Read wanga ISAYA 8 Bible Online

ISAYA 8 - wanga bible

ISAYA 8

¹Mana OMWAMI Nyasaye niyamboolela ari, “Bukula olubao olukhongo ohandichekhwo netsinyukuta tsikhongo ori, ‘YAAYA LWANGU-NUULA LWANGU.’ ” [4]

²Obukule abandu babili abesiikwa babe abaloli banje, omwisaaliisi Uria nende Zakaria omusiani wa Yeberekia.

³Mana omukhasi wanje nahela inda, niyeebula omwana omusiani. OMWAMI Nyasaye niyamboolela ari, “Omukulishe eliira mbu, ‘Yaaya lwangu-Nuula lwangu.’

⁴Okhuba omwana oyo nashili okhumanya kata okhurumbula ‘papa’ kata ‘mama,’ obuyinda bwa Damasiko bwosi nende ebindu biosi biabandu ba Damasiko bali nibayaaya bilabukulwa nomuruchi wa Asiria.”

⁵Khandi OMWAMI Nyasaye niyamboolela ari,

⁶“Shichila mbu abandu bano balobile amaatsi akabiranga kalaha okhurula mumuchela kwa Shiloa, mana nibatiilwa neindenga imbeli womuruchi Rezini nende omuruchi Peka,

⁷isie OMWAMI Nyasaye ndalabareerera omukhula omukhongo kwomwalo kwa Yufurate, niye omuruchi omukhongo wa Asiria nende abelihebe boosi okhuseera Yuda. Baleetsa shinga omukhula kwamaatsi okwitsula nikubira tsinguku tsiakwo tsiosi.

⁸Balabira mu Yuda shinga omukhula kwamaatsi okwitsula okhuula mwikosi nikufunikha buli shindu; tsimbahatsie tsibambushe tsifunishe eshialoshio iwe Imanueli.”

⁹Inywe amahanga, khung'ane halala muburi! Inywe abebialo biehale recheresie. Mwirecheshe nebutswa mube noburi! Mwirecheshe nebutswa mube noburi.

¹⁰Muloosie halala shinga olwa munyala okhulwana! Nebutswa shimulahula tawe. Muboole koosi, nebutswa namakhaya butswa, shichila Nyasaye ali ninefwe.

¹¹Khandi OMWAMI Nyasaye yanjetsiyia nobunyalibwe obukhongo, niyamboolela mbu ndalaloondakhwo injenda yabandu abo tawe. Yamboolela ari,

¹²“Koosi kabandu bano baboola mbu nobukhobani, iwe olakarumbula mbu nobukhobani tawe. Khandi aka bo baria, iwe shiolakaria kata okhuhenda omwoyo tawe.

¹³Nebutswa witsulile mbu, isie OMWAMI Nyasaye omwene mahe, nisie omutakatifu, kho nisie owa okhoyile okhuria nende okhwinamila.

¹⁴Isie endi shinga eshisichirasio, khandi shinga lichina liabandu besichiralakhwo khandi shinga olwanda lwokhukwisia oburuchi bwa Isiraeli nende Yuda. Endi shinga omubero kwokhutiila abandu bamahanga ka Yuda nende Isiraeli nende abandu ba Yerusalemu.

¹⁵Abandu abanji balesichiralakhwo, balakwa, nibatubukha. Balatiilwa nomubero okwo nibayilwa mubuhambe.”

¹⁶Inywe abeechi banje mukhoyile okhutiila nende okhulinda obulayi amakhuwa ka Nyasaye yambelesiye.

¹⁷OMWAMI Nyasaye yebisile okhurula khubandube ba Isiraeli. Nebutswa isie ndisikanga ye khandi obunaayi bwanje buli muye.

¹⁸Lole, isie nende abaana ba OMWAMI Nyasaye yambelesia nebilolelo mu Isiraeli, ebilolelo okhurula khu OMWAMI Nyasaye omwene mahe, oumenyanga khushikulu shia Zayuni.

¹⁹Abandu balamwitsakhwo nibamuboolela bari, “Tsie mureebe okhurula khubishieno noho khu bebitsohelo. Tsie khubafumu nende betsinyengo. Shichila kali habwene abandu okhureebelesia amakhuwa okhurula khubanyasaye babwe nende okhurula khu abamala okhufwa khulwa abo abaliho mwoyo.”

²⁰Inywe mubakalusie muri, “Abo ababoolanga ako shibalalola obulafu bweinyanga tawe.” Nebutswa inywe mutiile nende okhuloonda amebaalo ka OMWAMI Nyasaye.

²¹Abandu abo bakhabire mushialo nibafwile emioyo khandi nibali inzala. Nibali inzala bario bakhabe noburuma obunji khandi bakhalaame omuruchi wabwe nende Nyasaye wabwe eshilaamo shiobubi. Bakhahenje ikulu mwikulu,

²²nende hasi khwiloba, nebutswa bakhalole butswa eshilima nende amatinyu. Bakhalole eshilima eshiokhurisia khandi bakhenjisibwe mushiilima eshio.