Read wanga ABALAWI 8 Bible Online

ABALAWI 8 - wanga bible

ABALAWI 8

¹OMWAMI Nyasaye naboolela Musa ari,

²“Bukula Haroni nende abasianibe, nende ebifwalo biobwisaaliisi ebio, nende amafura kokhutsushilila ako, nende Ihunwa yomusango kwobwonooni eyo, nende amamiiku kabili ako nende eshimwelo nishilimwo emikaate chibulamwo limela eshio.

³Mana olanje abomukhung'ano boosi betse hamuliango weliheema litakatifu.”

⁴Mana Musa nakhola shinga olwa OMWAMI Nyasaye yamulachilisia, nabo abomukanda nibakhung'ana hamuliango weliheema elo.

⁵Mana Musa naboolela abomukhung'ano abo ari, “Kano niko aka OMWAMI Nyasaye alachilisiye mbu kaholwe.”

⁶Mana Musa nareera Haroni nabasianibe imbeli womukhung'ano, nabo nibeyosia namaatsi okhwilafia.

⁷Musa nafwala Haroni lishati nende ikanzu, namuboya omushipi mushishienjeshie. Musa namufwala ifoti[1], Ne namuboha mushishienje obutinyu nomushipi okwanyukhwa khuifoti eyo.

⁸Mana Musa namufwala iloloti eyo khushilifu, ne mukari mwayo naramwo amachina kabili aka Urimu nende Tsumimu[2].

⁹Musa namufwala eshilemba khumurwe, ne imbeli washio, nashirakhwo eshimuli shieitsahabu, eshili olusimbi olutakatifu, shinga olwa OMWAMI Nyasaye yali namulachilisia.

¹⁰Mana Musa nabukula amafura kokhutsushilila, natsushilila liheema litakatifu, nende biosi ebiali mulio; ne munjila eyo nabiahula okhuba ebia OMWAMI Nyasaye.

¹¹Mana Musa nabukulakhwo khumafura ako nakahanya okhuula musafu khushimalilo shiemisango nende ebimanulwa biashio, nende khwibeseni neshichibi shalio, khulwa okhubiahula khu OMWAMI Nyasaye.

¹²Mana niyahula Haroni khulwa okhumutsushilila amafura ako khumurwe.

¹³Olunyuma Musa nareera abasiani ba Haroni imbeli womukhung'ano, nabafwala amashati, nababoha omushipi mubishienje biabwe nende okhubaboha tsikofia kumirwe chiabwe, shinga OMWAMI Nyasaye yali nalachilisiye.

¹⁴Mana Musa nareera ihunwa yomusango kwobwonooni; Haroni nabasianibe nibatiila emikhono chiabwe kumurwe kweihunwa eyo.

¹⁵Musa nachisinza, nabukula khumalasile kayo nolwalalwe nakabakha khutsinzika tsieshimalilo shiemisango tsimbeka tsiosi khulwa okhushisiiya. Ne nasundula amalasile katong'a hasi weshimalilo shiemisango. Kho munjila eyo nashiahula nende okhushitisa.

¹⁶Ne Musa nabukula amasinya koosi akali khumala, nende khushitakhaliira, netsifuko tsiombi, namasinya katsio; mana nabisambila khushimalilo shiemisango eshio.

¹⁷Nebutswa yasamba nomulilo ihunwa, neliseelo liayo, neinyama yayo, nobuse bwayo yasamba nomulilo, elwanyi weikambi shinga olwa OMWAMI Nyasaye yali namulachilisiye.

¹⁸Mana Musa nareera khandi limiiku eliomusango okwokhusambwa. Haroni nabasianibe nibara nibatila emikhono chiabwe khumurwe kwalio.

¹⁹Naye Musa nalisinza, namiitsa amalasile kalio khushimalilo misango tsimbeka tsiosi.

²⁰Ne olwa limiiku elo liatonywamwo ebitonye, Musa yasamba omurwe kwalio, nende ebitonye bialio namasinya kalio.

