Read wanga ABALAWI 14 Bible Online

ABALAWI 14 - wanga bible

ABALAWI 14

¹OMWAMI Nyasaye nalachilisia Musa naboola ari,

²“Lino nilio lilako liomundu ouhonile obuchele. Khunyanga eya arumbulwa okhuba omusiiyiye, areerwe khumwisaaliisi,

³naye omwisaaliisi arule ninaye elwanyi weikambi amuhenjelesie obulayi. Ne omundu oyo naba nahonile obuchele,

⁴omwisaaliisi alache bareerele omundu oyo amanyonyi amasiiyikhu kabili nende eshitonye shiomusaala kwomusiita, nende omukoye omuranzayi nende eshiangwe.

⁵Mana omwisaaliisi alache abandu abo basinze elala khumanyonyi kabili ako khushikaye eshielitoyi eshilimwo amaatsi akomwalo kubiranga.

⁶Omwisaaliisi abukule linyonyi lindi elo, neshitonye shiomusaala kwomusiita, nende omukoye omuranzayi okwo nende eshiangwe, abire biosi mumalasile kelinyonyi lisinzilwe elo.

⁷Mana omwisaaliisi ahanye amalasile ako okhuula musafu khumundu usiiyishe obuchele oyo, mana arumbule omundu oyo okhuba omusiiyishe. Ne linyonyi lindi elo alisukune mumuya lipurushe litsie mubulimo.

⁸Omundu oyo okhuula yosie ebifwalobie, abeche liswilie liosi, mana yesinje mumaatsi, kho abe omusiiyikhu. Olunyuma lwako akalushe mukambi, nebutswa okhuula amenye elwanyi weliheemalie tsinyanga musafu.

⁹Khunyanga yamusafu okhuula abeche liswilie, tsindefutsie, ebisichebie nende liswi lindi liosi liosi khumubilikwe. Mana yosie ebifwalobie, yesinje mumaatsi, ne aba omusiiyikhu.

¹⁰“Ne khunyanga yomunane omundu oyo okhuula areere amakondi amamiiku kabili nende lisubini elala akomuyika mulala akabulakhwo obuleema bwosi bwosi. Khandi areere obusie obunyushe obuhela tsikilo tsibili neinusu obutsokasiibwemwo amafura akahela ilita ndala neinusu khulwa omusango okweimele.

¹¹Ne omwisaaliisi abukule omundu oyo, amuleere nende ebindu biatsana ebio habwinjililo weliheema lianje litakatifu.

¹²Omwisaaliisi oyo abukule elala khumakondi amamiiku ako, nende amafura akahela inusu yelita abihane okhuba omusango kweshikha. Abichele shinga omusango kwokhuchelwa okuhanilwe isie OMWAMI Nyasaye.

¹³Mana omwisaaliisi asinze likondi elo habundu hatakatifu ahabasinzilanga omusango kwobwonooni nende omusambe. Okhuula akhole ario shichila shinga lwomusango kwobwonooni kuli okwomwisaaliisi nolwa omusango kweshikha kwosi kuli kurio okukwe; nomusango omutakatifu.

¹⁴Mana omwisaaliisi abukule khumalasile akomusango kweshikha ako, akabashe khubutsunzu bweshirwi eshisaatsa eshiomundu ousiiyungwa oyo, nende khulwala olukhongo lwomukhonokwe omusaatsa, nende olwala olukhongo lweshilenjeshie eshisaatsa.

¹⁵Mana omwisaaliisi abukulekhwo amafura ako akatsushe mushikalaboshie eshiomukhono mukhasi,

¹⁶ne yena olwalalwe lwomukhono musaatsa mumafura ako nahanyakhwo matiiti khuko, okhuula musafu khuliheema lianje litakatifu.

¹⁷Ne abashe amafura akatong'a mushikalabo nende amalasile akomusango kweshikha khubutsunzu bweshirwi eshisaatsa shiomundu ousiiywa oyo nende khulwala olukhongo lwomukhonokwe omusaatsa, nende khulwala olukhongo lweshilenjeshie eshisaatsa.

