Read wanga ABALAWI 11 Bible Online

ABALAWI 11 - wanga bible

ABALAWI 11

¹Mana OMWAMI Nyasaye naboolela Musa nende Haroni mbu

²aboolele Abaisiraeli ari, “Mutsisolo tsiosi tsiokhushialo, munyala okhuliakhwo etsiloondakhwo tsino.

³Isolo yosi yosi yetsindekeyi khandi eyetsindekeyi tsiayo tsiakabukhanamwo hakari, khandi eyinyanyanga ikamuula.

⁴Ne kata isolo niyiba niyinyanyanga ikamuula, ne tsindekeyi tsiayo nitsialakabukhanamwo ta, mulachuliekhwo tawe. Ingamia kata niyinyanyanga ikamuula, tsindekeyi tsiayo shitsiakabukhanamwo tawe, nomusilo khwinywe okhuchilia.

⁵Lichieneli kata nilinyanyanga ikamuula nebutswa shiliakabukhanamwo tsindekeyi tawe, nomusilo khwinywe okhulilia.

⁶Eshituyu kata nishinyanyanga ikamuula, nebutswa shichila shishiakabukhanamwo tsindekeyi ta, nomusilo khwinywe okhushilia.

⁷Nomusilo khwinywe okhulia imbiitsi, shichila kata niyakabukhanamwo tsindekeyi, nebutswa shiyinyanyanga ikamuula tawe.

⁸Mulaliekhwo kata okhutiilakhwo khunyama yatsio nitsifwile tawe, shichila netsiomusilo.

⁹“Munyala okhuliakhwo tsinyeni noho shiosi shiosi eshimenyanga munyanza noho mumuchela eshili namakhambaya nende eshibehe.

¹⁰Nebutswa eshindu shiosi eshimenyanga munyanza noho mumwalo, eshilali neshibehe nende amakhambaya ta, mulaliekhwo tawe.

¹¹Ebio nomusilo khwinywe okhubilia. Mulaliekhwo inyama yabio kata okhutiilakhwo khumibili chabio nibifwile tawe, shichilla nebiomusilo khwinywe.

¹²Eshindu shiosi eshimenyanga mumaatsi eshibula eshibehe noho amakhambaya mulaliekhwo ta, shichila neshiomusilo.

¹³“Khandi amanyonyi kaloondakhwo kano nakomusilo, kalalibwakhwo tawe; indutsu, eshikhokorelo, lihuutsilo,

¹⁴eshikhupi, olukakha nende tsimbia tsialwo shinga olwa tsili,

¹⁵likhokho netsimbia tsialio shinga olwa tsili,

¹⁶lihuto, imbukambuka, inyanje, lihungu netsimbia tsialio shinga olwa tsili,

¹⁷likhuule, namulobi, liyichichi,

¹⁸ifitibili, imware, ingosia,

¹⁹likuyi, linakha netsimbia tsialio shinga olwa tsili, lihutihuti nende linyinya.

²⁰“Ebikukule biatsimbaha ebimoolanga nebilenje bine nomusilo khwinywe okhulia.

²¹Nebutswa mubikukule ebio munyala okhulia ebiruka rukanga.

²²Khubio mulitsenje ebilondakhwo bino; tsisiche netsimbia tsiatsio shinga olwa tsili, obwonya netsimbia tsiabwo shinga olwa tsili, mahalang'ang'a netsimbia tsiabio shinga olwa tsili, amatete netsimbia tsiako shinga olwa tsili.

²³Nebutswa ebikukule bindi biosi ebiebilenje bine nomusilo khwinye okhulia.

²⁴“Omundu yesi yesi outiila khunyama yetsisolo tsifwile butswa alaba owomusilo okhuula khungoloobe.

²⁵Naye ouchinga inyama yatsio, okhuula yosie ebifwalobie, khandi alaba owomusilo okhuula khungoloobe.

²⁶Buli isolo eyetsindekeyi tsiayo tsilakabukhanilamwo elala ta, noho eyilanyanyanga ikamuula ta, neyomusilo khwinywe okhulia. Omundu yesi ouchitilakhwo aba owomusilo.

²⁷Khandi tsisolo tsiosi etsichendelanga ebikhumbu, mutsisolo etsichendanga khubilenje bine, tsiosi netsiomusilo khwinywe. Omundu yesi outiila khunyama yatsio aba owomusilo okhuula khungoloobe.

