Read wanga ABALAWI 6 Bible Online

ABALAWI 6 - wanga bible

ABALAWI 6

¹OMWAMI Nyasaye yaboolela Musa ari,

²“Omundu naba nakhola obwonooni noho niyanzoonela isie OMWAMI Nyasaye khulwa okhukaatia owashie mwikhuwa liosi liosi eliokhwechekha noho liomusingo, noho okhwibila owashie,

³noho nanyoola eshindu shiowashie eshiali nishiakora, ne naboola mbu shiashiluutsikhwo ta, noho niyetsuba khulwa okhuboola akobubeeyi,

⁴omundu oyo olwa niyonoona okhubirila munjila shinga yino ne naba neshikha, okhuula akalusie eshiabukule mukhunuula noho okhusandia noho omusingo okwa yakholelwa, kata eshindu eshiakora eshianyolile.

⁵Kata eshindu shiosi eshia yetsubilekhwo nobubeeyi; okhuula ashikalusie shiosi khandi ameetekhwo eshitonye shiakharano mana akalusilie mweneshio khunyanga eya akholelakho omusango kukwe okwomurungo.

⁶Alerere omwisaaliisi limiiku elibulamwo obulema bwosi bwosi ta okhuba omusangokwe kweshikha khwisie OMWAMI Nyasaye. Obukusi bwalio buchelwe neshichelo shiobukusi bwelimiiku liomusango kweshikha.

⁷Mana omwisaaliisi akhole omusango okwo khulwa okhutisa omundu oyo, mana aleshelwe eshionoonoshie.”

⁸OMWAMI Nyasaye nalachilisia Musa ari,

⁹“Laka Haroni nabasianibe, nobaboolela mbu, elilondakhwo lino nilio lilako eliomusango omusambe. Omusango omusambe okhuula kube khumulilo eshilo shiosi nakwo omulilo okwo okhuula kutsililile okhwakha khushimalilo shiemisango eshio okhuula okhushia.

¹⁰Mana nibushiele omwisaaliisi niyefwalile ebifwalobie bieikitani, nende isirwaliye eyaikitani; abukule likoshe liomusango omusambe kusambilwe khushimalilo shiemisango eshio mana alire handulo weshimalilo shiemisango eshio.

¹¹Mana omwisaaliisi oyo afwalule ebifwalobie ebio, ne yefwale ebindi, mana abukule likoshe elo aliyinie elwanyi weikambi nalira habundu halafu.

¹²Omulilo kuli khushimalilo shiemisango okwo kutsililile okhwashibwa, nikulasima tawe. Omwisaaliisi asundenje tsikhwi mumulilo okwo buli mumabwibwi, ne niyanzakhwo omusango okwokhusambwa okwo obulayi mushilonyo, mana asambilekho amasinya akemisango echiokhureera omulembe.

¹³Omulilo okhuula kutsililile okhwashibwa khushimalilo shiemisango eshio eshise shiosi; kuleshe okhusimakhwo tawe.

¹⁴“Nalio lino nilio lilako liomusango kweimele. Abasiani ba Haroni balandeerera imele eyo imbeli weshimalilo shiemisango.

¹⁵Mana omwisaaliisi oyo afumbarekhwo ifusi yobusie obunyushe obwomusango kweimele eyo nende amafura kakwo, nobubane bwosi obuli khumusango kweimele eyo mana abisambile khushimalilo shiemisango bube eshilolelo mbu, bwosi buhaanilwe isie OMWAMI Nyasaye. Isakakha yakwo yinjamisinjia isie.

¹⁶Ne Haroni nabasianibe balie okutong'akhwo. Kulakholwa omukaate kubulamwo limela, mana habundu hatakatifu, mulwanyi lweliheema litakatifu.

¹⁷Kulakasibwa nelimela ta. Ndamala okhukuhaana shinga eshitonye shiabwe eshiemisango chianje chisambilwe nomulilo. Nikwo omutakatifu muno, kuli shinga omusango kwobwonooni nende omusango okweshikha.

¹⁸Oweshisaatsa yesi mubolwibulo lwa Haroni anyala okhuliakhwo. Nikwo omukabo kwabwe okwa buli lwosi okhurula khumisango chianje isie OMWAMI Nyasaye. Omundu undi yesi outiila khuchio alasasibwa khulwa obunyali bwobutakatifu bwakwo.”

¹⁹OMWAMI Nyasaye naboolela Musa ari,

²⁰“Kuno nikwo omusango kwa Haroni nabasianibe balakholela isie khunyanga eya yahulilwakhwo okhuba omwisaaliisi. Bandeerere ikilo ndala yobusie obunyushe, eshichelo shiabwo shihelana nende eshiomusango kwabuli lwosi okweimele. Aleere inusu yabwo mumabwibwi ne eyindi mungolobe nibwilanga.

²¹Bulakasibwa namafura mana butsiyilwe khuluchio, buleerwe nibufumbukhwe mubitonye, mana buhaanwe shinga omusango okweimele, nabwo bulaba omusango kweyisakakha eyokhunjamisia isie OMWAMI Nyasaye.

²²Mulala khubesaaliisi okhurula mubasiani ba Haroni, owokhukalukha mushilenje shiasamwana yandeerere, ne batsiililile okhukhola bario buli lwosi shinga olwa isie omwene ndamala okhulachilisia; mana kusambilwe elala kwosi kube omusango khwisie OMWAMI Nyasaye.

²³Buli omusango kweimele kwomwisaaliisi okhuula kusambwe kwosi pe; kulalibwakhwo tawe.”

²⁴OMWAMI Nyasaye nalachilisia Musa ari,

²⁵“Boolela Haroni nabasianibe mbu, ‘Eliloondakhwo lino nilio lilako liomusango kwobwonooni. Eshihaanwa shiomusango kwobwonooni shileerungwe habundu aha bereranga ebihaanwa ebia emisango emisambe. Kuno nikwo omusango okuli omutakatifu muno.

²⁶Omwisaaliisi oukumala khulwa obwonooni akulile habundu hatakatifu, mulwanyi lwaliheema litakatifu.

²⁷Omundu yesi outilakhwo khunyama yakwo, alanyoola amasila. Ne amalasile kakwo nikamitsulwa khushifwalo, okhuula eshifwalo eshio shiosilibwa habundu hatakatifu.

²⁸Ne inyungu eya kuteeshilwemwo yarwe, nebutswa nikuba nikuteshelwe khunyungu eyakasibwa khumukasa, yirutwe niyosibwa namaatsi.

²⁹Buli oweshisaatsa mubesaaliisi anyala okhukuliakhwo, nikwo omutakatifu muno.

³⁰Nebutswa amalasile kakwo nikakharelwa mwiheema litakatifu, ne nikekhonyelwa khulwa okhuyiniaho obwonooni, inyama yakwo yilalibwakhwo tawe. Okhuula yisambwe yoosi.’ ”