Read wanga ABALAWI 25 Bible Online

ABALAWI 25 - wanga bible

ABALAWI 25

¹OMWAMI Nyasaye nalachilisia Musa khushikulu shia Sinai naboola ari,

²“Boolela abandu ba Isiraeli mbu, olwa mwinjila mushialo eshia emuhelesia okhuba eshienywe, khulwa okhumbelesia isie oluyali buli khumuyika kwa musafu, shimularachekhwo ebiokhulia mumukunda tawe.

³Mularakanga emikunda chienywe, nende okhukhalila emitsabibu chienywe nende okhuchesa ebiamo bienywe khulwemiyika chisasaba.

⁴Nebutswa omuyika kwamusafu, kulabetsanga omuyika kwomukunda okhuhuluukha, nikwo omuyika okwahulilwa isie OMWAMI Nyasaye. Mularachekwo emikunda chienywe kata okhukhalila emitsabibu chienywe tawe.

⁵Kata mulachesekhwo eshindu shiosi eshikhula butswa khubwashio tawe, kata okhuchesa tsinzabibu tsiemitsabibu echilakhalalilwa tawe. Okwo nomuyika kwokhuhuluukha khwomukunda.

⁶Kata omukunda nikularaakwa ebiokhulia mumuyika okwo ta, shikulachweya okhumuhelesia ebiokhulia, inywe, abasumba benywe, abakholi bomurungo nende abarende abamenya mwinywe tawe.

⁷Kulamuhelesia inywe halala netsing'ombe tsienywe nende kata tsisolo nabulimo. Ebindu biosi ebiama mumukunda okwo binyala okhulibwa.

⁸“Mubale emiyika musafu okhuula musafu, mana emiyika echio chiosi halala chibe emiyika amakhumi kane nashienda.

⁹Mana khunyanga yekhumi eyomumwesi kwamusafu, eyili inyanga yeshitiso okhuula murume omundu akhupe olwika obutinyu, luhulilishe mushialo shienywe shiosi.

¹⁰Ne mwahule omuyika kwamakhumi karano mana murumbule obulekhuulwi khubamenyile mushialo eshio boosi. Khumuyika okwo ebindu biosi ebiakusibwa okhuula bikalusilibwe owali mwenebio noho obolwibulolwe, khandi omundu yesi owali niyakusibwa okhuba omusumba okhuula akalusilibwe abandube.

¹¹Khumuyika okwo shimularachekhwo imwo kata okhuchesa imele yeshindu shiosi eshikhula khubwashio, kata okhuchesa tsinzabibu etsia emitsabibu echilakhalilwa tawe.

¹²Omuyika okwo kwosi okhuula kube omutakatifu khwinywe; Mulalitsanga butswa ebiokhulia ebikhula ebiene mumikunda.

¹³“Khumuyika okwo eshindu shiosi shiosi eshiakusibwa okhuula shikalusilibwe owali mweneshio.

¹⁴Ne nokusilia omuisiraeli washio omukunda kata okhukula okhurula khuye mulakataniekhwo tawe.

¹⁵Obukusi bwomukunda okwo bube okhulondana nemeyika echiomukunda okwo kunyala okhurakwamwo ebiokhulia omuyika kundi okwobulekhuulwi nikushili okhuula.

¹⁶Ne emiyika echio nichiba eminji, kho obukusu bwako bumeeteshe, ne nichiba mititi obukusi bwako butitiye, shichila shiomundu oyo akusinjia nobunji obwa ebiokhulia ebinyala okhucheswa mumukunda okwo.

¹⁷Mulakataniekhwo abeene khubeene tawe. Okhuula mumbelesie oluyali isie Nyasaye wenywe, shichila nisie OMWAMI Nyasaye Nyasaye wenywe.

¹⁸“Khulweshio, okhuula mulonde amalachilisio kanje nende okhulinda amalako kanje nimukakhola, kho mbu mumenye mushialo eshio nomulembe.