²¹Mana niyosia amala nende ebilenje bialio namaatsi. Ne nasamba limiiku liosi khushimalilo shiemisango shinga omusango okwokhusambwa, okwa isakakha, eyomusango kukholilwe nomulilo khu OMWAMI Nyasaye, shinga olwa OMWAMI Nyasaye yali nalachilisiye Musa.

²²Mana Musa nareera limiiku liakhabili elia okhwahulwa. Naye Haroni nabasianibe nibatila emikhono chiabwe khumurwe kwalio.

²³Musa nalisinza, nabukula khumalasile kalio nakabakha khubutsunzu bweshirwi shia Haroni shiomukhono musaatsa, nende khulwala lukali lwomukhono musaatsakwe nende olwala olukali lweshilenje eshisaatsashie.

²⁴Nareera abasiani ba Haroni nababakha namala khumalasile ako khubutsunzu bwebirwi biabwe, tsinzala tsingali tsiemikhono misaatsa chiabwe nende tsinzala tsingali tsiebilenje biabwe ebisaatsa. Ne Musa nahanya amalasile katong'a tsimbeka tsiosi tsieshimalilo shiemisango.

²⁵Ne nabukula amasinya nende isembe nende amasinya koosi akali khumala, nende akali khushitakhaliira, netsifuko tsiombi namasinya katsio neshiatakho eshisaatsa.

²⁶Khandi nabukula omukaate okhurula mushimwelo shiemikaate chibulamwo limela, echiahulilwa OMWAMI Nyasaye, nabukula eliandasi libulamwo limela, nende liandasi limukate okwakasibwa namafura nende eshisikuti shilala mana nabira biosi khumasinya nende khushiatakho eshisaatsa eshio.

²⁷Mana nara ebindu ebio biosi mumikhono chia Haroni nende abasianibe, ne nabichela shinga omusango kwokhuchelwa imbeli ewa OMWAMI Nyasaye.

²⁸Mana Musa nabibukula okhurula mumikhono chiabwe, nabisambila khushimalilo shiemisango nende omusango omusambe shinga omusango okwa okhwahulwa, kube isakakha indayi, eyomusango omusambe khu OMWAMI Nyasaye.

²⁹Ne Musa nabukula itakata nachichela shinga omusango kwokhuchelwa imbeli ewa OMWAMI Nyasaye, nishio eshiali eshitonye shia Musa shielimiiku liomusango okwokhwahulwa. Mana Musa nakhola ebindu biosi shinga OMWAMI Nyasaye yamulachilisia.

³⁰Mana Musa nabukula khumafura akokhutushilila nende khumalasile akali khushimalilo shiemisango, nakahanya khu Haroni nende ebifwalobie nende khubasianibe halala nebifwalo biabwe. Mana munjila eyo nabahula bo abeene halala nebifwalo biabwe khu OMWAMI Nyasaye.

³¹Ne Musa naboolela Haroni nabasianibe ari, “Muteshele inyama yino hamuliango kweliheema litakatifu, mana muchilileho nende omukaate okuli mushimwelo shiomusango okwokhwahulwa shinga olwa OMWAMI Nyasaye yalachilisia.

³²Ne ebitong'a khumukate nende inyama, mubisambe nomulilo.

³³Ne khulwa tsinyanga musafu shimularula elwanyi womuliango okwa liheema elo tawe, okhuula olwa tsinyanga tsiokhwahulwa khwenywe tsilaba nitsihwele.

³⁴OMWAMI Nyasaye yakhulachilisia okhukhola shinga olwa khukholile olwa leelo khulwa okhumutisa inywe.

³⁵Mulatong'a hamuliango weliheema litakatifu khulwa tsinyanga musafu eshiteere neshilo nimukholanga aka OMWAMI Nyasaye alachilisiye okhukhola. Ne nimulakhola murio ta, mulafwa. Ako niko aka OMWAMI Nyasaye yandachilisiye.”

³⁶Mana Haroni nabasianibe nibakhola koosi aka OMWAMI Nyasaye yabalachilisia okhubirila khu Musa.