Read wanga ABALAWI 7 Bible Online

ABALAWI 7 - wanga bible

ABALAWI 7

¹Akaloondakhwo kano namalako akemisango chiemirungo, niko amatakatifu muno.

²Eshihaanwa shiomusango kweshikha shilererungwa habundu aha beleranga ebihaanwa biemisango emisambe. Nako amalasile kakwo kalamitsulwa khutsimbeka tsiosi khushimalilo misango.

³Omwisaaliisi ayiniekhwo amasinya kakwo koosi akeyisembe, amasinya kafwimbanga khumala,

⁴tsifuko tsiombi namasinya kalikhwo, akali hashikhuulu nende akali khushitakhaliira.

⁵Omwisaaliisi okhuula asambe amasinya ako koosi khushimalilo shiemisango kabe omusango okukholiilwe isie OMWAMI Nyasaye. Okwo nikwo omusango okweshikha.

⁶Buli oweshisaatsa muluyia olwabesaaliisi anyala okhukuliakhwo nebutswa okhuula kulilwe habundu hatakatifu, shichila nomusango okuli omutakatifu muno.

⁷Omusango okweshikha kuli shinga omusango kwobwonooni, shichila liliho lilako elala khuchio chiosi elili mbu, omwisaaliisi ouchikhola okhuula abukule inyama yachio.

⁸Ne omwisaaliisi oukhola omusango omusambe kwomundu yesi, okhuula abukule liseelo lieyisolo yomusango okwakholile okwo.

⁹Buli omusango kweimele okufumbukhwa mumayika nende biosi ebikasilibwa khushifulia noho khuluchio bilabetsanga ebiomwisaaliisi oukukholile.

¹⁰Nebutswa buli omusango okweimele okutsokasibwe namafura kata okusiyiilwe kulabetsanga okwabasiani boosi ba Haroni, okhuula bakabane okuherana.

¹¹“Akalondakhwo kano niko amalako akemisango echiokhurea omulembe, echiomundu anyala okhukholela isie OMWAMI Nyasaye.

¹²Omundu naba niyakholela omusango kwokhukhupila orio, okhuula akurere halala nende amandasi akabulamwo limela, akatsokasibwe namafura, nebisikuti ebibulamwo limela ebibashilwekhwo namafura, nende amandasi akobusie obunyushe obutsokasiibwe obulayi namafura.

¹³Okhumeeta khuchio okhuula areere nende amandasi kalimwo limela.

¹⁴Ne omwisaaliisi oyo, okhuula areere eshitonye shilala khubuli eliandasi eliomusango okwo okhuba eshihaanwa eshiahule khwisie OMWAMI Nyasaye. Ne bilabetsanga biomwisaaliisi ouhanyile amalasile kemisango chiokhureera omulembe khushimalilo shiemisango.

¹⁵Ne inyama yemisango echio, okhuula iliibwe khunyanga yene eyachikholelekhwo. Alalekhakhwo inyama eyo okhukona okhuula okhushia tawe.

¹⁶“Nebutswa omusangokwe nikuba nikuli okweshihaanwa shieshitsubo noho okweshihaanwa eshia ahaana mukhuchama, inyama yakwo yilalibwa yosi khunyanga eyo ta, habula eyitong'a yilibwe khunyanga yilondakhwo.

¹⁷Nebutswa inyama yakwo eyitong'a okhuula khunyanga yakhataru, yisambwe nomulilo.

¹⁸Ne inyama yosi yosi yokhumusangokwe kwokhureera omulembe niyakhalibwa khunyanga yakhataru, shiemba ndafuchilila omusango okwo tawe. Omusangokwe okwo shikulabalwakhwo okweinganga khuye tawe, habula kulaba okwomusilo. Ne omundu yesi ouliakhwo inyama yakwo alanyoola eshinyasio.