¹⁹Eshialo eshio shilaama ebiamo biashio, nenyu mulalia nimwikura, khandi mulamenya mushio nomulembe.

²⁰Ne nimuba nimukanakania mumioyo chienywe muri, ‘Nishiina eshia nakhulie mumuyika kwomusafu, nikhuba nikhularaaka kata okhuchesa ebiokhulia ta?’

²¹Nditsa okhureera tsikhabi tsianje khumukunda kwenywe mumuyika okwakhasasaba, kho mbu omukunda okwo kwaame ebiamo ebihela khulwemiyika chibili.

²²Olwa muraaka mumuyika kwamunane, mwitsa okhuba nimushilitsanga ebia mwachesa mumuyika kwakhasasaba. Mulaba nebiokhulia ebimuhela okhuula olwa muchesa ebiamurachile omuyika okwo.

²³“Mulakusilie elala omukunda kwenywe tawe, shichila nokwanje, nenywe muli butswa abarende abafuchililwa okhukwikhoonyela.

²⁴Ne lihanga liosi liosi eliamubukula, okhuula mufuchilile omundu owakusia omukunda okwo akununule khandi.

²⁵“Ne omuisiraeli washienywe naba omumanani nakusia omukundakwe, okhuula omwikhowe owahambi muluyialwe abe ye oukukula.

²⁶Nebutswa omundu oyo naba nalali nende owokhukukula ta, ne olunyuma naba omuyinda, nanyoola ebindu ebihela okhukukula khandi,

²⁷okhuula abasie emiyika okhurula nakukusia, mana akalusilie omundu owakukula oyo obukusi bwakwo okhushilasia khandi obwemiyika chitonyile okhuula khumuyika okwobulekhuulwi.

²⁸Nebutswa mwenekwo naba nalali nemiandu echihela okhukukula ta, kho kutonye nikuli kwomundu owakukula okhuula khumuyika okwa okhukalusilia owali mwenekwo. Mumuyika okwo okhuula omukunda okwo kukalushile mwenekwo.

²⁹“Omundu yesi yesi nakusia inzu yamenyangamwo eyili mwitookho liolukoba, anyala okhuyinunula mumuyika kwambeli okwa okhukusibwa khwayo; shichila khulwomuyika kwambeli omulamba ali nobunyali bwokhuyinunula.

³⁰Nebutswa nalayinunula mumuyika okwo ta, kho shialaba nobunyali bwokhuchinunula ta, okhuula yileshelwe elala khumundu owachikula nende khubolwibulolwe inziayo; khandi shiyiba yilalekhulwa mumuyika okwobulekhulwi tawe.

³¹Nebutswa tsinzu tsietsingongo tsilabotokhasibwa olukoba ta, tsilabetsanga shinga ebindu bili mumikunda, ebinyala okhununulwa. Tsinzu etsio tsinyala okhukalusilibwa owali mwenetsio khumuyika kwobulekhuulwi.

³²Habula buli lwosi Abalawi bali nobunyali bwokhununula tsinzu etsili mumatookho kabwe aka Abalawi bamenyangamwo.

³³Ne Omulawi yesi yesi nakusia inzu okhurula mumatookho kano, nayo niyilanunulwa ta, okhuula yikalusibwe mumuyika kwobulekhulwi shichila tsinzu etsia Abalawi bamenyangamwo mumatookho nobulaame bwabwe inziayo mubandu ba Isiraeli.

³⁴Nebutswa emikunda echiobwayilo chili ahambi namatookho aka Abalawi shichinyala okhukusibwa ta, shichila nobulaame bwabwe inziayo.

³⁵“Ne Omuisiraeli washio oumenyanga mwinywe naba omumanani oulanyala okhwilinda omwene ta, okhuula mumuhelesie ebia atamba shinga olwa muhelesinjia omurende, kho mbu atsililile okhumenya nineywe.

