Read wanga ABALAWI 20 Bible Online

ABALAWI 20 - wanga bible

ABALAWI 20

¹OMWAMI Nyasaye nalachilisia Musa naboola ari,

²“Boolela Abaisiraeli nende abarende bamenyanga mubo mbu, omundu yesi ouhaana abaanabe khulwa okhukholela omunyasaye Moleki omusango, okhuula yerwe. Abandu boosi balase omundu oyo namachina.

³Nasi omwene ndalabuusia liruma lianje khumundu oyo nende okhumwiira arule mubandu boluyialwe shichila ahanile mulala khubaanabe khulwa okhukholela omunyasaye Moleki omusango, ne niyonoonia habundu wanje hatakatifu nende oluyali lweliira lianje litakatifu.

⁴Ne abandu abomukanda nibalekha butswa omundu oyo okhubaho omulamu, nibalateeba eshia akholile khumunysaye Moleki,

⁵isie omwene emba ndalareera eshinyasio khumundu oyo, nende abeinzuye nende khuboosi abasanjilaane ninaye nibenamila omunyasaye Moleki, nibakhaya okhuba abesiikwa khwisie. Shibalabaakhwo abandu banje tawe.

⁶“Omundu yesi natsia khubetsinyengo noho khubebitsoyelo emba ndalamukalukhanakhwo, nemurusia muluyia lwabandu banje.

⁷Khulweshio mwiyahule abeene mube abatakatifu, shichila endi OMWAMI Nyasaye, Nyasaye wenywe.

⁸Mulinde amalachilisio kanje nende okhukakhola. Nisie OMWAMI Nyasaye oumusiiyanga inywe.”

⁹OMWAMI Nyasaye nalachilisia amalako kano naboola ari, “Omundu yesi oulaama samwana noho nyinamwana eshilaamo shiobubi, okhuula yeerwe, ne eshitsayi eshio shitong'a khuye omwene shichila alaamile abebusibe.

¹⁰“Omusaatsa yesi naheya nomukhasi wowashie, boosi omusaatsa oyo nende omukhasi oyo okhuula berwe.

¹¹Omusaatsa yesi oukona nende omukhasi wasamwana, aba afimbiye samwana omurwe; kho boosi omusaatsa nende omukhasi oyo okhuula beerwe, ne eshitsayi shiabwe shilaba khubo abeene.

¹²Omusaatsa yesi nakona nende omukhasi womusianiwe, boosi okhuula beerwe, shichila bakholile oluswa, eshitsayishie shili khubo abeene.

¹³Omusaatsa yesi nakona nomusaatsa washie shinga oukona nomukhasi, boosi okhuula beerwe, shichila bakholile oluswa, eshitsayi shiabwe eshio shili khubo abeene.

¹⁴Omusaatsa yesi nateeshia omukhasi khandi ateeshie nyinamwana omukhasi oyo, okhuula omusaatsa oyo nende abakhasi babili abo basambwe bafwe khulwa akoluswa akabakholile ako. Mulafuchililekhwo oluswa shinga olwo okhwikholekha mwinywe tawe.

¹⁵Omusaatsa yesi yesi naba nakhola isolo okhuba omukhasi, okhuula yerwe ye halala nende isolo eyo.

¹⁶Omukhasi yesi yesi naba nakhola isolo okhuba omusaatsa, okhuula yerwe, ye nende isolo eyo. Eshitsayishie shili khuye omwene.

¹⁷“Omusaatsa yesi yesi naba nateeshia omukhaana wabwe mwene, noho omukhaana wabwe owomunzu yindi, balafimbibwa omurwe imbeli wabandu, khandi okhuula baloondwe okhurula muboluyia lwabwe. Omusaatsa oyo akonile nomukhaana wabwe, kho okhuula anyoole eshinyasio.

¹⁸Omusaatsa yesi yesi naba nakona nomukhasi ouli mutsinyangatsie tsiomumwesi, boosi babili okhuula bayinibwe muluyia lwabandu babwe, shichila bafunache amalako khu akomusilo.

¹⁹“Omusaatsa yesi yesi nakona nende nyakhusenjenyine noho omukhaana wabwe nyinamwana, boosi babili okhuula banyoole eshinyasio khulwa oluswa lwabakholile olwo.

²⁰Omusaatsa yesi yesi nakona nende omukhasi wakhotsanyine, aba nafimbiye khotsanyine omurwe, omusaatsa oyo nende omukhasi oyo okhuula banyoole eshinyasio, boosi bario balafwa abakumba.

²¹Omusaatsa yesi yesi nateeshia omukhasi womusiani wabwe, omukhasi oyo nende omusaatsa oumuteeshiiye oyo balafwa abakumba. Omusaatsa oyo akholile omusilo, khandi afimbiye omusiani wabwe omurwe.

²²“Okhuula mulinde amalachilisio nende amalako kanje koosi nimukakhola, kho mbu endeshe okhumuloba okhurula mushialo shia Kanani, eshia emuyilangamwo eshio.

²³Khandi mulakholekhwo emilukha echia abamahanga kandi akomushialo eshio bakholanga tawe. Ndalarusia abamahanga abo mushialo eshio, kho mbu mwinjelemwo nimushibukula. Abamahanga abo baasinyisiye muno nebikhole biabwe ebimayanu.

²⁴Nebutswa ndamusubisia, ‘Okhumuhelesia eshialo eshiyinda khandi eshinulu shibe shienywe.’ Nisie OMWAMI Nyasaye Nyasaye wenywe owamwaule okhurula mutsimbia tsiabandu bandi.

²⁵Okhuula mwahukhasie hakari wetsisolo tsisiiyikhu nende etsiomusilo, khandi hakari wamanyonyi amasiiyikhu nende akamusilo. Mulaliekhwo isolo noho linyonyi liosi liosi eliomusilo tawe. Ebio nebiomusilo, nimubiliakhwo, mwesi muba abomusilo.

²⁶Okhuula mube abatakatifu khwisie shichila isie OMWAMI Nyasaye endi omutakatifu, khandi emwaaule inywe okhurula mutsimbia tsiabandu bandi mbu, mube abandu banje.

²⁷Omusaatsa noho omukhasi yesi yesi outsia khubetsinyengo noho abebitsoyelo, okhuula alaswe namachina afwe, ne eshitsayishie shilaba khuye omwene.”