Read wanga ABALAWI 26 Bible Online

ABALAWI 26 - wanga bible

ABALAWI 26

¹“Shimulekasiliakhwo abeene ebifwanani kata okhusinjisia eshilonje shieliloba noho eshieisilo, kata okhumbakha eshifwanani shielichina mushialo shienywe mbu mubinamile tawe, okhuba nisie OMWAMI Nyasaye wenywe.

²Okhuula mulindenje tsinyanga tsia Isabato tsianje khandi muhelesie habundu wanje hatakatifu oluyali. Nisie OMWAMI Nyasaye.

³“Nimuba nimumenya okhulondana namalachilisio kanje nende okhulinda amalako kanje nimukakhola,

⁴ndalamukwisilia ifula mubise biayo bikhoyele, nakwo omukunda kulaama ebiamo ebinji khandi emisaala chiomumukunda chilaama ebiamo biachio.

⁵Ebiirache bienywe bilaba ebinji muno, mbu mulaba nimushichesanga olwa ebise biokhunoka tsinzabibu bilaba nibiulile, ne mulaba nimushinokanga tsinzabibu etsio olwa ebise ebiokhuraka biula. Khandi mulanyoolanga buli shindu shiosi eshia mwenya okhulia, ne nimumenya mushialo shienywe nomulembe.

⁶“Ne ndalareera omulembe mushialo shienywe, nenywe mulakona tsindoolo nimularia eshindu shiosi shiosi tawe, khandi ndalarusia mushialo tsisolo tsimbalaba, abulaho omusuku yesi yesi oulamuseera tawe.

⁷Mulahula abasuku benywe, nabo nibafwa mwihe imbeli wenywe.

⁸Abandu barano khwinywe balahula abasuku eshikhumi, nabo eshikhumi khwinywe balahula abasuku ebikhimila ekhumi. Abasuku benywe baleerwa imbeli wenywe nolukanga.

⁹Nasi ndalamuhelesia ikhabi nende okhumukhola mwibulane nimwinjiha, khandi ndalalinda indakano yandakhola ninenywe.

¹⁰Mulachesanga ebindu ebinji ebilabetsangaho khulwomuyika kwosi, okhumeetakhwo mulasukunanga ebindi khulwa okhuhaana obwiyangu khulwa ebindi ebiamuchesile ebiyiakha.

¹¹Mana ndalamenya hakari mwinywe khandi shindalamusilakhwo tawe.

¹²Ndalamenya hakari mwinywe, khandi ndalaba Nyasaye wenywe, nenywe mulaba abandu banje.

¹³Nisie OMWAMI Nyasaye wenywe, owamurusia mushialo shia Misiri kho mbu, muleshe okhuba abasumba babwe; ne ndafunaka obunyali bwebwe khwinywe, mana nimukhola okhuba abalekhuule.”

¹⁴OMWAMI Nyasaye naboola ari, “Nimulambulila noho okhukhola amalako kanje ta, mulanyoola eshinyasio.

¹⁵Nimuloba amalachilisio nende amalako kanje, ne nimufunaka indakano yanje,

¹⁶ndalamuhelesia eshinyasio. Ndalamureerela amatinyu, akobulwale bulahonanga ta, nende emirengo echiokhumubofusia tsimoni, nokhukhola obulamu bwenywe okhuhwelelela. Khandi mulanyakhana butswa okhuraka imwo yenywe nebutswa shimulachiliakhwo ta, shichila abasuku benywe balamuhula nibachilia.

¹⁷Ndalamulekha muhulwe khandi abasuku benywe balamuruka. Mulatilwa noburi muno, mbu kata mulelukha lwomundu yesi yesi aba nalamutafinjia ta.

¹⁸“Ne olunyuma olwa amatinyu ako nimutsiililila okhuloba okhumbulila, ndalenjiyia eshinyasio shienywe akhandi musafu.

¹⁹Ndalafunaka injinia yenywe khandi ifula shiyilakwakhwo ta, kho liloba lienywe lilakwa eliumu shinga omukasa.

²⁰Amaani kenywe kalahwa butswa eshikhaya, shichila liloba lienywe shililakhusia ebiokhulia ta, nachio emisaala echiomumukunda shichilaama ebiamo biachio tawe.

²¹“Ne nimuba nimutsiililila okhumenya mubukhayi nimulambulila ta, ndalenjiyia eshinyasio shienywe akhandi musafu.

²²Khandi ndalamurumila tsisolo nabulimo tsimbalaba, etsilamuluula abaana benywe nende okhwiira tsing'ombe tsienywe, khandi okhutitiyia obunji bwenywe kho mbu emihanda chienywe chilabula abokhuchendakhwo.

²³“Olunyuma olwa amanyakhano ako, nimulangalushila ta, nimutsiililila okhuba abakhayi,

²⁴kho omwene ndalamuhelesia eshinyasio eshilulu akhandi musafu khulwa obwonooni bwenywe.

