Read wanga ABALAWI 9 Bible Online

ABALAWI 9 - wanga bible

ABALAWI 9

¹Khunyanga yomunane yelisabo liokhwahulwa elo, Musa yalanga Haroni nabasianibe nende abakofu ba Isiraeli.

²Ne naboolela Haroni ari, “Bukula ihunwa yomusango kwobwonooni nende limiiku liomusango omusambe ebilalikhwo nobulema bwosi ta, mana obihaane khu OMWAMI Nyasaye.

³Mana oboolele abandu ba Isiraeli babukule imbusi ikhole khulwa omusango kwobwonooni eshimoosi nende eshimeme shielikondi biosi ebiomuyika mulala ebilalalikhwo obulema bwosi bwosi ta, khulwa omusango omusambe.

⁴Babukule khandi iheyi nende limiiku khulwa omusango kwokhureera omulembe. Babihaane khu OMWAMI Nyasaye nende omusango kweimele yitsokasibwe namafura. Okhuula bakhole kano shichila inyanga yino OMWAMI Nyasaye alabaloleshela.”

⁵Mana nibareera imbeli weliheema litakatifu ebindu biosi ebia Musa yali nababoolele. Abomukhung'ano boosi nibakhung'anilaho khulwa okhwinamila OMWAMI Nyasaye.

⁶Mana Musa nababoolela ari, “Kano niko aka OMWAMI Nyasaye amulachilisiye okhukhola, kho mbu oluyalilwe lumuloleshele okhubirira mubulafu obukhongo bwokhubahokhwe.”

⁷Musa naboolela Haroni ari, “Tsia hashimalilo shiemisango ohaane omusangokwo kwobwonooni nende omusangokwo omusambe, khulwa okhwitisa iwe omwene nende abandu. Mana oreere omusango kwabandu, obakholele eshitiso shinga olwa OMWAMI Nyasaye alachilisiye.”

⁸Kho Haroni nasita hambi khushimalilo shiemisango, nasinza eshimoosi shiomusangokwe omwene okwobwonooni.

⁹Nabo abasianibe nibamureerela amalasile, naye niyeenamwo olwalalwe nakabakha khutsinzika tsieshimalilo shiemisango; Ne amalasile katong'a nakatsukha hasi weshimalilo shiemisango.

¹⁰Nebutswa amasinya nende tsifuko nende amasinya kokhushitakhaliira ebiomusango kwobwonooni, yabisambila khushimalilo shiemisango shinga OMWAMI Nyasaye yalachilisia Musa.

¹¹Ne inyama, nende liseelo yabisamba nomulilo elwanyi weikambi.

¹²Mana Haroni nasinza isolo eyomusangokwe omusambe. Abasianibe nibamuleelera amalasile, nakahanya tsimbeka tsiosi tsiokhushimalilo shiemisango.

¹³Nibamureerela eshitonye shilala shiashilala shieisolo eyo nende omurwe kwayo naye nabisambila khushimalilo shiemisango.

¹⁴Mana niyoosia amala nende ebilenje, ne nabisambila halala nomusango omusambe okwo khushimalilo shiemisango.

¹⁵Olunyuma lwako Haroni nareera omusango kwabandu. Nabukula imbusi yomusango kwabandu kwobwonooni, nachisinza, ne nachihaana shinga olwa yali nakholile omusango kwobwonoonibwe omwene.

¹⁶Ne nareera isolo yomusango omusambe nachihaana okhulondana nelilako.

¹⁷Mana nareera omusango okweimele, ne nafumbarakhwo khubusie obwo ne nabusambila khushimalilo shiemisango. Kuno kwali okwokhumeeta khumusango omusambe okwa buli mumabwibwi.

¹⁸Haroni khandi nasinza iheyi nende limiiku ebiomusango okwokhureera omulembe khulwa abandu. Nabo abasianibe nibamureerela amalasile, naye nakatsushilila khushimalilo shiemisango tsimbeka tsiosi.

¹⁹Ne nara amasinya aka iheyi nende aka limiiku, aka isembe, nende amasinya kafwiimbanga khumala, nende tsifuko, nende akali khushiini,

²⁰nende khu itakata, ne nabiyila biosi khushimalilo shiemisango nabisambilakhwo.

²¹Ne nahaana tsitakata nende ebiatakho biebilenje bisaatsa shinga omusango kwokhuchelwa imbeli wa OMWAMI Nyasaye, shinga olwa Musa yali nalachilisiye.

²²Mana Haroni nachinguula amakhonoke ikulu nalenjesiye khubandu mana nabalamila ikhabi. Niyakhamala okhukhola omusango okwobwonooni nende omusambe nende okwokhureera omulembe yekha hasi okhurula khushimalilo shiemisango.

²³Mana Musa nende Haroni nibenjila mwiheema litakatifu; ne olwa barulamwo balamila abandu ikhabi, ne oluyali olwa OMWAMI Nyasaye niluloleshela abandu boosi okhubirira mubulafu obukhongo muno.

²⁴Ne bwangu omulilo nikurula khu OMWAMI nikusamba omusango nende amasinya akali khushimalilo shiemisango, ne olwa abandu boosi balola ako, bayula, nibakwa hasi mafumama nibenamila OMWAMI Nyasaye.