Read wanga ABALAWI 21 Bible Online

ABALAWI 21 - wanga bible

ABALAWI 21

¹Khandi OMWAMI Nyasaye nalachilisia Musa ari, “Boolela abesaaliisi, abasiani ba Haroni mbu, omwisaaliisi yesi khubo aleyonooniakhwo omwene khulwa okhutiila khumulambo komwikhowe oufwiile tawe.

²Okhurusiakhwo nali owomunzu yabwe mwene, shinga nyinamwana noho samwana noho omwanawe omusiani, noho omwanawe omukhaana, noho omusiani wabwe,

³noho omukhaana wabwe oushili okhuteekha shichila ashileetanga khuye.

⁴Omwisaaliisi aleyonoonia omwene khulwa okhusanga mumilukha echiabekhobe abafwiile bewabo amukhasiwe tawe.

⁵Abesaaliisi abo shibalebekakhwo liswi liokhumirwe chiabwe kata okhubeka tsindefu tsiabwe kata okhwisalaka tsisalache khumibili chiabwe tawe.

⁶Okhuula babe abatakatifu khwisie Nyasaye wabwe, ne balonoonia eliira lianje tawe; shichila bakholelanga isie emisango emisambe, echili eshiokhulia shianje. Khulweshio okhuula babe abatakatifu.

⁷Abesaaliisi abo shibalateshiakhwo omukhasi omutamba, noho oulali omushisila ta, kata omukhasi yesi yesi owalekhana nomusaatsawe tawe, shichila omwisaaliisi nomutakatifu khwisie Nyasaye.

⁸Abaisiraeli okhuula bamanye mbu omwisaaliisi nomutakatifu, shichila yakholelanga isie emisango chieshiokhulia; Nisie OMWAMI Nyasaye ouli omutakatifu khandi oukholanga abandu banje okhuba abatakatifu.

⁹Khandi omwana omukhaana womwisaaliisi yesi yesi naba niyeyonoonia khulwokhwikhola omutamba, aba niyonooniye oluyali lwa samwana. Okhuula omukhaana oyo asambwe mumulilo afwe.

¹⁰“Omwisaaliisi omukhulundu owatsushililwakhwo amafura, khandi owaahulwa khulwa okhufwala ebifwalo biobwisaaliisi alalekhakhwo liswilie nilisaakushile kata okhurandula ebifwalobie khulwa okhulolesia mbu ali mukhwikhuula tawe.

¹¹Omwisaaliisi oyo aleyonooniakhwo omwene khulwa okhutsia munzu yomulambo kulimwo, kata nikuba nikuli okwa samwana noho nyinamwana tawe.

¹²Kata alarulakhwo elwanyi wahabundu hatakatifu kata okhwonoonia habundu wanje hatakatifu tawe. Ndamala okhumwahula nokhumutsushililakhwo amafura. Nisie OMWAMI Nyasaye.

¹³Omwisaaliisi okhuula ateeshie omukhaana oushili omushisila.

¹⁴Shialateshiakhwo omukhasi womusaatsawe yafwa noho owalekhana nomusaatsawe noho owamala okhwonoonibwa, noho omutamba tawe. Habula ateeshie omukhasi oushili omushisila owomuluyialwe.

¹⁵Ne nalalonda lilako lino ta, abaanabe abakhoyile okhuba abatakatifu balaba abomusilo. Nisie OMWAMI Nyasaye khandi ndamala okhumwahula okhuba omwisaaliisi omukhulundu.”

¹⁶Khandi OMWAMI Nyasaye nalachilisia Musa naboola ari,

¹⁷“Boolela Haroni mbu, omundu yesi yesi womulwibulolwe omulema shialahaanilakhwo omusango kwebiokhulia tawe. Lilako lino lilabetsanga eliatsinyanga tsiosi.

¹⁸Omundu oulikhwo nobulema bwosi bwosi, abe omubofu, omulema, owalema mumoni, oweshiungo shilala shiarambiya okhushila eshindi,

¹⁹owalema eshilenje noho omukhono,

²⁰oweshikufu, owakhuunya, oweimoni yeisongo, owamakakha, noho owalatwa shialahaanilakhwo omusango tawe.

²¹Omundu yesi yesi omulema owomulwibulo lwa Haroni shialakholelakhwo emisango chiebiokhulia tawe.

²²Omundu shinga oyo anyala okhuliakhwo ebiokhulia biabahaanile, bibe ebitakatifu noho ebitakatifu muno.

²³Nebutswa shichila nomulema, shialasitakhwo ahambi khungubo ishinga noho kata khushimalilo shiemisango tawe. Shialonoonia habundu wanje hatakatifu tawe, shichila nisie OMWAMI Nyasaye oubikholanga okhuba ebitakatifu.”

²⁴Kho Musa naboolela Haroni nende abasianibe nende abandu ba Isiraeli boosi amakhuwa ako.