¹⁸Ne amafura katong'a mushikalabo shiomukhonokwe, akare khumurwe kwomundu ousiiywa oyo. Mana munjila eyo nolwa omwisaaliisi alatisa omundu oyo khulwa okhumusiiya.

¹⁹“Omwisaaliisi okhuula ahaane omusango kwobwonooni, mana atise omundu oyo. Ne olunyuma asinze likondi eliomusango omusambe.

²⁰Omwisaaliisi oyo okhuula akhole omusango omusambe nende okweimele khushimalilo shiemisango. Munjila eyo nolwa omwisaaliisi alakholela omundu oyo eshitiiso kho abe omusiiyikhu.

²¹“Nebutswa omundu oyo naba nali omumanani, ne nalanyalilwa okhunyoola ebindu ebinji ebio ta, kho areere likondi limiiku elala eliomusango okweshikha, lichelwe khulwa okhumutisa. Areere khandi ikilo ndala yobusie obunyushe, obutsokasiibwemwo amafura khulwa omusango kweimele, nende amafura kahela inusu yeilita.

²²Areere amahusi kabili noho amakuuku shinga olwa anyalilwa. Elala khuko lilaba eliomusango kwobwonooni, nelindi eliomusango omusambe.

²³Ne khunyanga yomunane omundu oyo okhuula akareere khumwisaaliisi habwinjililo weliheema lianje litakatifu khulwa okhusiiyakhwe.

²⁴Ne omwisaaliisi abukule likondi elo nende amafura ako akachele khulwa omusango kwokhuchelwa imbeli wanje isie OMWAMI Nyasaye.

²⁵Mana asinze likondi liomusango kweshikha, ne abukulekhwo khumalasile akomusango kweshikha nakabakha khubutsunzu bweshirwi eshisaatsa shiomundu owokhusiiywa oyo, nende khulwala olukhongo lwomukhono musaatsakwe, nende olwala olukhongo olweshilenje eshisaatsashie.

²⁶Ne omwisaaliisi abukulekhwo khumafura ako mushikalabo shiomukhonokwe omukhasi,

²⁷mana akahanye nolwalalwe lusaatsa okhuula musafu imbeli weliheema lianje.

²⁸Mana omwisaaliisi khandi abukule khumafura akali mushikalaboshie nakabakha khubutsunzu bweshirwi eshisaatsa eshiomundu owokhusiiywa oyo, nende khulwala olukhongo lwomukhonokwe omusaatsa nende khulwala olukhongo lweshilenjeshie eshisaatsa, habundu hosi ahabashile amalasile akomusango okweshikha.

²⁹Ne amafura katong'a akali mushikalaboshie, akabashe khumurwe okwomundu oyo khulwa okhumukholela eshitiiso imbeli wanje.

³⁰Mana omwisaaliisi ahane elala khumahusi noho khumakuuku amaraka ako shinga lwomundu oyo aba nanyalilwe.

³¹Elala libe khulwa omusango khwobwonooni nelindi eliomusango omusambe, halala nende omusango okweimele. Munjila eyo nolwa omwisaaliisi alakhole eshitiso shiomundu ousiiyungwa oyo.

³²Lino nilio lilako elilondana nomundu oulanyala okhunyoola ebikhoyile khulwa emisango chiokhusiiywa tawe.”

³³OMWAMI Nyasaye naboolela Musa nende Haroni ari,

³⁴“Olwa mwinjila mushialo shia Kanani, eshia emuhelesinjia mbu shibe eshienywe, mana endeere obulwale bwobuchele munzu yosi yosi eyomushialo eshio,

³⁵okhuula mwene inzu eyo atsie alole omwisaaliisi. Mana amuboolele ari ‘obulwale bwobuchele bufwana obuli munzu yanje.’

³⁶Kho omwisaaliisi alalachilisie mbu bayinie ebindu biosi munzu eyo, nashili okhutsia okhuhenjelesia obulwale obwo. Nibalakhola bario ta, buli shindu shili munzumwo shilarumbulwa okhuba eshiomusilo. Mana olunyuma lwokhukhola bario omwisaaliisi oyo atsie yenjile munzu omwo achihenjelesie obulayi.

