Read wanga ISAYA 9 Bible Online

ISAYA 9 - wanga bible

ISAYA 9

¹Abandu abo balitong'a butswa bario nibali mumatinyu, injila yokhwihonokosia shiyilibakhwoho tawe. Khale eshialo shioluyia lwa Zebuluni nende lwa Nafutali shiali nishiachaaywa, nebutswa mutsinyanga tsiolunyuma eshialo eshio shilihebwa oluyali, okhuchaachila ebukwe weinyanza yahakari okhutsia okhuula khushialo eshili injelekha womwalo kwa Yorodani, nende okhutsia okhuula Galilaya ewa abandu abamahanga bamenya.

²Abandu abachenda mushiilima khale, leelo baluutsi obulafu obukhongo. Abo abali nibamenya mushialo shieshilima eshimali ti, leelo obulafu bubashiile.

³OMWAMI Nyasaye iwe wakholile lihanga okhwinjiha, khandi wameetile omwikhoyo kwabwe. Abandu leelo bekhoya imbeliwo, shinga abali mwichesa, khandi shinga abakabana ebia bayaayile.

⁴Okhuba iwe wafunache likokolo liali niliabasitohela, eliali niliashiamibwa khumabeka kabwe, khandi ofunache indabushi ya abo ababasandia bekhoonyelanga okhubasandia. Iwe omalile okhuhula abandu abo shinga olwa wahula abelihe lia Abamediani khale muno.

⁵Ebilaaro biabelihe abaseeri, nende tsingubo tsiabwe tsiosi etsilikhwo amatsayi biosi bilasambwa mumulilo.

⁶Okhuba omwana yebuulwe khulwefwe, khandi khuhelwe omwana omusiani, naye alaba omuruchi wefwe. Alalangwa eliiralie mbu, “Omwibaali wamakana,” “Nyasaye wobunyali” “Seefwe weinziayo,” “Omuruchi womulembe.”

⁷Obunyalibwe bwoburuchi bwakhatsiililile okhwimeeta, nakwo omulembe kwakhatsiililile okhubaho obulaakama tawe. Yakheetse okhuruka mushilenje shiomuruchi Daudi, ne yakhaamihe muburuchibwe. Obukhalachibwe bwakhabe obwahabwene khandi bwobulunjishi, okhurula olwa leelo okhuula inziayo. OMWAMI Nyasaye omwene mahe nakhunyalile okhukhola ako koosi.

⁸OMWAMI Nyasaye amalile okhurumbula eshinyasio khubandu beshialo shia Isiraeli, khubolwibulo lwa Yakobo.

⁹Khandi abandu boosi ba Isiraeli bakhamanye, boosi abolwibulo lwa Efuraimu, abamenyanga mwitookho lia Samaria, abomukhwichinjimisia nende mukhwikhulumamia khwabwe baboola bari,

¹⁰“Amasiisi akombakhwa namatofali kakwile hasi, nebutswa khulakombakha obuyia namachina akabaatswa. Tsinzu etsiakuulwa nemisaala emikhuyu tsikwile hasi, nebutswa khulatsiumbakha nemisiita mushilenje shiemikhuyu.”

¹¹Khulweshio OMWAMI Nyasaye alaralisia abasuku babwe, nende okhubatsuuba okhubaseera.

¹²Abasiria abali ebukwe, nende Abafilisiti abali mumbo, boosi basamiyie eminwa chiabwe okhumila Isiraeli. Ne kata kario liruma elia OMWAMI Nyasaye shililahwa ta, khandi omukhonokwe kushikololooshe butswa khulwa okhuhaana eshinyasio.

¹³Nebutswa kata OMWAMI Nyasaye omwene mahe nabahelesia eshinyasio ario, abandu ba Isiraeli shibamukalushila, kata okhumukhaaba tawe.

¹⁴Khulweshio OMWAMI Nyasaye alahaana eshinyasio khubandu ba Isiraeli, alakhalaka omurwe nende omushila. Alakhalaka lisaka liomushindu nende olusi khunyanga ndala.

¹⁵Abakofu nende abandu boluyali nibo omurwe, nabo abalakusi bechesinjia akobubeeyi nibo omushila.

¹⁶Okhuba, abemililanga abandu bano babakosinjia, nabo abemililwa ninabo bashiamibwa muno.

¹⁷Khulweshio, OMWAMI shialabeelakhwo ababuukha ta, khandi shialabelelelakhwo abakhasi abalekhwa kata abaana ababisandu tawe. Alakhola ako shichila boosi shibaritsanga Nyasaye ta, khandi bakholanga obumayanu. Boosi baboolanga akobubeeyi. Ne Kata kario liruma lia Nyasaye shililahwa ta, khandi omukhonokwe kushikololooshe butswa khulwa okhuhaana eshinyasio.

¹⁸Toto obumayanu busambanga shinga omulilo, bumululanga amarakalu nende ebisisia. Busambanga omutsuru, mana butuumukha shinga omwosi okutumuukha nikutsia mwikulu ikulu.

¹⁹Okhuba OMWAMI Nyasaye omwene mahe asinyiishe, eshialo shiosi shilasambwa nomulilo, ne abandu nibo abalaba tsikhwi, abulaho oulabelelela owashie tawe.

²⁰Khumukhono musaatsa banuula, nebutswa shibibahela ta, ne khumukhono mukhasi balia, nebutswa shibekura ta. Balalia kata emilambo chia baana babwe beene.

²¹Abandu aboluyia lwa Manase nende aboluyia lwa Efuraimu balwana abeene khubeene, khandi basanjilana okhuseera aboluyia lwa Yuda. Ne Kata kario liruma elia OMWAMI shililahwa ta, omukhonokwe kushikololooshe butswa khulwa okhuhaana eshinyasio.