Read wanga ABALAWI 17 Bible Online

ABALAWI 17 - wanga bible

ABALAWI 17

¹OMWAMI Nyasaye nalachilisia Musa mbu,

²aboolele Haroni nabasianibe nende abandu boosi aba Isiraeli mbu, balinde amalako kaloondakhwo kano.

³“Omuisiraeli yesi yesi naba niyasinzila ing'ombe kata likondi kata imbusi mukambi, noho elwanyi weikambi,

⁴ne nalachireera habwinjililo weliheema lianje litakatifu khulwa okhuchihana shinga eshihaanwa khwisie ta, omundu oyo aba neshikha eshiamalasile akaraatsiye; okhuula omundu oyo arusibwe mubaisiraeli.

⁵Eshisina shielilako elo shili mbu, abandu ba Isiraeli okhuula bandeerere emisango chiabwe chiabaasinzila mushikuri habulafu. Bulano okhuula bachireerenje, khumwisaaliisi habwinjililo weliheema litakatifu nende okhuchisinza shinga emisango echiokhureera omulembe.

⁶Mana omwisaaliisi okhuula ahaanye amalasile tsimbeka tsiosi tsieshimalilo shiemisango eshili habwinjililo weliheema litakatifu, nende okhusamba amasinya akareera isakakha eyinjamisia isie OMWAMI Nyasaye.

⁷Kho balabakhwo abakhayi khwisie khulwa okhwirira emiruko chiabwe ebulafu mushibakala okhuba shinga emisango khubanyasaye bandi tawe. Abandu ba Isiraeli okhuula balinde lilako lino buli lwosi.

⁸“Omuisiraeli yesi, kata abe omurende oumenyanga mubo, oukholela omusango omusambe kata omusango kweshihanwa shiosi shiosi ebulafu mushibakalo,

⁹ne nalakureera habwinjililo weliheema lianje litakatifu ta, omundu oyo okhuula aloondwe okhurula muluyia olwa Abaisiraeli.

¹⁰“Omundu yesi omuisiraeli noho omurende oumenyanga mubo ouliakhwo amalasile, ndalamuhelesia eshinyasio khandi shialabasilibwa mubandu banje tawe.

¹¹Obulamu bweshilonje shiosi shiosi buli mumalasile, niko akachila isie OMWAMI Nyasaye ndalachilisia mbu, amalasile kaleerungwe khushimalilo shiemisango okhuyiniaho obwonooni bwabandu. Shichila amalasile niko akayininjiaho obwonooni.

¹²Niko akachila nelachilisia abandu ba Isiraeli mbu, omundu yesi khubo kata omurende oumenyanga mubo alaliakhwo inyama eyilarusibwemwo amalasile tawe.

¹³“Omundu yesi omuisiraeli kata abarende bamenya mubo, ouyiima isolo yosi yosi, kata linyonyi liokhulibwa, okhuula asinze nataatsia amalasile kalio elwanyi nakabuka neliloba.

¹⁴Obulamu bwa buli eshilonje buli mumalasile kashio, niko akachila nendachilisia abandu ba Isiraeli mbu balaliakhwo inyama eyilarusibwemwo amalasile tawe. Ne omundu yesi oulia amalasile ako, shialaba mulala khubandu banje tawe.

¹⁵“Ne Omuisiraeli yesi noho omurende oulia eshindu shiosi eshifwile butswa noho eshirirwe neyisolo, okhuula yosie ebifwalobie khandi yesinje omubilikwe mumaatsi, ne alaba owomusilo okhuula khungoloobe inyanga eyo.

¹⁶Nebutswa naba nalosia ebifwalobie ta, khandi nalesiinga omubilikwe ta, okhuula alanyoola eshinyasio.”