Read wanga ABALAWI 23 Bible Online

ABALAWI 23 - wanga bible

ABALAWI 23

¹OMWAMI Nyasaye nalachilisia Musa naboola ari,

²“Boolela abandu ba Isiraeli mbu, kano niko amasabo kanje amaahule, aka mukhoyile okhulinda olwa muba mumikhung'ano chienywe emitakatifu.

³Mukholenje emilimo tsinyanga tsisasaba, nebutswa inyanga yomusafu ni Isabato, inyanga yokhukhung'ana khulwa okhunzinamila. Mulakholakhwo omulimo kwosi kwosi khunyanga eyo tawe. Niyo inyanga eya Isabato khwisie OMWAMI Nyasaye, habundu hosi aha mumenyile.

⁴“Kano niko amasabo kanje amahule, akemikhung'ano chienywe emitakatifu, okhuula mukalinde khundukho yako.

⁵“Lisabo lianje lia Pasaka lilachakanga khungoloobe khweinyanga yekhumi nakhane yomwesi kwambeli.

⁶Nalio eliamukate okubulamwo limela lilachakanga khunyanga yekhumi nakharano yomumwesi okwo. Mana khulwa tsinyanga musafu shimulaliekhwo omukaate okulimwo limela tawe.

⁷Khunyanga yambeli yomunyanga etsio, okhuula mube nomukhung'ano omutakatifu, ne mulakholakhwo omulimo kwosi kwosi tawe.

⁸Habula mulaakholela isie OMWAMI Nyasaye omusango omusambe khulwa tsinyanga musafu. Ne khunyanga yamusafu niyo eyomukhung'ano omutakatifu. Kho mulakholekhwo omulimo kwosi kwosi tawe.”

⁹Khandi OMWAMI Nyasaye naboolela Musa ari,

¹⁰“Boolela abandu ba Isiraeli mbu, olwa mwinjila mushialo eshia emuhelesianjia, ne nimuchesa ebiomumikunda chiashio, okhuula mureerere omwisaaliisi ebiamo bienywe biambeli.

¹¹Naye alachela ebiamo ebio imbeli wanje kho mbu emufuchilile inywe. Omwisaaliisi okhuula abichele khunyanga eyiloonda Isabato.

¹²Ne khunyanga eya muchelelakhwo ebiamo bienywe, okhuula mukhole omusango omusambe kwelimiiku eliomuyika mulala elibulakhwo obulema bwosi bwosi.

¹³Okhumeetakhwo okhuula muhane khandi omusango okweimele, nakwo kulaba tsikilo tsibili etsiobusie obunyushe obutsokasiibwemwo amafura. Isakakha yomusango okwo yinjamisinjia isie. Khandi okhumeeta khukwo mukhole omusango kwokhunywa okwelita ndala yeidivai.

¹⁴Ne mulaliekhwo imele yambeli eyo niyishili imbisi noho niyitsiyilwe noho kata niyiteshelwe mumukate tawe, okhuula olwa muba nimundeerele isie Nyasaye wenywe omusango okwo. Lilako lino okhuula mulilinde buli lwosi mutsinzibulo tsienywe tsiosi nende hosi hosi ahamumenya.

¹⁵“Khandi okhuula mubale amahonga musafu amalamba okhurula khunyanga yambeli olunyuma lwa Isabato, eya munderelakhwo eshinywa shieimele shiomusango okwokhuchelwa.

¹⁶Mana mubale tsinyanga amakhumi karano okhuchaachila khunyanga yilonda Isabato yamusafu. Mana mundeerere omusango kundi okweimele imbiakha.

¹⁷Buli abeinzu okhuula bandeerere emikaate chibili khulwa omusango kwokhuchelwa; buli omukaate okhuula kube okuukasibwe netsikilo tsibili etsiobusie obunyushe obufumbukhwe nelimela. Mana mukuhaane khwisie shinga omusango kwebichese biambeli bielichesa lienywe.

¹⁸Khandi okhumeetakhwo muhane omukaate nende amakondi musafu akomuyika mulala, akabulakhwo obulema bwosi, nende khandi ihunwa ndala nende amamiiku kabili, bibe ebiomusango omusambe khwisie. Mubihaane halala nende omusango kweimele kwabio nende emisango chieidivai chiabio; Isakakha yemisango echio yinjamisinjia isie.

¹⁹Khandi muhane ikhole ndala khulwa omusango kwobwonooni nende amamiiku kabili akomwika mulala khulwa Omusango kwokhureera omulembe.

²⁰Naye omwisaaliisi okhuula abichele, halala nomukaate okwebichese biambeli, namakondi kabili ako shinga omusango kuchelilwe imbeli wanje. Bilabetsanga ebihanwa ebitakatifu khulwa omwisaaliisi.

²¹Khunyanga eyo mulakholekhwo omulimo kwosi kwosi tawe, habula mwikhung'asia halala khulwa okhunzinamila. Abetsinzibulo tsienywe okhuula balinde lilako lino buli lwosi habundu hosi aha bamenya.

