Read wanga ISAYA 65 Bible Online

ISAYA 65 - wanga bible

ISAYA 65

¹Nderechekha okhukhaabwa nende abo abali nibalaareebile ta, ndanyoleshela abo abali nibalakhaabile ta. Ndaboola endi, “Nisie uno, nisie uno,” khulihanga elilaalanjisia khuliira lianje ta.

²Eshiteere tulu ndakololosilia amakhono kanje abandu beinduli, abachendanga munjira yilakhoyeere ta, nibalonda amapaaro kabwe abeene;

³abandu abasinyisinjia imbeli wanje buli lwosi, abamalanga emisango emisambe mubikuuri, nokhusamba obubane khumatofari;

⁴abekhalanga mubilindwa, nibahoonga mubwifisi eshilo shiosi; abaliitsanga inyama yetsimbiitsi, nibanywa omunyu kwetsinyama tsiomusilo.

⁵Ababoolanga bari, “Toonyele ehale, mulasite ahambi ninasi ta, okhuba isie endi omutakatifu okhubashila inywe.” Abandu bano bali shinga omwosi mumolu kanje, omulilo okwakhanga eshiteere tulu.

⁶Lola, kahandikwa imbeli wanje: shindalaholeela ta, habula ndalarunga; toto mwene ndalaruula khumakulu kabwe

⁷obumaayanu bwabwe nende obwa abakuuka babwe halala, nolwa OMWAMI aboola; shichila bamala emisango chiobubane khubikulu nibanyeka isie khutsingulu, Ndalabachelela khumakulu kabwe omurungo okuhela khulwa ebikhole biabwe.

⁸Kano niko aka OMWAMI Nyasaye aboola, “Shinga olwa idivai yinyoolekha mushisakanya shiemitsabibu, mana baboola mbu, ‘Mulachionoonia ta, shichila yilimwo ikhabi,’ nolwa ndalakhola khulwa abakhalabani banje, shindalabamulula boosi ta.

⁹Ndalabuusia olwibulo okhurula mu Yakobo, ne okhurula mu Yuda abalia obulame bwebikulu bianje; abalobole banje balabulaamilwa, nabo abakhalabani banje balamenyamwo.

¹⁰Sharoni shilaba obwayilo bwebiayo, nalio libanda elia Akori habundu hemiruko okhuhuluushila, khulwa abandu banje abakhaaba isie.

¹¹Nebutswa inywe abamulekhanga OMWAMI, abebililanga eshikulu shianje eshitakatifu, abaalanga imeesa khulwa Ikhabi nimwitsusilia Induukho ebikombe biidivai eyitsokaasiibwe;

¹²ndamurecheshela olukanga, mana mwesi mulabuunamia emirwe okhusinzwa; okhuba olwa ndamulanga shimwafuchilila ta, olwa ndaboola shimwareka amarwi ta, nebutswa mwakhola obumayanu imbeli wanje, khandi nimwahula akandalatsaatsalira ta.”

¹³Khulweshio kano niko aka OMWAMI Nyasaye aboola: “Abakhalabani banje balalia, nebutswa inywe mulaba inzala; abakhalabani banje balanywa, nebutswa inywe mulaba nobuloho; abakhalabani banje balekhoya, nebutswa inywe mulafwimbwa omurwe;

¹⁴abakhalabani banje balemba khulwa obusaangaafu mumwoyo, nebutswa inywe mulalila khulwa obutsuunwi mumwoyo, khandi mulakhupa tsimbungu khulwa obutsuunwi obukhongo mumwoyo.

¹⁵Mulaleshela abalobole banje eliira lienywe okhuliikhoonyera shinga eshilaamo shiobubii, naye OMWAMI Nyasaye alamwira; nebutswa alabahelesia abakhalabanibe eliira liahukhaane.

¹⁶Nolwa yesi ousabila ikhabi mushialo, alasabila ikhabi tsana okhubirira khu Nyasaye wobwisiikwa, naye yesi owitsuba mushialo aletsubila khu Nyasaye wobwatoto; okhuba amanyakhano akabira kamalile okhwibililwa mana kabisilwe okhurula imbeli wanje.

¹⁷“Okhuba endi ahambi okhulonga likulu liyia nende eshialo eshiyia; ebindu biakhale shibiletsulilwakhwo kata okhupaarwakhwo tawe.

¹⁸Nebutswa mwikhoye nimusangaala inziayo, khulwa eshio eshia enonganga; okhuba endi okhukhola Yerusalemu omwikhoyo, nabo abandu balio omusangaalo.

¹⁹Ndalekhoyela mu Yerusalemu, khandi ndalasangaalila abandu banje; tsimbuungu tsiokhwikhuula shitsilahulilikhamwo khandi ta, kata okhulila khulwa amatinyu tawe.

²⁰Shialabakhwomwo khandi omwana omuhele oufwa olunyuma olwa tsinyanga butswa, kata omukofu oulamalilisia eshichelo shiemiyikachie chiosi ta; okhuba oufwa nali nemiyika eshikhumi (100) alabasibwa shinga oushili omuraaka butswa, naye oufwa nashili okhuusia emiyika eshikhumi (100) alabasilibwa mushilaamo shiobubi.

²¹Balombakha tsinzu nibamenyamwo; balaraaka emikunda chiemitsabibu nibalia khubiamo biachio.

²²Shibalombakha tsinzu mana oundi amenyemwo ta; shibalaraaka mana oundi alie ta; okhuba shinga tsinyanga tsiomusaala tsili nolwa tsinyanga tsiabandu banje tsilaba, nabo abandu banje abaahule balasangalila emilimo chiamakhono kabwe khulwa oluhoono.

²³Shibalanyakhana butswa ta, kata okhwibula abaana khulwa okhunyoola amaraba tawe; okhuba balaba olwibulo olwahebwa ikhabi nende OMWAMI nende abaana babwe boosi bario.

²⁴Nibashili okhuuhaabila ndalabahabina, olwa baba nibashiboolanga, ndalabahulila.

²⁵Lifunyisi nende eshimeme shielikondi bilaayila halala, italanyi yilaaya obunyasi shinga ing'ombe; nebutswa eshiokhulia shieinzokha shilaba olufu! Shibalatsunwa kata okhusasia eshindu shiosi khushikulu shianje eshitakatifu ta,” nolwa OMWAMI aboola.