Read wanga ABALAWI 13 Bible Online

ABALAWI 13 - wanga bible

ABALAWI 13

¹OMWAMI Nyasaye yalachilisia Musa nende Haroni ari,

²“Omundu yesi yesi naba nafimba eshikhoba noho naba nelibure noho likonzo khumubilikwe ne likonzo elo nilikhola obulwale bwobuchele, omundu oyo okhuula areerwe imbeli wa Haroni omwisaaliisi noho mulala khubasianibe abesaaliisi.

³Ne omwisaaliisi ahenjelesie obulayi likonzo elili khumubilikwe elo; nanyoola mbu amanywa akali mwikonzo elo kakalukhaane okhuba amalafu, khandi obulwale buulile likhoba liomukari liomubilikwe kho buba nobulwale bwobuchele. Owisalisi oyo arumbule omundu oyo okhuba owomusilo.

⁴Nebutswa likonzo elo, niliba nilili lilafu khandi nililolekha khwikhoba, nililaliile mukari ta, khandi amanywa akali mwikonzo elo nikalakalukhane okhuba amalafu ta, kho omwisaaliisi yekalile omundu oyo munzu yenyene khulwa tsinyanga musafu.

⁵Mana omwisaaliisi khandi amuhenjelesia obulayi khunyanga ya musafu, ne nalola mbu, obulwale obwo bwakamile aha bwali, shibumeetile okhulaanda khwikhoba ta, kho omwisaaliisi amwikalile munzu khulwa tsinyanga tsindi musafu.

⁶Mana omwisaaliisi khandi amuhenjelesie obulayi khunyanga yomusafu, ne likonzo elo niliba nilihonanga nililalaandala khwikhoba ta, kho omwisaaliisi arumbulile abandu mbu, omundu oyo nomusiiyikhu; okhuba shiba neshikwesi butswa. Ne omundu oyo okhuula yoosie ebifwalobie kho abe omusiiyikhu.

⁷Nebutswa likonzo elo niliba nililaandaala khwikhoba olunyuma lwomwisaaliisi okhurumbula mbu nomusiyikhu okhuula khandi omundu oyo akalushe khumwisaaliisi.

⁸Omwisaaliisi amuhenjelesie obulayi, ne likonzo elo niliba nililaandalile khwikhoba, kho omwisaaliisi arumbule omundu oyo okhuba owomusilo, shichila ali nobuchele.

⁹“Omundu yesi yesi natiilwa nobuchele, okhuula areerwe khumwisaaliisi.

¹⁰Omwisaaliisi amuhenjelesie obulayi okhulola obufimbe obulafu nibuba nibuli khwikhoba obukalukhasiye amanywa okhuba amalafu khandi nibuba nibwitsulemwo amafila, kho buba nobuchele obulanyala okhuhona tawe.

¹¹Ne obuchele obwo nibuba nibulaanda khwikhoba, kho omwisaaliisi arumbule omundu oyo okhuba owomusilo, khandi shialamwikalila munzu khulwa tsinyanga musafu ta, shichila amalile okhumanyikha mbu nowomusilo.

¹²Nebutswa obuchele obwo nibuba nibuli butswa khushikhoba, ne nibwalaandaala khumubilikwe kwosi okhurula khushilenje okhuula khumurwe,

¹³omwisaaliisi amuhenjelesie khandi obulayi. Ne nanyoola mbu toto bulaandile khumubilikwe kwosi, arumbule omundu oyo okhuba omusiiyikhu. Likhoba liomubilikwe kwosi niliikholile lilafu, aba ali omusiyikhu.

¹⁴Nebutswa naba nalolekha shinga oushinyeenyeeshe amakonzoke, kho aba ali owomusilo.

¹⁵Omwisaaliisi alamuhenjelesia khandi, ne nalola omubili nikushinyeenyeeshe, alamurumbula okhuba owomusilo shichila ali nobuchele.

¹⁶Nebutswa likhoba nilichaaka okhuhona nilikalukhana khandi liakwa lilafu, kho omundu oyo akalushe khu mwisaaliisi.

¹⁷Omwisaaliisi okhuula amuhenjelesie obulayi khandi; obulwale obwo nibuba nibukalukhaane okhuba obulafu, kho omwisaaliisi arumbule omundu oyo okhuba omusiiyikhu.

¹⁸“Omundu naba nelibure eliamala okhuhona,

¹⁹ne olunyuma obufimbe obulafu noho oburatsayi burulile habundu tsana ahelibure liali yaho, okhuula atsie khumwisaaliisi.