³⁶Shimulamurunjiakhwo inganga kata injelesio ta, nebutswa murie isie Nyasaye wenywe; kho mbu amenye halala ninenywe.

³⁷Mulamureebakhwo injelesio khumapesa kamumuhesia noho kata okhumukusia ebiokhulia obukusi bushila bwokulile tawe.

³⁸Nisie OMWAMI Nyasaye owamuyinia mushialo shia Misiri, okhuhelesia eshialo shia Kanani khandi okhuba Nyasaye wenywe.

³⁹“Ne omuisiraeli washio naba omumanani namenyanga ninawe, mana niyekusia omwene khwiwe shinga omusumba olamukhola akhalabane shinga omusumba tawe.

⁴⁰Okhuula abe ninawe shinga omukholi womurungo, khandi shinga omurende. Alakhukhalabanila okhuula omuyika okwobulekhulwi.

⁴¹Khumuyika okwo, ye omwene nende abeinzuye okhuula bakhuleshe nibakalukha khuboluyia lwabwe, nende khumiandu echia abakuuka babwe.

⁴²Abaisiraeli nabasumba banje aba ndarusia mushialo shia Misiri. Balakusibwakhwo shinga abasumba tawe.

⁴³Shiolaruka omuisiraeli washio nobululu ta, nebutsa okhuula orie isie Nyasaye.

⁴⁴Ne noba niwenya abasumba okhuula obakule okhurula mumahanga akakhubotokhane.

⁴⁵Munyala khandi okhukula abasumba okhurula mubarende abamenyanga mwinywe nende abetsinzu tsiabwe, abebulilwa mushialo shienywe, nabo balaba obulaame bwenywe.

⁴⁶Olunyuma olwokhufwa khwenywe munyala okhubaleshela ababaana benywe abasiani, mbu abaana benywe babukule abasumba abo okhuba obulaame bwabwe inziayo. Nebutswa mularuchekhwo Abaisiraeli bashienywe nobululu tawe.

⁴⁷“Ne omucheni noho omurende oumenyanga mwinywe naba omuyinda, ne omuisiraeli washio ourondokhane ninaye naba omumanani mana niyekusia omwene khumucheni noho khumurende oyo,

⁴⁸omuisiraeli oyo aba nashili nobunyali bwokhwinunula olunyuma lwokhwikusiakhwe.

⁴⁹Samwana undi noho omwana wa samwana undi; kata omwikhowe wa hambi owomuluyialwe anyala okhumununula. Noho omwene naba niyakhanyoola emiandu echihela anyala okhwinunula omwene.

⁵⁰Okhuula owakusibwa oyo arecheresanie nende owamukula, babasie okhurula khumuyika okwa yekusia khuye okhuula khumuyika kwobulekhulwi, mana obukusi bwokhununulwa okhuula bulondane nende obunji bwa omurungo kwomukholi owokhurungwa.

⁵¹Ne emiyika nichiba nichishili eminji, okhulondana nobunji bwachio, nolwa alakalusia ario amapesa akobukusi bwobununulwibwe.

⁵²Ne nichiba nichitonyile butswa emiyika mititi okhuula khumuyika kwobulekhulwi, kho barechelesanie okhulondana nobunji bwemiyikachie mubukholi mana akalusia amapesa akobununulwibwe.

⁵³Omuisiraeli oyo okhuula akholelwe shinga omundu owomurungo akholelungwa buli khumuyika, nebutswa nobululu tawe.

⁵⁴Ne naba nalanunulwe okhubirila munjila eyo ta, kho ye nabaanabe okhuula balekhulwe mumuyika kwobulekhulwi.

⁵⁵Abaisiraeli shibalabakhwo abasumba khulwa tsinyanga tsiosi tawe, shichila Abaisiraeli nabasumba banje. Ndabarusia Misiri, nisie OMWAMI Nyasaye wabwe.”