Read wanga ISAYA 7 Bible Online

ISAYA 7 - wanga bible

ISAYA 7

¹Mutsinyanga tsia Ahazi omusiani wa Yotsamu, omwitsukhulu wa Uzia, yali omuruchi wa Yuda, Rezini omuruchi wa Siria nende Peka omusiani wa Remalia, omuruchi wa Isiraeli betsa okhuseera Yerusalemu, nebutswa shibalihula tawe.

²Olwa omuruchi Ahazi wa Yuda yahulila mbu, Abasiria bafuchilisaniye nende Abaisiraeli, ye halala nende abandube batiilwa noburi, mana nibatechela shinga olwa emisaala chiomumutsuru chireesibungwa nomuyeka.

³Mana OMWAMI Nyasaye naboolela Isaya ari, “Bukula omusianiwo Sheari-yashubu [2] mana otsie wakaane nende omuruchi Ahazi. Olamunyoola khumuhanda aha abalushi betsingubo bekhalanga, ahomutaro kureeranga amaatsi okhurula mwitiba liemukulu kwakamilanga.

⁴Omuboolele yehotselesie, alaria kata okhuhenda omwoyo khulwa liruma lilulu liomuruchi Rezini nabandube ba Siria nende eliomuruchi Peka tawe. Babili abo bali butswa shinga omwosi kwebichienga ebili ahambi okhusima.

⁵Siria halala nende Isiraeli nende abaruchi babwe bafuchilisaniye okhukhuseera iwe, nibaboola bari,

⁶‘Khutsie khuseere Yuda, khubariisie nende okhubahula, mana khwemeshe omusiani wa Tabeeli okhuba omuruchi wabwe.’

⁷Nebutswa isie OMWAMI Nyasaye erumbula mbu, ako shikalekholekha tawe.

⁸Okhuba lihanga lia Siria shilili namaani okhushila Damasiko litookho lialio likhongo tawe, khandi Damasiko shilili namaani okhushila omuruchi Rezini tawe. Nashio eshialo shia Isiraeli mumiyika amakhumi kasasaba nachirano echitsanga, shilaba nishiamala okhusasikha, nishilanyala okhuba lihanga khandi tawe.

⁹Lihanga lia Isiraeli shilili namaani okhushila litookho lialio likhongo lia Samaria tawe, khandi Samaria shilili namaani okhushila omuruchi Peka tawe. Nawe Ahazi noba nolaralila mubusuubili ta, kho olahulwa.”

¹⁰Khandi OMWAMI Nyasaye naboolela Ahazi ari,

¹¹“Reeba OMWAMI Nyasayewo akhuhelesie eshilolelo. Shibe okhurula emakombe noho okhurula mwikulu.”

¹²Nebutswa Ahazi yamukalusia naboola ari, “Shindalareeba eshilolelo ta, khandi shinzenya okhuteema OMWAMI Nyasaye tawe.”

¹³Mana Isaya naboola ari, “Bulano hulile inywe abolwibulo lwa Daudi! Shimunyaliishe okhuchoonyia abandu ta, mbu kho mwenya okhuchoonyia kata Nyasaye wanje khandi?

¹⁴Khulweshio OMWAMI Nyasaye omwene alamuhelesia eshilolelo. Lola, omukhaana omushisila alahela inda, ne alebula omwana omusiani, ne alakulikhwa eliira mbu Imanueli[3]

¹⁵Omwana oyo alanywetsanga amabeele ketsikubuli nende okhulia obuushi olwa alaba namanyile okhuloba amabi nende okhwahula amalayi.

¹⁶Ne kata omwana tsana nashili okhuula wokhuloba amabi nende okhwahula amalayi, eshialo shiabaruchi babili abamurisinjia abo shilaba nishiamala okhusasibwa shiosi pe.

¹⁷OMWAMI Nyasaye alareera khwiwe nende khubandubo nende khubeinzuyo boosi tsinyanga tsiamanyakhano amanji okhushilakhwo amanyakhano koosi akeetsakhwo khale khwihanga lia Isiraeli okhurula mutsinyanga tsia lialekhana nende lihanga lia Yuda. OMWAMI Nyasaye alareera omuruchi wa Asiria okhumuseera.”

¹⁸Khunyanga eyo, OMWAMI Nyasaye alikhupa eshifwetete okhulanga Abamisiri okhwitsa shinga tsiisi etsili khumichela chia Misiri, khandi alilanga Abasiria okhurula mushialo shiabwe okhwitsa shinga tsinzushi.

¹⁹Boosi balitsa nibamamila amabanda ketsinjengulukho, nende mumbangatsi tsiomutsinyanda nende khubisisia nende mubwayilo bwosi.

²⁰Khunyanga eyo, OMWAMI Nyasaye alirunga omubechi weliswi okhurula injelekha womwalo kwa Yufurate, niye omuruchi omukhongo wa Asiria! Alibeka liiswi liokhumirwe chienywe nende elili khumibili chienywe nende tsindefu tsienywe.

²¹Khunyanga eyo, omundu ouliba niyaruka ing'ombe imoosi ndala nende amakondi kabili,

²²alinywa amabeele ketsikubuli nende okhulia obuushi, shichila emiruko echio chilimuhelesia amabeele amanji muno. Boosi abalitong'a mwihanga balinywa amabeele ketsikubuli nende okhulia obuushi.

²³Khunyanga eyo, buli omukunda kwalinjimwo emitsabibu eshikhumila shilala (1,000) echinyala okhukusibwa ebitonye eshikhumila shilala bieifeetsa, kulimelamwo amarakalu nende ebisisia.

²⁴Abandu balitsiamwo okhuyima nibali nende obuyingo nende tsisele. Lihanga liosi liliitsulamwo amarakalu nende ebisisia.

²⁵Ne khubikulu biosi ebia mwalimangakhwo neimbako shimwakhatsiekhwoyo khandi ta, shichila biakhabe nibiakwa amarakalu nende ebisisia; biakhakwe olwayilo lwetsing'ombe nende amakondi.