Read wanga ABALAWI 27 Bible Online

ABALAWI 27 - wanga bible

ABALAWI 27

¹OMWAMI Nyasaye yalachilisia Musa ari,

²“Oboolele abandu ba Isiraeli amalako kano mbu, omundu naba nasuubisia okhuhaanila OMWAMI Nyasaye omundu nalebe, khulwa okhuusia eshitsubo nalebe, omundu ouhaanilwe oyo anyala okhuba omulekhuule khulwa oumuhaanile okhurunga eshichelo shiarebwaho.

³Omusaatsa wemiyika amakhumi kabili okhuula owemiyika amakhumi kasasaba, alanunulwa khulwa okhurunga ebitonye amakhumi karano bieifetsa, okhulondana nende eshichelo shia habundu hatakatifu.

⁴Ne naba omukhasi, alanunulwa khulwa okhurunga ebitonye bieifetsa amakhumi kataru.

⁵Ne omundu oyo naba nali owemiyika chirano okhuula owemiyika amakhumi kabili, alanunulwa khulwa okhurunga ebitonye amakhumi kabili bieifetsa, ne nali omukhasi ebitonye ekhumi bieifetsa.

⁶Ne nali omwana womwesi mulala okhuula owemiyika chirano alanunulwa khulwa ebitonye birano bieifetsa naba nali omusiani, ne nali omukhaana alanunulwa khulwa ebitonye bitaru bieifetsa.

⁷Ne omundu oyo naba nali omusaatsa wemiyika echibira amakhumi kasasaba, alanunulwa khulwa ebitonye ekhumi nabirano bieifetsa, ne nali omukhasi alanunulwa khulwa ebitonye ekhumi bieifetsa.

⁸“Ne omundu witsubile eshitsubo oyo naba nali omumamani muno oulanyala okhurunga eshichelo eshio ta, omundu owahaanwa oyo okhuula areerwe khumwisaaliisi, naye omwisaaliisi achelele omundu wahaana oyo eshichelo eshia anyala okhuhaana.

⁹“Eshitsubo eshio nishiba eshia isolo yifuchililwa okhuhaanila isie OMWAMI Nyasaye omusango, kho yiba indakatifu.

¹⁰Alachikalukhasiakhwo neyindi, kata okhuchikulasia tawe; Ne naba nakhola ario, tsisolo etsio tsiosi tsilaba etsianje.

¹¹Nebutswa niyiba isolo yomusilo, eyilanyala okhuhanwa okhuba omusango khwisie ta, kho omundu oyo okhuula areere isolo eyo khumwisaaliisi.

¹²Naye omwisaaliisi aboole obukusi bwayo okhulondana nobulayi nende obubi bwayo, mana yikusibwe obukusi obwo.

¹³Nebutswa omundu naba niyenya okhuchinunula, okhuula ameete khubukusi obwo eshitonye shiakharano shiobukusi obwo.

¹⁴“Olwa omundu naba niyanzahulila isie OMWAMI Nyasaye inzuye, okhuula omwisaaliisi aboole obukusi bwayo okhulondana nobulayi nende obubi bwayo; mana yikusibwe obukusi obwo.

¹⁵Ne omundu ouchihaanile oyo naba niyenya okhuchinunula, okhuula ameete khubukusi bwayo obwo eshitonye shiakharano.

¹⁶“Ne omundu yesi yesi naba niyanzahulila isie eshitonye shiomukundakwe kwobulaame, kho obukusi bwakwo okhuula buhelane nende eshichelo shieimwo yirakungwa mumukunda okwo, mbu tsikilo amakhumi kabili tsieishayiri khulwa ebitonye amakhumi karano bieifetsa.

¹⁷Ne omundu naba niyanzahulila omukundakwe mumuyika okwobulekhuulwi, obukusi bwakwo bulaba obweshichelo shitsuule.

¹⁸Nebutswa naba nakunzahulila olunyuma lwomuyika kwobulekhuulwi, kho omwisaaliisi okhuula abale eshichelo shiamapesa akahelana nende emiyika chitonyile okhuula khumuyika kulondakhwo okwobulekhuulwi.

¹⁹Ne omundu ouba niyanzahulile omukundakwe niyenya okhukununula, okhuula ameete khubukusi bwakwo eshitonye eshiakharano mana kumukalushile.

²⁰Nebutswa omundu oyo naba nakukusia khumundu undi, ne nashili okhukununula okhurula khwisie OMWAMI Nyasaye, omukunda okwo shikulanunulwakhwo khandi ta inziayo.

²¹Ne khumuyika kulondakhwo kwobulekhuulwi, omukunda okwo kulaba okwanje inziayo; kho kulaba okwa abesaaliisi.

²²“Ne omundu niyanzahulila omukunda kwomwene yakula, okulali okwobulaamebwe ta,

²³omwisaaliisi okhuula amuchelele eshichelo shiobukusi bwakwo okhulondana nende emiyika chitonyile okhuula khumuyika kwobulekhuulwi. Mana omundu oyo arunje amapesa ako khunyanga eyo; amapesa ako kalaba akanje isie OMWAMI Nyasaye.

²⁴Ne khumuyika kwobulekhuulwi, omukunda okwo okhuula kukalusilibwe owali mwenekwo noho abolwibulolwe.

²⁵“Buli eshichelo shieshindu shiosi okhuula shichelwe okhulondana neshichelo shiarebwaho, eshia habundu hatakatifu.

²⁶“Eshikulanda shiemiruko neshianje, kho abulaho owakhashiahula khandi mbu shibe eshihanwashie khwisie tawe. Shibe eshimoosi noho eshimeme shielikondi noho eshia imbusi, biosi nebianje.

²⁷Ne eshikulanda eshio nishiba eshieisolo yomusilo, kho omundu oyo ashinunule okhulondana neshichelo eshiarebwaho, khandi ameetakhwo eshitonye shiakharano; ne nishiba nishilanunulwa ta, okhuula shikusibwe khumundu undi okhulondana neshichelo eshiarebwaho.

²⁸“Nebutswa eshindu shiosi shiosi eshiamala okhwahulilwa isie OMWAMI Nyasaye, shibe omundu noho omuruko, noho omukunda kwobulaame, shilakusibwakhwo noho okhununulwakhwo tawe. Eshindu shiosi eshiahulilwa isie neshitakatifu khandi eshianje inziayo.

²⁹Kata omundu yesi yesi owahaanwa khwisie kho mbu amululwe, alanunulwakhwo tawe, okhuula yerwe.

³⁰“Eshitonye shielikhumi shiebichese biomukunda, bibe bieimele noho biebiamo, biosi nebianje.

³¹Omundu naba niyenya okhununula eshitonye shielikhumishie, okhuula arunje omurungo kwarebwaho khandi ameetekhwo eshitonye shiakharano.

³²Ne mumiruko, ndala khubuli emiruko ekhumi neyanje. Olwa emiruko echio chibalwa, eyekhumi yilabetsanga eyanje.

³³Mwene emiruko echio alarechekha, kho mbu omuruko kwahulwa kube omulayi noho omubi tawe. Kata shialakukulaasiakhwo nende okundi tawe. Naba nakukulaasia kho chiosi nechianje, khandi shichinyala okhununulwa tawe.”

³⁴Kano niko amalako aka OMWAMI Nyasaye yalachilisia Musa khushikulu shia Sinai mbu, aboolele abandu ba Isiraeli.