Read wanga ABALAWI 18 Bible Online

ABALAWI 18 - wanga bible

ABALAWI 18

¹OMWAMI Nyasaye nalachilisia Musa ari,

²“Boolela abandu ba Isiraeli mbu, isie nisie OMWAMI Nyasaye wenywe.

³Mulakholekhwo ebikhole ebia Abamisiri bakholanga, noho ebiabandu bamenyile mushialo eshiemuyilangamwo shia Kanani bakholanga tawe. Mulalondekhwo amalako kabwe tawe.

⁴Muloonde amebaalo kanje nimulinda amalako aka emulachilisinjia. Nisie OMWAMI Nyasaye wenywe.

⁵Okhuula mulinde amebaalo kanje nende amalako kanje, khulwa okhukakhola murio nolwa mulabaho abalamu. Nisie OMWAMI Nyasaye.”

⁶OMWAMI Nyasaye yalachilisia amalako kano naboola ari, “Shiolayinakhwo nomwikhowo yesi yesi tawe.

⁷Shiolafimbia papawo omurwe khulwa okhuyilana nende mamawo tawe. Ye nimamawo, olayilanakhwo ninaye tawe.

⁸Shiolafimbia papawo omurwe khulwa okhuyilana nende mulala khubakhasibe tawe.

⁹Shiolayilanakhwo nende omukhaana wenywe noho omukhaana wa papawo noho owa mamawo owebulwa hango wenywe noho elwanyi tawe.

¹⁰Shiolayilanakhwo nende omwitsukhuluwo tawe, okhuba oba niwifimbinjia omurwe omwene.

¹¹Shiolayilanakhwo nende omukhaana wa papawo yebula mumukhasi undi ta, shichila yesi nomukhaana wenywe.

¹²Shiolayilanakhwo nende senjewo tawe, shichila ye nomukhaana wabwe papawo ouli omwikhowo.

¹³Shiolayilanakhwo nende omukhaana wabwe mamawo ta, shichila ye nomwikho wamamawo owahambi.

¹⁴Shiolayilanakhwo nomukhasi womusiani wabwe papawo ta, shichila ye nimamawo.

¹⁵Shiolayilanakhwo nomukhasi womusianiwo ta, shichila nomukhasi womwanawo.

¹⁶Shiolayilanakhwo nende omukhasi womusiani wenywe tawe, shichila oba ofimbinjia omusiani wenywe omurwe.

¹⁷Shiolayilanakhwo nomukhasi nende khandi omwanawe omukhaana tawe, kata omwitsukhuluwe tawe, shichila nabekhobo bahambi muno. Abakholanga ako bonoonanga.

¹⁸Shiolayilanakhwo nende abakhaana babo omukhasiwo lwomukhasiwo tsana aba nashiliho mwoyo tawe.

¹⁹“Shiolayilanakhwo nende omukhasi ouli mutsinyangatsie tsiomumwesi tawe, okhuba nowomusilo.

²⁰Shiolayilanakhwo nende omukhasi womusaatsa washio tawe, shichila olaba womusilo.

²¹Shiolahaanakhwo omwanawo mbu ahaanwe shinga omusango khumunyasaye Moleki tawe, shichila eshio shilaba eshifimbwa murwe khuliira lianje, isie OMWAMI Nyasaye.

²²Shiolayilanakhwo nende omusaatsa washio tawe, olwo noluswa.

²³Omusaata yesi yesi shialoyilanakhwo nende isolo yosi yosi ta, okhuba oba wiyonooninjia omwene. Kata omukhasi yesi yesi shialehaanakhwo mbu akone neisolo yosi yosi tawe; okhuba olwo noluswa.

²⁴“Shimuleyonoonia abeene khulwa okhukhola ako ta, shichila amahanga aka enondanga okhurula imbeli wenywe keyonoonia khulwa okhukhola ako.

²⁵Ebikhole biabwe bionooninjia eshialo, niko akachila ehelesinjia abandu beshialo eshio eshinyasio nende okhubaloonda mbu barulemwo.

²⁶Nebutswa okhuula mwesi nende abarende abamenyanga mwinywe mulinde amalachilisio kanje nende amalako kanje. Shimulakholakhwo kata elala khukoluswa ako tawe.

²⁷Abandu bamuranjilila okhumenya mushialo eshio bakhola akoluswa ako nibonoonia eshialo eshio.

²⁸Nimukhola ako ndalamuloba shinga olwa ndaloba abamuranjilila inywe okhumenya mushialo eshio.

²⁹Omundu yesi oukholakhwo kata elala khukoluswa ako okhuula arusibwe muboluyia lwa Abaisiraeli.

³⁰“Khulweshio, mulinde amalako aka emulachilisiye kano, khandi mulakholekhwo emilukha echiabandu abamuranjilila okhumenya hano bakholanga nimushili okhwitsaho tawe. Shimuleyonooniakhwo abeene khulwa okhukhola elala khwako tawe. Nisie OMWAMI Nyasaye, Nyasaye wenywe.”