²⁰Naye omwisaaliisi amuhenjelesie obulayi, ne obufimbe obwo nibulolekha nibutomooshe mwikhoba mukari, khandi amanywa nikakalukhaane nikakwile amalafu, kho omwisaaliisi arumbule omundu oyo okhuba owomusilo, shichila buba nobuchele niburulile mwibure.

²¹Nebutswa omwisaaliisi nahenjelesia, ne nalola mbu amanywa kelikhoba shikakalukhaane okhuba amalafu ta, khandi libure elo shilitomooshe mwikhoba mukari ta, habula nahatutu butswa, kho omwisaaliisi yekalile omundu oyo khulwa tsinyanga musafu.

²²Ne nibwakhalandaala khwikhoba omwisaaliisi okhuula arumbule omundu oyo okhuba owomusilo shichila nowobuchele.

²³Nebutswa eshikwesi eshio nishitong'a butswa habundu yaho honyene, shiba shili butswa imbala yelibure, kho omwisaaliisi okhuula arumbule omundu oyo okhuba omusiiyikhu.

²⁴“Omundu naba niyesamba omubili, ne ahasambilwe aho nihekhola eshikwesi, eshiranzayi noho eshilafu,

²⁵omwisaaliisi okhuula ashihenjelesie obulayi. Ne amanywa okokhushikwesi eshio nikakalukhana okhuba amalafu, khandi habundu tsana aho nihatomookha mukari mwikhoba, kho buba nobuchele oburulile mushikwesi eshio. Omwisaaliisi arumbule omundu oyo okhuba owomusilo, shichila ali nobulwale bwobuchele.

²⁶Nebutswa amanywa keshikwesi eshio nikalakalukhaane okhuba amalafu ta, khandi nishilatomooshe mwikhoba mukari ta, habula nishihwelelelanga, kho omwisaaliisi amwikalile munzu khulwa tsinyanga musafu.

²⁷Mana omwisaaliisi khandi amuhenjelesie khunyanga yomusafu, nanyoola eshikwesi eshio nishilandalaanga mwikhoba, omwisaaliisi okhuula arumbule omundu oyo okhuba owomusilo shichila ali nobuchele.

²⁸Nebutswa eshikwesi eshio nishitong'a butswa halala aho, ne nishilalandaala khwikhoba ta, nishihwelelelanga, buba buli obufimbe obwa habundu ahasambilwe, kho omwisaaliisi arumbule omundu oyo okhuba omusiiyikhu, shichila yiba neimbala eya ahasambilwe yaho.

²⁹“Omusaatsa noho omukhasi naba nobufimbe khumurwe noho khushinanwa,

³⁰omwisaaliisi abuhenjelesie obulayi, ne nibuba nibutomooshe mwikhoba mukari, ne khandi amanywa akaliho nikakalukhaane okhuba mayayi khandi nikanyelehaale, omwisaaliisi arumbule omundu oyo okhuba owomusilo shichila ali nobuchele bwokhumurwe noho bwokhushinanwa.

³¹Ne omwisaaliisi nahenjelesia obulwale obwo, ne nibulolekha okhuba nibulatomooshe mwikhoba mukari ta, khandi amanywa nikalali amamali ta, kho omwisaaliisi okhuula yekalile omundu oyo khulwa tsinyanga musafu.

³²Mana omwisaaliisi khandi ahenjelesie omundu oyo khunyanga yamusafu, ne obufimbe obwo nibuba nibulalandalile khwikhoba ta, khandi amanywa kamayaayi nikalaliho ta, khandi amayaayasi nikalatomooshile mukari okhushila likhoba ta,

³³kho omundu oyo yebeche omwene, nebutswa alabeka habundu ahakalukhane mayaayi yaho tawe. Mana omwisaaliisi yekalile omundu oyo khulwa tsinyanga tsindi musafu.

³⁴Ne khunyanga yamusafu, omwisaaliisi ahenjelesie amayaayasi ako, ne nikaba nikalalandalile kwikhoba ta, khandi nikalalolekhanga okhuba nikatomooshile mukari mwelikhoba ta, omwisaaliisi arumbule omundu oyo okhuba omusiiyikhu. Omundu oyo yosie ebifwalobie, ne aba omusiiyikhu.

³⁵Nebutswa amayaayasi nikaba nikalandaala khwikhoba olunyuma lwokhwisiiyakhwe,

³⁶kho omwisaaliisi okhuula amuhenjelesie obulayi khandi, ne amayaayasi nikasalanile khwikhoba, omwisaaliisi shiakhoyile okhukhaaba khandi mbu, alole amanywa kamayayi tawe, omundu oyo nowomusilo.

³⁷Nebutswa omwisaaliisi nalola mbu, amayaayasi shikalandalile ta, khandi amanywa kaliho namamali, amayaayasi ako kaba kahonile. Omundu oyo aba nomusiiyikhu. Kho omwisaaliisi okhuula amurumbule omundu oyo okhuba omusiiyikhu.

