Read wanga ABALAWI 10 Bible Online

ABALAWI 10 - wanga bible

ABALAWI 10

¹Mana Nadabu nende Abihu abasiani ba Haroni, buli mulala khubo nabukula eshikaye shiokhusambilakhwo obubani narakhwo amanda komulilo nende obubani ne nibahaanila OMWAMI Nyasaye, nebutswa obubane obwo shibwali obutakatifu ta, shichila OMWAMI Nyasaye shiyali nabalachilisiye mbu bamuhaanile tawe.

²Mana OMWAMI Nyasaye naruma omulilo bwangu nikubasamba boosi nibafwa.

³Mana Musa naboolela Haroni ari, “Kano niko aka OMWAMI Nyasaye yaboolangakhwo olwa yaboola ari, ‘Abo boosi abakhalabanilanga okhuula bahaane oluyali khubutakatifu bwanje; ndalafwimbula oluyali lwanje khubandu banje.’ ” Naye Haroni naholela butswa tsi.

⁴Mana Musa nalanga Mishayeli nende Elizafani abasiani ba Uzieli, owali khotsanyene Haroni nababoolela ari, “Site hambi muchinje emibili chiabasiani benywe okhurula habundu hatakatifu, muchiyile elwenyi weikambi.”

⁵Kho nibetsa, nibachinga emibili echio mungubo tsiabwe shinga Musa yali nabalachile.

⁶Ne Musa naboolela Haroni nabasianibe, Eliazari nende Itsamari ari, “Mulaleshe okhukwarusa liswi lienywe kata okhurandula ebifwalo bienywe, khulwa okhulolosia mbu mwikhulanga tawe. Nimukhola murio mulafwa, khandi OMWAMI Nyasaye alasinyishila omukanda kwosi. Nebutswa abaana benywe, abeinzu ya Isiraeli boosi banyala okhwikhuula khulwa lifwa lireerirwe nomulilo okhurula khu OMWAMI Nyasaye elo.

⁷Ne mularule elwanyi weliheema litakatifu tawe, nimukhola murio mulafwa shichila mwamala okhutsushililwakhwo amafura aka OMWAMI Nyasaye.” Nabo nibakhola okhulondana nelilako lia Musa elo.

⁸Mana OMWAMI Nyasaye naboolela Haroni ari,

⁹“Iwe nende abasianibo, mulanywekhwo idivai kata eshindu eshimesinjia olwa muba nimwinjila mwiheema lianje litakatifu tawe. Nimukhola murio mulafwa. Lino lilaba lilako khubetsinzibulo tsienywe ebisoni nebisoni.

¹⁰Okhuula mwahukhasie hakari wa eshindu eshitakatifu nende eshilali eshitakatifu ta, eshiomusilo nende eshilali shiomusilo ta;

¹¹Okhuula mwechesie abandu ba Isiraeli amalako koosi aka isie OMWAMI Nyasaye ndamulachilisia okhubirila khu Musa.”

¹²Musa naboolela Haroni nabasianibe babili abali nibatonyile, Eliazari nende Itsamari ari, “Bukule omusango kweimele okutonyile khumisango chiakholelwa nomulilo khu OMWAMI Nyasaye, mana mukaasie omukaate kubulamwo limela, ne mukuliile halubeka lweshimalilo shiemisango, shichila nomusango omutakatifu muno.

¹³Okhuula mukuliile habundu hatakatifu, shichila nikwo omukabo kwenywe nabasiani benywe okurula khumisango chikholilwe nomulilo khu OMWAMI Nyasaye. Ako niko aka OMWAMI Nyasaye yandachilisia.

¹⁴Nebutswa iwe nende abasianibo nende abakhaanabo munyala okhulia itakata eyichelilwe nende eshiatakho shiomusango. Munyala okhubilila habundu hosi hosi hasiiyikhu, shichila bakhuhelesiye ebio shinga omukabokwo nende abasianibo okhurula khumisango echiokhurera omulembe echia Abaisiraeli.

¹⁵Bareere eshiatakho nende itakata ebise biamasinya kaba nikahaanwa shinga omusango kweshiokhulia khwisie. Nabio bilaba ebibio, halala nabaanabo ebisoni nebisoni, shinga olwa isie OMWAMI Nyasaye ndalachilisia.”

¹⁶Ne Musa nareebelesia okhuloondana neimbusi yomusango kwobwonooni, ne nanyoola mbu yali niyimalile okhusambwa! Mana Musa nasinyishila Eliazari nende Itsamari abasiani ba Haroni abali nibatong'a,

¹⁷nabareeba ari “Shichila shiina nimulalilile omusango kwobwonooni habundu hatakatifu? Okwo nomusango omutakatifu muno, ne OMWAMI Nyasaye yamuhelesia inywe khulwa okhurusiaho obwonooni obwa abomukanda.

¹⁸Shichila mbu, amalasile kayo shikalerirwe mukari bwene mweliheema litakatifu ta, mwakhalile omusango okwo shinga ndalachilisia.”

¹⁹Naye Haroni nakalusia Musa ari, “Emba nendile omusango kwobwonooni inyanga yino, OMWAMI Nyasaye yakhakufuchilile noho? Abandu bakholile omusango kwabwe okwobwonooni khu OMWAMI Nyasaye khandi barerile omusango kwabwe omusambe, ne kata kario amakhuwa amabi kano kangwilile!”

²⁰Ne olwa Musa yahulila ako yafuchilila amakhuwa aka Haroni.