²⁵Khandi ndalareera lihe mwinywe khulwa okhumuhelesia eshinyasio khulwa okhufunaka indakano yanje. Ne nimuba nimwikhung'asia mumatookho kenywe khulwa okhwihonokosia, ndalaruma obulwale obululu, obulahonanga ta mwinywe, khandi ndalamulekhuula mumakhono chiabasuku.

²⁶Nditsa okhulekha okhumuhelesia eshiokhulia, kho mbu abakhasi ekhumi balafumbukha omukaate mushifulia shilala. Balamuhelesia omukaate okwo mushichelo eshitiiti, mulakulia, ne shimulekura tawe.

²⁷“Ne olunyuma olwa ako koosi, nimuba nimutsiililila okhuloba okhumbulila, nimumeeta okhuba abakhayi khwisie,

²⁸kho ndalatiilwa neliruma, nemba omululu khandi ndalamuhelesia eshinyasio akhandi okhuula musafu.

²⁹Mulalumwa inzala indulu, kho mbu mulalia abaana benywe beene.

³⁰Khandi ndalasasia habundu wenywe ahamwinamilanga khubikulu, nende okhulikulula ebimalilo biemisango chibubaabe nokhusukuna emilambo chienywe khu echiebifwanani bienywe ebio. Nasi ndalamuloba.

³¹Ndalalikulula amatookho kenywe nende habundu wenywe hatakatifu, khandi shindalafuchilila emisango chienywe tawe.

³²Ndalasasia eshialo shienywe kho mbu abasuku benywe abetsa okhumenyamwo balahuka shinga olwa eshialo eshio shiasasibwa.

³³Ndalamureerela lihe nimusalasia mumahanga. Eshialo shienywe shilatong'a eshikhaya, nako amatookho kenywe kalasalasibwa.

³⁴Mana omukanda kulekhoonyelwa emiyika chiakwo chiosi echia okhuhuluukha olwa nenywe mulaba nimushili mushialo eshia abasuku, kho eshialo shilahulukha nishikhoya mutsinyanga tsie Isabato.

³⁵Oluhoono lwosi olwa shilaba nishitonyile eshikhaya shilahulukha okhushilakhwo shinga olwa shiahulukhanga tsinyanga tsia mwamenyangamwo.

³⁶“Ndalakhola abo khwinywe abali mushinyasio mushialo eshia abasuku benywe okhuba abari muno, mbu kata okhusakhasia khwelisafu nilikwa hasi khulabakhola belushe. Balelukha shinga abatafibungwa mwihe, lwomusuku yesi yesi aba nalabatafinjia ta.

³⁷Balatuyana abeene khubeene shinga abelukhanga mwihe, lwomusuku yesi yesi aba nalabatafinjia ta, khandi shibalanyalilwakhwo okhulwana omusuku yesi yesi tawe.

³⁸Mulafwiila mushialo shiabasuku benywe, nashio eshialo eshio shilamumilila elala.

³⁹Nabo batiiti khwinywe abehonokokha mushialo shiabasuku benywe eshio, balahwelelela elala khulwa obwonooni bwabwe nende obumayanu bwa abakuuka babwe.

⁴⁰“Nebutswa abolwibulo lwenywe nibaba nibeyema obwonooni bwabwe nende bwabakuuka babwe, abali abakhayi khwisie,

⁴¹nibakhola isie okhubakalukhanakhwo, nokhubayila mubuhambe mushialo eshia abasuku babwe; kho olwa abolwibulo lwenywe betutuyia khandi nibamalile okhunyoola eshinyasio shiobwonooni bwabwe nende obukhayi bwabwe,

⁴²kho nilwo olwa ndilitsulila indakano yanje eyandakaasia nende Yakobo, Isaka nende Aburahamu mana nenditsulila indakano eya ndakaasia nabandu banje nesuubisia mbu ndakhabahelesie eshialo shia Kanani.

⁴³“Nebutswa okhuula eshialo eshio shitoonye eshikhaya, shikhoyela emiyika chiashio echiokhuhuluukha. Nilwo olwa balinyoola eshinyasio khulwa obwonooni bwabwe shichila bakhaya okhuhulila amalako nende amalachilisio kanje.

⁴⁴Ne kata kario, olwa balaba nibashili mushialo shiabasuku babwe eshio, shindalabalobela elala kata okhubamululila elala tawe. Ako kakhachila indakano yanje ninabo okhwakama, isie nisie OMWAMI Nyasaye wabwe.

⁴⁵Nebutswa ndakhetsulile indakano yanje eya ndakaasia nabakuukanyene, abandarusia mushialo shia Misiri amahanga kandi nikareerekhwo tsimoni, kho mbu, isie OMWAMI Nyasaye embe Nyasaye wabwe.”

⁴⁶Ako niko amalachilisio nende amalako aka OMWAMI Nyasaye yalachilisia Musa khushikulu shia Sinai mbu aboolele abandu ba Isiraeli.