³⁸“Omusaatsa noho omukhasi naba nali nebipala ebilafu khwikhoba liomubilikwe,

³⁹omwisaaliisi okhuula ahenjelesie ebipala ebio obulayi. Ne nibiba nibili ebilafu hatiiti, kho shiba neshikhombamoosi eshirulile mwikhoba butswa, omundu oyo aba nomusiiyikhu.

⁴⁰“Liiswi liomundu niliba niliakhweyukha kumurwekwe, khandi omundu oyo nali neshiole aba omusiiyikhu.

⁴¹Khandi liswi liomundu niliba niliakhweyukha habweni, omundu oyo ali neshiole eshiomubweni nebutswa nomusiiyikhu.

⁴²Nebutswa amayaayasi amatsayi nikaba nikali khushiole noho khubweni, buba nobuchele oburulilile khushiole noho khubweni.

⁴³Omwisaaliisi okhuula amuhenjelesie obulayi, ne obufimbe obwo nibuba nibuli oburanzayi khushiole noho mubweni, obufwana shinga obuchele bwokhwikhoba liomubili,

⁴⁴omundu oyo ali nobuchele, ne aba nowomusilo. Omwisaaliisi okhuula amurumbule okhuba owomusilo shichila obulwalebwe buli khumurwe.

⁴⁵“Omundu ouli nobuchele okhuula yefwale ebifwalo ebiarandukha, khandi aleshe liiswilie nilisakushile, khandi okhuula yefunishe omunwa kweikulu, mana alanjilisinjie obutinyu ari, ‘Owomusilo! Owomusilo!’

⁴⁶Oluhono olwa ashililwala obuchele obwo alatong'a owomusilo. Okhuula amenye yenyene elwanyi weikambi.

⁴⁷“Likhwe liobuchele niliba khushifwalo, shibe eshiobwoya bwamakondi noho shieikitani,

⁴⁸noho khungubo yeikitani noho yobwoya bwamakondi noho yeliseelo,

⁴⁹ne nililolekha okhuba liobukondo bwamasafu amabisi noho oburanzayi, kho buba nobuchele. Likhwe elo okhuula limanyibwe omwisaaliisi.

⁵⁰Naye omwisaaliisi ahenjelesie likhwe elo obulayi, mana yekalile eshindu eshio khulwa tsinyanga musafu.

⁵¹Ne khunyanga yamusafu, omwisaaliisi ahenjelesie eshifwalo eshio obulayi khandi, nanyoola nibulandalile mushifwalo eshio, kho buba nobuchele obunyenya. Eshifwalo eshio shiba eshiomusilo.

⁵²Omwisaaliisi okhuula asambe eshifwalo eshio mumulilo shichila buba nobuchele bwokhuhafania, kho okhuula busambwe nomulilo.

⁵³“Nebutswa omwisaaliisi nahenjelesia eshifwalo eshio obulayi, ne nanyoola mbu, obulwale obwo shibulandalile khushifwalo eshio ta,

⁵⁴alachilisie abandu okhwosia eshifwalo eshio, mana ashikalile khulwa tsinyanga tsindi musafu.

⁵⁵Mana omwisaaliisi ahenjelesie obulayi eshifwalo shiobuchele eshio olunyuma lwokhwosibwa. Ne habundu helikhwe elio liali nihaba nihalakalukhane ta, kata obuchele obwo nibulalandile ta, eshifwalo eshio neshiomusilo. Okhuula eshifwalo eshio shisambwe mumulilo, kata habundu yaho nihaba nihali enamukongo noho imbeli washio.

⁵⁶Nebutswa omwisaaliisi naba nashihenjelesia, ne nanyoola mbu, obulwale obwo buhwelelelanga, okhuula arandule narusia aha likhwe elo libele khushifwalo eshio noho khwiseelo elo.

⁵⁷Ne likhwe elo niliba nililokha khandi khushifwalo eshio, buba bulandalaanga, omwene eshifwalo shio okhuula ashisambe mumulilo.

⁵⁸Nebutswa naba niyosia eshifwalo eshio, ne likhwe elo nilihwamwo, okhuula ashiosie khandi olwakhabili, ne shiba eshisiiyishe.”

⁵⁹“Elio nilio lilako okhulondana nende likhwe liobuchele elili khushifwalo, shibe eshiobwoya bwelikondi, noho eshieikitani, noho mushindu shiosi eshialukha khwiseelo. Nilio eliamulekhoonyelanga okhwaukhasia hakari weshindu eshisiiye nende eshiomusilo.”