Read wanga ABALAWI 1 Bible Online

ABALAWI 1 - wanga bible

ABALAWI 1

¹OMWAMI Nyasaye nali mwiheemalie litakatifu, yalanga Musa namuboolela ari,

²“Boolela abandu ba Isiraeli mbu, omundu yesi yesi khwinywe naba niyandeerera eshihanwashie, okhuula shibe eshia khung'ombetsie, amakondike noho tsimbusitsie.

³Omundu oyo naba nahaana ing'ombeye okhuba omusango omusambe, okhuula ahaane ihunwa eyibulakhwo obulema bwosi bwosi, ne ayireere hamuliango weliheema lianje litakatifu, kho mbu isie OMWAMI Nyasaye emufuchilile.

⁴Atiile omukhonokwe khumurwe kweshihaanwa shiokhusambwa eshio, kho shifuchililwe okhuba omusango kwokhuyiniaho obwonoonibwe.

⁵Mana asinzile ihunwa eyo imbeli wanje, nabo abesaaliisi, abasiani ba Haroni bandeerere amalasile, nibakahanya okhubotokhasia tsimbeka tsine tsieshimalilo shiemisango eshili habwinjililo weliheema lianje.

⁶Mana abaache ihunwa eyo nende okhuchitonyamwo ebitonye.

⁷Abesaaliisi barecheshe tsikhwi khushimalilo shiemisango mana babwane omulilo.

⁸Abesaaliisi abo babukule ebitonye bieinyama eyo, omurwe nende amasinya babire khumulilo kuli khushimalilo shiemisango eshio.

⁹Ouhaana omusango oyo okhuula yoosie amala nende ebilenje. Ne omwisaaliisi okhuula asambe omusango okwo kwosi khushimalilo shiemisango. Isakakha yomusango okwo yinjamisinjia isie OMWAMI Nyasaye.

¹⁰“Eshihanwashie shiomusango omusambe nishiba nishirula khung'ombetsie noho khumakondike noho khutsimbusitsie, okhuula shibe eshisaatsa eshilalikhwo nobulema bwosi bwosi tawe.

¹¹Ne ashisinzile elubeka lwemasaba lweshimalilo shiemisango imbeli wanje isie OMWAMI Nyasaye, mana abesaaliisi bahanye amalasile kashio okhubotokhana eshimalilo shiemisango shiosi.

¹²Omundu oyo ashitonyemwo ebitonye mana omwisaaliisi aloosie obulayi omurwe nende amasinya kashio khumulilo okuli khushimalilo shiemisango eshio.

¹³Nebutswa omundu oyo yosie amala nende ebilenje. Mana omwisaaliisi ahane inyama eyo yosi khwisie. Achisambe yosi khushimalilo shiemisango. Isakakha yomusango okwo yinjamisinjia isie OMWAMI Nyasaye.

¹⁴“Omundu oyo naba nahaana linyonyi okhuba omusango omusambe, okhuula libe lihusi noho omusosole kwelikuuku.

¹⁵Ne omwisaaliisi alireere khushimalilo shiemisango, aboroosie likosi lialio, mana asambe omurwe kwalio khushimalilo shiemisango. Amalasile kalio katatsilibwe halubeka lweshimalilo shiemisango eshio.

¹⁶Mana ayinie libotselo lialio nende ebilimwo nabisukuna elubeka lwebukwe lweshimalilo shiemisango mushibero.

¹⁷Mana yabule tsimbaha tsialio nebutswa alatsirusilia elala tawe. Omwisaaliisi alisambe liosi khushimalilo shiemisango. Ne isakakha yomusango okwo yinjamisinjia isie OMWAMI Nyasaye.”