²⁸Naye ouchingakhwo khunyama yatsio, okhuula yosie ebifwalobie, khandi alaba owomusilo okhuula khungoloobe. Etsio tsiosi netsiomusilo khwinywe.

²⁹“Ne mutsisolo tsimoolanga khushialo, tsino netsiomusilo khwinywe; ifukho, akhabuuto, lihumbachila netsimbia tsialio,

³⁰libiakala, ikwena, libiakala eliomulwanda, lisiakali nende likhaniafu.

³¹Etsio tsiosi khutsimoolanga khwiloba netsiomusilo khwinywe. Omundu yesi outsiliakhwo nitsifwile aba owomusilo okhuula khungoloobe.

³²Ne ndala khutsisolo tsino niyikwa khushindu shiosi niyifwile, eshindu eshio shilaba eshiomusilo. Shibe nishiakasibwa okhurula khulubao, noho khushifwalo, noho liseelo noho likunia, noho shiosi shiosi eshikhonyelungwa munjila yosi yosi, okhuula shirebwe mumaatsi. Ne shiba eshiomusilo okhuula khungoloobe, ne shiba eshisiiye.

³³Ne isolo yosi yosi khutsio niyikwa munyungu niyifwile, eshindu shiosi eshilimwo shikwa eshiomusiolo, khandi okhuula inyungu eyo yaarwe.

³⁴Eshiokhulia shiosi shiosi eshili munyungu eyo, kata amaatsi kalimwo biosi nebiomusilo.

³⁵Khandi eshindu shiosi eshieshitonye shieinyama yetsisolo tsifwile etsio shikwakhwo, shilaba eshiomusilo; libe lichiiko noho amayika, okhuula shiarwe shitubulwe mubitonye. Ebindu ebio bilaba ebiomusilo kata khwinywe.

³⁶Nebutswa isebele noho liyabo elilimwo amaatsi lilaba lisiiye; Halali eshindu shindi shiosi eshitila khunyama yetsisolo etsio shilaba eshiomusilo.

³⁷Ne inyama yatsio yosi yosi niyiba niyikwa khu imwo eyitsitsanga okhurakwa, imwo eyo neyindayi.

³⁸Nebutswa imwo eyo niyinikhwa mumaatsi mana eshitonye shieinyama yeyisolo yifwile eyo nishikwakhwo, imwo eyo yiba eyomusilo.

³⁹“Ne isolo yosi yosi eyokhulibwa niyifwa, omundu yesi outiila khunyama yayio aba womusilo okhuula khungoloobe.

⁴⁰Naye oulia inyama eyo, okhuula yosie ebifwalobie, nebutswa alaba owomusilo okhuula khungoloobe. Omundu yesi ouchinga eshitonye shieyinyama eyo okhuula yosie ebifwalobie, khandi alaba owomusilo okhuula khungoloobe.

⁴¹“Mulaliekhwo eshindu shiosi eshiselaselanga khushialo tawe, neshiomusilo khwinywe.

⁴²Eshindu shiosi eshichendanga khulwa okhwikhwesa neinda, noho nebilenje bine, noho eshili nebilenje ebinji, nende ebiselaselanga khwiloba, nebiomusilo mulabiliekhwo tawe.

⁴³Mulekholakhwo abeene okhuba abomusilo khulwa okhulia eshindu shiosi shiosi eshiselaselanga khushialo tawe. Khandi muleyonoonia abeene khulwa okhulia ebindu ebio tawe. Nimukhola murio mulaba abomusilo.

⁴⁴Isie OMWAMI Nyasaye, nisie Nyasaye wenywe, khulweshio mwisiiye abeene mana mube abatakatifu shichila isie omwene endi omutakatifu. Muleyonoonia abeene khulwa okhulia isolo yosi eyimoolanga khwiloba tawe.

⁴⁵Nisie OMWAMI Nyasaye owamurusia mushialo shia Misiri, mbu embe Nyasaye wenywe. Khulweshio okhuula mube abatakatifu shichila isie endi omutakatifu.”

⁴⁶Lino nilio lilako elilondana netsisolo, amanyonyi nende eshilonje shiosi shiosi eshilamu eshichendelanga mumaatsi nende buli eshilonje eshiselaselanga khushialo,

⁴⁷okhuula mulikhonyele okhwahukhasia ebindu ebiomusilo nende ebilali ebiomusilo ta, khandi ebilonje ebili nobulamu ebia munyala okhulia nende abilamu ebia mulanyala okhulia tawe.