Read wanga ABALAWI 24 Bible Online

ABALAWI 24 - wanga bible

ABALAWI 24

¹OMWAMI Nyasaye nalachilisia Musa ari,

²“Boolela abandu ba Isiraeli bakhureerele amafura ameeleleshe okhurula khumitseituni emiswache khulwa okhura mutaha eyili mwiheema, kho mbu obulafu butsililile okhwakhamwo buli khase.

³Haroni achihafinjie buli khungoloobe, nayo niyitsiililila okhwakha okhuula okhushia mwiheema lianje litakatifu. Itaha eyo yilabetsanga elwanyi weingubo ishinga eyili imbeli welisanduku liamalako elili habundu hatakatifu muno. Lilako lino nelia buli lwosi.

⁴Haroni okhuula yashie tsitaha khubichibi ebieitsahabu inzeleleshe imbeli wanje buli lwosi.

⁵“Ne obukule obusie obunyushe, mana obufumbushemwo amandasi ekhumi nakabili; buli eliendasi libemwo obusie buhela tsikilo tsibili.

⁶Mana okaanze mutsinyali tsibili, mubuli lunyali kabetsenjekhwo kasasaba, mana okare khumeesa yeitsahabu inzeleleshe.

⁷Ne okhuula ore obubane obweleleshe khubuli lunyali, kho mbu butsie nende omukaate shinga eshitonye shieshitsulilo eshikholilwe isie nomulilo.

⁸Buli khunyanga ya Isabato, Haroni okhuula akaasie omukaate buli lwosi imbeli wanje, buli lwosi mushilenje shiabandu aba Isiraeli, yino yilaba indakano eya buli lwosi mu Isiraeli.

⁹Omukate okwo kulabetsanga okwa Haroni nende abasianibe, mana bakulilenje habundu hatakatifu, shichila neshitonye eshitakatifu muno eshiokhumisango chikholilwe isie nomulilo.”

¹⁰Inyanga yindi obusoolo bwarulila mukambi hakari wa omuisiraeli nende omuraaka owa nyina yali omuisiraeli oulangwa mbu, Shelomitsi, ne samwana yali omumisiri.

¹¹Bulano omuraaka owa nyina yali omuisiraeli, omukhaana wa Dibiri womuluyia lwa Dani yafwola nende okhunyeka eliira lia OMWAMI Nyasaye. Kho abandu nibamureera imbeli wa Musa.

¹²Mana nibamwikalila nibalinda okhulola aka OMWAMI Nyasaye yetsa okhurumbula khuye.

¹³Mana OMWAMI Nyasaye naboolela Musa ari,

¹⁴“Rusia omundu ounyechile eliira lianje oyo elwanyi weikambi, ne abo boosi abahulile niyanyeka, bare amakhono kabwe khumurwekwe khulwa okhumanyia mbu ali neshikha, mana oboolele abomukhung'ano boosi bamulase namachina afwe.

¹⁵Khandi oboolele abandu ba Isiraeli mbu, omundu yesi ounyeka isie Nyasaye, okhuula anyoole eshinyasio khulwa obwonoonibwe obwo.

¹⁶Omundu yesi ounyeka eliira lianje okhuula yerwe; abomukanda boosi okhuula bamulase namachina afwe. Omundu yesi yesi abe omuisiraeli noho omurende ounyeka eliira lianje, okhuula yerwe.

¹⁷“Omundu yesi owiira owashie okhuula yesi yerwe.

¹⁸Omundu yesi owiira isolo yowashie okhuula akalusieho eyindi, obulamu khubulamu.

¹⁹“Omundu yesi oukhola owashie okhulema, okhuula yesi akholelwe kakholele owashie ako.

²⁰Omundu naba nafunaka owashie likumba, yesi okhuula likumbalie lifunakwe; naba namurusia imoni, imoniye yesi okhuula yirusibwe; naba namukhuula elino, yesi okhuula elinolie elala likhuulwe. Shinga olwa alemiye owashie nolwa yesi alemibwa.

²¹Omundu yesi owiira isolo okhuula akalusieho eyindi nebutswa owiira owashie okhuula yesi yerwe.

²²Lilako lino lili khubandu boosi, abarende nende Abaisiraeli shichila nisie OMWAMI Nyasaye wenywe.”

²³Kho Musa naboolela abandu ba Isiraeli, nabo nibareera elwanyi weikambi omundu owali nanyechile eliira elia OMWAMI Nyasaye oyo, nibamulasa namachina nafwa. Nolwa abandu ba Isiraeli bakhola aka OMWAMI Nyasaye yali nalachilisiye Musa.