Read wanga ABALAWI 4 Bible Online

ABALAWI 4 - wanga bible

ABALAWI 4

¹Mana OMWAMI Nyasaye nalachilisia Musa mbu

²abolele abandu ba Isiraeli ari, “Omundu yesi yesi niyetsukhana niyonoona nakorirwe, nakhola eshindu shiosi shiosi eshia isie OMWAMI Nyasaye ndakaana mbu shilakholwa ta, okhuula akhole amalachilisio kalondakhwo kano.”

³“Naba nali Omwisaaliisi omukhongo owonoona nareerera abandu eshikha, okhuula yandeerere isie OMWAMI Nyasaye ihunwa eyilakhikhwo nobulema bwosi bwosi ta, mana achihaane khulwa obwonoonibwe.

⁴Omwisaaliisi oyo okhuula yetse nende ihunwa eyo imbeli wanje, habwinjililo weliheema litakatifu, mana atiile omukhonokwe khumurwe kwayo, nachisinza imbeli wanje.

⁵Mana Omwisaaliisi omukhulundu oyo abukulekhwo amalasile matutu akeihunwa eyo akareere mwiheema.

⁶Mana yeene olwalalwe mumalasile ako ahanyekhwo matiiti khuko okhuula musafu imbeli weingubo ishinga ya habundu hatakatifu imbeli wanje.

⁷Mana omwisaaliisi oyo arekhwo kandi khumalasile ako khutsinzika tsieshimalilo shiemisango eshiobubanane eshili mwiheema litakatifu. Mana asundule amalasile katong'a hasi weshimalilo shiemisango emisambe eshili habwinjililo weliheema litakatifu elo.

⁸Ne okhurula khu ihunwa yomusango kwobwonooni eyo, abukule amasinya koosi, amasinya akafwimbanga amala,

⁹nende tsifuko tsiosi, namasinye akali khutsio nende akali khushitakhaliira, akayiniekhwo.

¹⁰Shinga olwa karusubungwa khuihunwa eyomusango kwokhureera omulembe. Omwisaaliisi abisambile khushimalilo shiemisango emisambe.

¹¹Nebutswa liseelo lieihunwa eyo, inyama yayo yosi, omurwe kwayo, ebilenje biayo, amala kayo, halala nobuse,

¹²achibukule yoosi achiyinie elwanyi weikambi, nachiyila habundu haulwa khulwa omulukha okwo, aha likoshe litsukhungwa, mana achisambileho khumulilo.

¹³“Ne omukanda kwosi kwabandu ba Isiraeli nibaba nibonoona nibalamanyile ta, mana nibaba neshikha eshiokhufunaka elala khumalako aka isie OMWAMI Nyasaye ndakaana mbu kalafunakwa ta,

¹⁴ne bwangu bwene olwa eshionoono eshio shibamanyishila, abomukhung'ano okhuula bahaane ihunwa khulwa omusango kwobwonooni. Okhuula bachireere imbeli weliheema litakatifu.

¹⁵Mana abakhulundu bomukhung'ano, bare amakhono kabwe khumurwe kweihunwa eyo, mana ihunwa eyo yisinzilweho imbeli wanje.

¹⁶Mana omwisaaliisi mukhulundu, abukulekhwo khumalasile keihunwa eyo akareere mwiheema litakatifu.

¹⁷Mana yeene olwalalwe mumalasile ako, ne akahaanye okhuula musafu imbeli weingubo ishinga.

¹⁸Khandi abukulekhwo khumalasile ako akare khutsinzika tsieshimalilo shiemisango eshili mwiheema litakatifu. Ne akatong'a akatsushe hasi weshimalilo shiemisango emisambe, eshili habwinjililo weliheema.

¹⁹Mana abukule amasinya kayo koosi akasambila khushimalilo shiemisango.

