noho outeemanga okhukhukhaaba; okhuba iwe wakhufisa obwenibwo, mana nokhulekhuula mumukhono kwobwonooni bwefwe.

⁸Nebutswa iwe, Iwe OMWAMI, niwe Sefwe; ifwe khuli litoyi, nawe niwe omulonji wefwe; fwesi khuli emilimo chiamakhonoko.

⁹Shiolakhusinyishila muno tawe, Iwe OMWAMI, shioletsulila obumayanu bwefwe khulwa inziayo tawe. Yitsulila mbu fwesi khuli abandubo.

¹⁰Amatookhoko amatakatifu kakwile eshitsiimi, Zayuni likwile eshitsiimi, Yerusalemu likunda.

¹¹Ihekalu yefwe indakatifu khandi eyoluyali, habundu aha abakuuka befwe bakhwitsoomilinjia hasambwa nomulilo, mana buli habundu wefwe hosi ahokhuchamisia hakwile likunda.

¹²Olunyuma lwamakhuwa kano koosi, olesimilisia OMWAMI? Olaholeela butswa, nokhusalisia obululu?