³⁷Omwisaaliisi ahenjelesie obulwale obwo, ne ebipala biobukondo bwamasafu amabisi noho biranzayi nibilolekha nibili mumasiisi keinzu eyo,

³⁸kho omwisaaliisi yekale inzu eyo khulwa tsinyanga musafu.

³⁹Omwisaaliisi akalushe khandi khunyanga yamusafu okhuchihenjelesia, ne obulwale obwo nibuba nibusalanile mumasiisi keinzu eyo,

⁴⁰kho omwisaaliisi alachilisie mbu balikulule amachina akobulwale obwo bulikhwo, nibakasukuna habundu ahomusilo elwanyi welitookho.

⁴¹Mana lwako alache bahalakare lisiisi liomukari mweinzu eyo yoosi. Ne amaloba kabahalakarakhwo ako bakafube habundu ahomusilo elwanyi welitookho.

⁴²Mana babukule amachina kandi bakare mubukono bwamachina karusibwe ako, mana bareresie inzu eyo.

⁴³“Obulwale obwo nibubuukha khandi munzu eyo olunyuma lwokhurusia amachina, nende okhuchihalakara nende okhuchireresia,

⁴⁴omwisaaliisi atsie achihenjelesie obulayi. Ne obulwale obwo nibuba nibusalaanile munzu, kho buba nobuchele obunyenyanga khunzu okhwo. Inzu eyo yiba neyomusilo.

⁴⁵Okhuula mweneyo alikulule inzu eyo, ne amachina kayo koosi, netsimbao tsiayo tsiosi, neliloba liabahalakarekhwo liosi akachinje nakayila habundu homusilo elwanyi welitookho.

⁴⁶Okhumeetakhwo, omundu yesi owinjila munzu eyo niyishiikalwe aba owomusilo okhuula khungoloobe khweinyanga eyo.

⁴⁷Omundu yesi yesi owiyalisia mubwelu bweinzu eyo noho oulilamwo eshiokhulia okhuula yosie ebifwalobie.

⁴⁸“Nebutswa omwisaaliisi niyetsa nahenjelesia, ne nalola mbu obulwale shibusalanile munzu, olunyuma lweinzu okhureresibwa ta, kho omwisaaliisi arumbule inzu eyo okhuba yisiiye, shichila obulwale obwo buba buhwele.

⁴⁹Ne khulwa okhusiiya inzu eyo, omwisaaliisi okhuula abukule amanyonyi amatiiti kabili, omusaala kwomusiita, eshitasi eshiranzai nende eshiangwe,

⁵⁰mana asinze elala khumanyonyi ako khushikaye shielitoyi eshilikhwo amaatsi akomwalo.

⁵¹Mana abukule omusiita okwo, neshiangwe nende eshitasi eshiranzayi halala nelinyonyi elo mana abire biosi mumalasile kelinyonyi lisinzilwe khumaatsi akomwalo ako. Omwisaaliisi ahanye amalasile ako khunzu eyo okhuula musafu.

⁵²Munjila eyo nolwa omwisaaliisi alasiiya inzu eyo namalasile akelinyonyi elo, khumaatsi akomwalo, nelinyonyi lilamu elo, nomusiita, neshiangwe nende eshitasi eshiranzayi eshio.

⁵³Mana omwisaaliisi afuube linyonyi lilamu elo lipurushe okhurula mwitookho nilitsia. Munjila eyo nolwa omwisaaliisi alatisa inzu eyo nayo niyisiikha.

⁵⁴“Lino nilio lilako lieshindu shiosi shiosi eshiobuchele; bube obunyenyanga,

⁵⁵obuli khubifwalo noho munzu.

⁵⁶Khandi eliokhufimba khwomubili, okhwelikhoba noho eshikwesi.

⁵⁷Lilako lino nilio elitsa okhumanyisinjia eshindu nishili eshiomusilo noho eshisiiyikhu.”