²⁰Ne shinga olwa akholanga ihunwa yomusango kwobwonooni, khandi nolwa alakhola ario ihunwa eyo. Nolwa omwisaaliisi alabatisa ario nabo nibaleshelwa obwonooni bwabwe.

²¹Mana omwisaaliisi oyo alayila ihunwa eyo elwanyi weikambi nachisamba, shinga olwasambile ihunwa yobwonoonibwe omwene, nikwo omusango kwobwonooni khulwa abomukhung'ano.

²²“Omuruchi yesi naba niyonoona mukhukorwa, nafunaka elala khumalako aka isie OMWAMI Nyasaye ndakaana mbu kalafunakwa ta, mana naba neshikha;

²³kho mubwangu lwobwonooni bwakholile obwo bumumanyishila okhuula areere imbusi ikhole eyilalikhwo nobulema bwosi bwosi ta khulwa omusangokwe kwobwonooni.

²⁴Omuruchi oyo are omukhonokwe khumurwe kweimbusi eyo, nachisinzila habundu ahabasinzilanga omusango omusambe imbeli wanje. Okwo nikwo omusango kwokhurusiaho obwonoonibwe.

²⁵Mana omwisaaliisi abukule nolwalalwe khumalasile komusango kwobwonooni, mana akabashe khutsinzika tsiokhushimalilo shiomusango omusambe. Ne amalasile katong'a akatsushe hasi weshimalilo shiomusango omusambe.

²⁶Omwisaaliisi asambile amasinya kayo koosi khushimalilo shiemisango shinga olwa akemisango chiokhureera omulembe chisambungwa. Munjila eyo nolwa omwisaaliisi alatisa omuruchi khulwa obwonoonibwe mana aleshelwe.

²⁷“Ne omundu undi yesi niyonoona mukhukorwa, nafunaka elala khumalako aka isie OMWAMI Nyasaye ndakana mbu kalafunakwa ta, aba neshikha.

²⁸Olwa eshionoono shiakholile eshio shimumanyishila okhuula areere imbusi ikhasi eyibulakhwo obulema bwosi bwosi khulwa omusangokwe kwobwonooni.

²⁹Mana omundu oyo atiile omukhonokwe khumurwe okwa imbusi eyo nachisinzila habundu aha basinzilanga omusango omusambe.

³⁰Ne omwisaaliisi abukule nolwalalwe khumalasile ako mana akabashe khutsinzika tsieshimalilo shiomusango omusambe, ne amalasile katong'a akatsushe hasi weshimalilo shiemisango eshio.

³¹Mana ayinie amasinya kayo koosi shinga olwa amasinya komusango kwokhureera omulembe kayinibungwa, ne omwisaaliisi oyo akasambile khushimalilo shiemisango, okhuba isakakha indayi eyinjamisinjia isie OMWAMI Nyasaye. Kho munjila eyo nolwa omwisaaliisi alatisa omundu oyo khulwa obwonooni obwa akholile mana aleshelwe.

³²“Ne omundu oyo naba nahaana likondi okhuba omusangokwe kwobwonooni, okhuula libe likhasi elibulakhwo obulema bwosi bwosi.

³³Mana atiile khumurwe kwalio nalisinzila habundu ahabasinzilanga omusango omusambe.

³⁴Mana omwisaaliisi abukulekhwo nolwalalwe khumalasile, akokhumusango kwobwonooni okwo, akabashe khutsinzika tsieshimalilo shiomusango omusambe. Nako akatong'a akatsushe hasi weshimalilo shiemisango eshio.

³⁵Mana ayinie amasinya kalio koosi shinga olwa amasinya kelikondi liemisango khumisango echiokhureera omulembe karusibungwa, mana akasambile khushimalilo shiemisango halala nebihaanwa ebisambiilwe isie OMWAMI Nysaye. Ne munjila eyo nolwa omwisaaliisi alatisa ario omundu oyo khulwa obwonooni bwakholile obwo, mana omundu oyo aleshelwe.”