¹⁹Inyama eyitisiakhwo khushindu shiosi eshiomusilo, yilalibwa tawe; okhuula yisambwe nomulilo. Nebutswa omundu yesi omusiiyikhu anyala okhuliakhwo inyama eyo.

²⁰Nebutswa omundu yesi oulali omusiikhu ta, naliakhwo inyama yemisango chianje echiokhureera omulembe, okhuula arusibwe muluyia olwa Abaisiraeli.

²¹Ne omundu yesi natiilakhwo khushindu shiomusilo, kata shibe shiobwonooni bwomundu, noho isolo eyili eyomusilo kata eshisinyo eshili omusilo, mana nalia inyama yemisango chianje chiokhureera omulembe, okhuula arusibwe muluyia olwa Abaisiraeli.”

²²OMWAMI Nyasaye nalachilisia Musa ari,

²³“Boolela abandu ba Isiraeli mbu, ‘Mulaliakhwo amasinya keing'ombe kata kelikondi noho akeimbusi ta.

²⁴Amasinya akeisolo ifwile butswa eyene nende aka isolo yirirwe neisolo yindi yomubulimo, munyala okhukekhoonyela khulwa okhukhola omulimo kundi kwosi, nebutswa shimulakaliekhwo tawe.

²⁵Omundu yesi ouliakhwo amasinya akeisolo yomusango okusambiilwe isie OMWAMI Nyasaye nomulilo, okhuula arusibwe muluyia olwa Abaisiraeli.

²⁶Okhumeetakhwo, mushimenyo shienywe shiosi shiosi mulaliakhwo amalasile akelinyonyi kata keisolo ta.

²⁷Omundu yesi ouliakhwo amalasile kosi kosi, okhuula arusibwe muluyia olwa aba Isiraeli.’ ”

²⁸OMWAMI Nyasaye nalachilisia Musa ari,

²⁹“Boolela abandu ba Isiraeli mbu, omundu yesi ounderera omusangokwe okwokhureera omulembe, okhurula khukwo okhuula yandeerere isie OMWAMI Nyasaye eshitonye eshiahule.

³⁰Yanderere namakhonoke omwene omusango omusambe. Yanderere amasinya nende itakata kho mbu, bibe omusango omwahule okuhanilwe isie OMWAMI Nyasaye.

³¹Omwisaaliisi asambile amasinya ako khushimalilo shiemisango, nebutswa itakata ahelesie Haroni nabasianibe.

³²Eshiatakho shieshilenje eshisaatsa shihaanwe khumwisaaliisi shinga eshihaanwa eshiahule.

³³Khu omwisaaliisi ouhaana amalasile nende amasinye komusango okwokhureera omulembe okwo.

³⁴Itakata neshihaanwa eshiahule, nashio eshiatakho shieshilenje shisaatsa neshihaanwa eshiahule eshia isie OMWAMI Nyasaye ndabukula okhurula khu Abaisiraeli neshihelesia abesaaliisi.

³⁵Kuno nikwo omukabo okwa isie OMWAMI Nyasaye ndahelesia Haroni nabasianibe okhurula khumisango chianje emisambe, okwabalaamilwa okhurula khunyanga eyandabahulila okhukhalabana shinga abesaaliisi banje.

³⁶Khandi isie OMWAMI Nyasaye ndalachilisia mbu abandu ba Isiraeli bahelesinjie abolwibulo lwa Haroni ebindu ebio okhurula khunyanga yabaahulilwakhwo. Okhuula bakholenje bario mutsinzibulo tsiabwe tsiosi.”

³⁷Ako niko amalako kemisango emisambe, echieimele, echiobwonooni, echieshikha, echiokhwahulwa, nende echiokhurera omulembe.

³⁸Ako niko amalako ako OMWAMI Nyasaye yalachilisia Musa khushikulu shia Sinai, khunyanga eya yaboolela abandu ba Isiraeli okhureerera OMWAMI Nyasaye emisango olwa bali nibali mushitsiimi shia Sinai.