Read wanga ABALAWI 22 Bible Online

ABALAWI 22 - wanga bible

ABALAWI 22

¹Khandi OMWAMI Nyasaye nalachilisia Musa ari,

²“Boolela Haroni nabasianibe mbu baleshe okhusita ahambi khubihanwa ebitakatifu ebiabandu ba Isiraeli banzahulila, kho mbu baleshe okhwonoonia eliira lianje litakatifu. Nisie OMWAMI Nyasaye.

³Obaboolele mbu, omundu yesi yesi womulwibulo lwenywe, naba nasita hambi khubindu ebitakatifu ebiabandu ba Isiraeli banzahulila, ne nashili okhwisiiya, omundu oyo okhuula ayinibwe imbeli wanje. Nisie OMWAMI Nyasaye.

⁴“Omundu yesi yesi womulwibulo lwa Haroni ouli nobuchele noho ouraatsa amatsayi shialaliakhwo ebihaanwa ebitakatifu ta, okhuula olwa aba nasiiyishe. Omwisaaliisi yesi outiila khushindu shiosi shiomusilo, outiila khumulambo noho khumusaatsa yesi yesi owilorera ne olusaatsalwe nilurula, aba womusilo.

⁵Kata naba natiila khuisolo yomusilo noho omundu yesi owomusilo.

⁶Omwisaaliisi yesi outilakhwo khushindu shiosi shiosi shinga eshio aba owomusilo okhuula khungoloobe inyanga eyo, khandi shialaliakhwo khubihanwa ebitakatifu nashili okhwisinga tawe.

⁷Ne aba omusiiyikhu olwa eliuba liyeela, ne olunyumakhwo anyala okhuliakhwo khubihanwa biemisango emitakatifu ebio, shichila ebio nibio ebiokhuliabie.

⁸Omwisaaliisi shialaliakhwo inyama yeshindu shifwile eshiene kata eshirirwe netsisolo nabulimo tawe. Nakhola ario, aba niyeyonoonia omwene. Nisie OMWAMI Nyasaye.

⁹“Khulweshio, okhuula abesaaliisi boosi balinde amalako kanje ako, ne nibalakhola bario ta, balakhola obwonooni ne nibafwa, khulwa okhulekha okhuloonda amalako kanje. Nisie OMWAMI Nyasaye oubakholanga okhuba abatakatifu.

¹⁰“Omundu yesi oulali omwisaaliisi ta, alaliakhwo eshihaanwa eshitakatifu tawe. Kata omucheni womwisaaliisi noho omukholi ourungungwa amapesa alaliakhwo eshihaanwa eshitakatifu tawe.

¹¹Nebutswa omusumba womwisaaliisi owakulwa mapesa noho omusumba owebulwa munzu yomwisaaliisi anyala okhuliakhwo ebiokhulia ebio.

¹²Omwana omukhaana womwisaaliisi naba nateshela omurende, shialaliakhwo ebihanwa biemisango emitakatifu tawe.

¹³Nebutswa omwana omukhaana womwisaaliisi naba omulekhwa, noho nalekhana nomusaatsawe, nalalikhwo nomwana ta; ne nakalukha okhumenya munzu yasamwana, shinga omukhaana oushili omuraaka; anyala okhuliakhwo khubiokhulia biasamwana ebio, nebutswa omurende alabiliakhwo tawe.

¹⁴“Khandi omundu yesi owali omwisaaliisi naliakhwo khushiahanwa eshitakatifu, ne nalamanyile ta, okhuula arunje omwisaaliisi eshichelo shihela eshindu eshio, khandi ameetekhwo eshitonye shiakharano shieshindu eshio.

¹⁵Abesaaliisi balonoonia ebihanwa ebitakatifu ebiabandu ba Isiraeli banderere isie OMWAMI Nyasaye,

¹⁶nibachila abandu boosi nibakwa mubwonooni nende okhuba abeshikha tawe. Nisie OMWAMI Nyasaye oubikholanga okhuba ebitakatifu.”

¹⁷Mana OMWAMI Nyasaye nalachilisia Musa ari,

¹⁸“Boolela Haroni nabasianibe nende abandu ba Isiraeli boosi mbu, omuisiraeli yesi yesi noho omurende owamenya mubo nareera omusangokwe omusambe, kube okwomurungo kweshiitsubo noho okwokhuchama butswa, okhuula eshia yandeerera eshio shibe nishibulakhwo obulema bwosi bwosi.

¹⁹Kho mbu eshifuchilile, okhuula eshia mundeerera shibe eshisaatsa eshilalikhwo nobulema bwosi bwosi tawe.

²⁰Nimundeerera isolo yosi yosi eyili nobulema, isie OMWAMI Nyasaye shindachifuchilila tawe.

²¹Ne lwomundu yesi yesi yandeerera isie emisango echiokhureera omulembe, khulwa okhuusia eshiitsuboshie, noho omusango okwokhuchama butswa, okhurula mung'ombetsie noho mumakondike, okhuula kube omulamba, khandi okubulakhwo obulema bwosi bwosi.

²²Shimulandeererakhwo tsisolo tsiabofula, noho etsialema, noho etsiafinikha, noho etsiraatsanga amafila noho etsiamahunde noho etsiarula obukuya tawe, kata okhutsihaana shinga ebihaanwa biokhusamba khushimalilo shiemisango shianje tawe.

²³Khulwa omusango kwokhuchama munyala okhuhaana ihunwa noho likondi eliarambiya elubeka noho eliembichita elubeka, nebutswa lilahaanwa khulwa omusango kwokhuusia eshitsubo tawe.

²⁴Shimulandeererakhwo isolo yosi yosi eyafinywa tawe. Eyo shiyifuchililwa khulwa omusango mushialo shienywe tawe.

²⁵“Shimulahanakhwo shinga eshiokhulia isolo yosi eyirulile khumurende tawe. Tsisolo shinga etsio tsilimwo obulema khulweshio shitsifuchililwa tawe.”

²⁶Khandi OMWAMI Nyasaye naboolela Musa ari,

²⁷“Olwa ihunwa noho likondi noho imbusi yibulwa yilatong'a niyili nende nyinamwana khulwa tsinyanga musafu, ne okhuchaaka khunyanga yomunane yinyala okhuhaanwa shinga omusango okukholilwe nomulilo khwisie.

²⁸Ne mulasinza ing'ombe neshimosi shiayo noho likondi likhasi nende eshimeme shialio kata imbusi neshimeme shiayo khunyanga ndala tawe.

²⁹Ne olwa mukhola omusango okwa okhukhupila isie OMWAMI Nyasaye orio, okhuula mukukhole habwene, kho mbu mufuchililwe.

³⁰Okhuula kulibwe khunyanga yeneyo; shimulalekhakhwo eshindu khukwo okhuula bushie ta. Niwsie OMWAMI Nyasaye.

³¹“Kho okhuula mulinde amalako kanje khandi mukakhole. Nisie OMWAMI Nyasaye.

³²Khandi shimulonoonia eliira lianje litakatifu ta, khandi okhuula abandu ba Isiraeli bafuchilile mbu endi omutakatifu. Nisie OMWAMI Nyasaye, oumukholanga abatakatifu;

³³Nisie owamurusia mushialo shia Misiri, khulwa okhuba Nyasaye wenywe. Nisie OMWAMI Nyasaye.”