²²“Ne olwa muchesa ebichese ebiomushialo shienywe, mulachesa okhuula khundulo womukunda kwenywe tawe, kata mulakhung'asia ebirulume bitong'a munyuma tawe. Mulaleshelanga ebio abamanani nende abarende. Nisie OMWAMI Nyasaye omwene mahe wenywe.”

²³Mana OMWAMI Nyasaye nalachilisia Musa ari,

²⁴“Boolela abandu ba Isiraeli mbu, khunyanga yambeli eyomwesi kwamusafu okhuula balinde inyanga yokhuhuluukha, inyanga eya bakhung'ana nibakhupa tsinzika.

²⁵Shibalakholakhwo omulimo kwosi ta, habula bandeerere omusango kusambilwe nomulilo.”

²⁶Khandi OMWAMI Nyasaye nalachilisia Musa ari,

²⁷“Khunyanga yekhumi eyomwesi okwamusafu kuno neinyanga yeshitiso. Yilabetsanga inyanga yenywe yokhuba nomukhung'ano omutakatifu. Ne okhuula mwihonjie abeene inzala mana mundeerere omusango okukholilwe nomulilo.

²⁸Khandi mulakholekhwo emilimo khunyanga yeneyo tawe, shichila neyinyanga yeshitiso, eyokhuyiniaho obwonooni bwenywe imbeli wanje.

²⁹Omundu yesi oulehonjia omwene inzala khunyanga yeneyo, okhuula arusibwe mubandube.

³⁰Omundu yesi oukholakhwo omulimo kwosi khunyanga eyo, ndalamwira.

³¹Mulakholakhwo omulimo kwosi ta, lino nelilachilisio buli lwosi, mutsinzibulo tsienywe tsiosi, habundu hosi aha mumenya.

³²Okhurula khungoloobe khweinyanga ya shienda yomumwesi okwo, okhuula muchilinde shinga inyanga yokhuhuluukha; ne mulaliekhwo eshindu shiosi tawe.”

³³Khandi OMWAMI Nyasaye nalachilisia Musa ari,

³⁴“Boolela abandu ba Isiraeli mbu, lisabo liamatili lilachakanga khunyanga yekhumi nakharano eyomumwesi okwa musafu mana litsiililila khulwa tsinyanga musafu.

³⁵Inyanga yambeli yomutsinyanga etsio yilabetsanga eyomukhung'ano omutakatifu, shimulakholakhwo omulimo kwosi kwosi tawe.

³⁶Khulwa tsinyanga musafu mulandereranga emisango chikholilwe nomulilo. Ne khunyanga yamunane mulabetsanga nomukhung'ano omutakatifu, mulandeereranga omusango kukholilwe nomulilo. Niyo inyanga yokhunzinamila, ne mulakholelakhwo omulimo kwosi tawe.

³⁷“Kano niko amasabo aka ndaahula aka mwitsa okhukholanga khulwa okhumbelesia oluyali nimukhung'ana okhunzinamila nende okhuhaanila emisango echia ebiokhulia, emisango emisambe, echieimele, echieidivai nende echindi chiosi, buli musango khunyanga yakwo eyikwaniile.

³⁸Amasabo ako nakokhumeeta khumasabo kenywe aka buli lwosi akeisabato. Nabio ebihaanwa ebio nebiokhumeeta khubihaanwa bienywe bia buli lwosi, ebiamuhaanilanga isie khulwa okhuusia ebitsubo bienywe.

³⁹“Khunyanga yekhumi nakharano yomwesi kwa musafu, olwa muba nimwakhachesa ebiomumukunda, okhuula mukholile lisabo khulwa tsinyanga musafu. Inyanga yambeli nende eyomunane tsilabetsanga tsinyanga tsiokhuhuluukha.

⁴⁰Ne khunyanga eyo mubukule ebiamo biemisaala emilayi, namasaka akemisaala chiamashindu, namasaka kemisaala echili namasafu amanji, nemisaala chilandalanga khumwalo, mana khulwa tsinyanga musafu mwikhoye imbeli wanje isie OMWAMI Nyasaye wenywe.

⁴¹Okhuula mukhole lisabo elo khulwa tsinyanga musafu mumuyika. Lino lilachilisio lia buli lwosi mutsinzibulo tsienywe tsiosi, okhuula mulikhole mumwesi kwa musafu.

⁴²Abandu ba Isiraeli boosi okhuula mumenye mumatili khulwa tsinyanga musafu,

⁴³kho mbu abetsinzibulo tsienywe boosi bamanye mbu ndamukhola okhumenya mumatili olwa ndamurusia mushialo shia Misiri. Nisie OMWAMI Nyasaye wenywe.”

⁴⁴Kho Musa naboolela abandu ba Isiraeli okhulinda amasabo aka OMWAMI Nyasaye yaahula khulwa khumuhelesia oluyali.