Read wanga ISAYA 66 Bible Online

ISAYA 66 - wanga bible

ISAYA 66

¹ OMWAMI Nyasaye aboola ari, “Likulu neshifumbi shianje shiobwami nashio eshialo neshifumbi shielambisinjiakhwo ebilenje; kho inzu ya mwakhanyumbashila yakhahela yirie? Ne aha ndakhahuluushila ni heena?

²Omukhono kwanje nikwo okwakaasia ebindu bino biosi, khulweshio biosi nebianje, nolwa OMWAMI Nyasaye aboola. Nebutswa isie enjamisibungwa nende oyo owituutuyia khandi owomwoyo omunyushe, outechelela likhuwa lianje.

³Yesi yesi ousinza ing'ombe ali butswa shinga owiira omundu; oumala omusango kwelikondi, shinga oufunaka imbwa likosi; oureera eshihaanwa shieimele, shinga oumala omusango kwamalasile keimbitsi; oumala omusango kwokhwitsulilwa kwokhusamba obubane, shinga owinamila eshifwanani. Bano bayeloboleele abeene tsinjila tsiabwe, khandi basaangalilanga ebiebisinyo biabwe;

⁴siesi ndalalobola okhubatseshelela, ndalabareerera aka baritsanga; okhuba olwa ndabalanga, abulaho owafuchilila, olwa ndaboola, abulaho owareka amarwi; nebutswa bakhola obwonooni imbeli wanje, khandi baahula kalia akalaanjamisia isie tawe.”

⁵Hulile likhuwa elia OMWAMI Nyasaye, inywe abatechelelanga likhuwalie: Abaana benywe abamukiyanga, nibamwikaana khulwa okhubeela eliira lianje baboolile bari, “Lekha OMWAMI Nyasaye ahebwe oluyali, mbu khunyale okhulola okhwikhoya khwenywe”; nebutswa nibo abalafwimbwa omurwe.

⁶Reche amarwi, omwoyo kweindiri okurula mwitookho! Omwoyo okurula muhekalu! Omwoyo okwa OMWAMI, ourunganga abasukube eshinyasio khu ka bamukholela!

⁷Olwa yali nashili okhulumwa yeebula; inumwa yeinzibula niyishili okhumuchaaka yeebula omwana omusiani.

⁸Owahulilakhwo elifwana lirio niwiina? Owalolakhwo akafwana kario ni wina? Eshialo eshilamba shiakhebulwa khunyanga ndala? Lihanga lilamba liakhebulwa khushise shilala? Nebutswa olwa Zayuni liachaaka okhulumwa inzibula, liebula abaana balio.

⁹Ndakhoosia abaana khukhwibulwa mana endeshe okhubebula noho? Nolwa OMWAMI aboola; toto mwene isie, owibusinjia, ndakhekala olubeleshelo? Nolwa Nyasayewo areeba.

¹⁰Mutsaatsahale halala nende Yerusalemu, nimulisangaalila, inywe mwesi abaliheela; mwikhoye halala ninalio mubusangaafu, inywe mwesi abekhuulanga khulwa Yerusalemu,

¹¹mbu munyale okhunuuna nimwikura okhurulana khulubeelelwe lwokhuhotselesia; mbu munyale okhunywa nimwikura nimutsaatsahala, okhurulana khushilifushie shioluyali.

¹²Okhuba kano niko aka OMWAMI aboola: Ndalalireerera okhutsianakana shinga omwalo, khandi obuyinda bwa amahanga shinga omuchela okuyeembile; nawe olanula nochinjilwa khumukhono kwalio, nokhulelelwa khumasikamo kalio.

¹³Shinga butswa olwa nyinamwana ahotselesinjia omwanawe, nolwa nditsa okhukhuhotselesia iwe; olahotselesibwa mu Yerusalemu.

¹⁴Mulalola amakhuwa kano, ne emioyo chienywe chilekhoya; emibili chienywe chilanera shinga omuboka; ne kalamanyikha mbu omukhono okwa OMWAMI Nyasaye kuli halala nende abakhalabanibe, nalio lirumalie lili khubasukube.

¹⁵Okhuba OMWAMI Nyasaye aleetsela mumulilo, nako amakaarike kelihe shinga eshimbalakuusi, okhurunga oburumabwe nende obululu, nakhwo okhukondekhakhwe mumemu tsiomulilo.

¹⁶Okhuba okhubirira mumulilo OMWAMI alakhalachila abandu eshiina, kandi khulwa olukanga alahelesia abandu boosi eshinyasio; ne balia abeerwa nende OMWAMI Nyasaye balaba abanji muno.

¹⁷“Abo abetsienula nibelafilia okhutsia mubikuuri biasirwa tsingaka, nibalonda oyo ouli hakari, nibalia inyama yetsimbiitsi, tsimbeba, nebituuyu, boosi baloola khushiakamo shiabwe halala,” nolwa OMWAMI aboola.

¹⁸“Okhuba ndamanya ebikhole biabwe nende amapaaro kabwe, ne nditsanga okhukhung'asia halala amahanga koosi nende abetsimbia tsiosi; nabo baletsa mbu balole oluyali lwanje,

¹⁹nasi ndalasinjisia eshilolero hakari wabwe. Khulwa bo, ndalaruma abalahonokokha okhutsia khumahanga, khu Tarishishi, Puti nende Ludi, akakhwesanga obuyingo khu Tubali nende Yawani, khumahanga akali khutsinguku etsieinyanza etsili ehale, akashili okhuhulilakhwo ifuma yanje kata okhulolakhwo oluyali lwanje; mana balarumbula akoluyali lwanje mumahanga.

²⁰Balachelesia abaana benywe boosi okhurula mumahanga koosi shinga omusango okumalilwa OMWAMI, khutsifarasi, khumakari ketsifarasi, mumakaari akebilama, khutsipuri, nende khutsingamia, khushikulu shianje eshitakatifu, Yerusalemu, nolwa OMWAMI aboola, shinga butswa olwa Abaisiraeli bareeranga eshihaanwa shiabwe eshia imele mushichiinjilo eshisiiye, nibayireera munzu eya OMWAMI.

²¹Mana ndalaahula balala khubo okhuba abesaaliisi nende Abalawi,” nolwa OMWAMI aboola.

²²“Okhuba shinga olwa likulu liyia nende eshialo eshiyia, ebia ndakhalonje, bilamenyaho imbeli wanje,” nolwa OMWAMI aboola; “Nolwa abolwibulolwo nende eliiralio bilamenyaho birio.

²³Okhurula khumwesi omutoro okhuula khukundi, nende khusabato okhutsia khuyindi, abandu boosi baleetsanga okhwinama imbeli wanje,” nolwa OMWAMI aboola.

²⁴“Mana balarula ebulafu okhuhenga khumilambo chiabandu abaakholela isie induli; okhuba tsinyende tsichiliitsanga shitsilifwa ta, khandi omulilo kulichisamba shikulisima ta, nachio chiliba echieshisinyo khubandu boosi.”