Read wanga YEREMIA 1 Bible Online

YEREMIA 1 - wanga bible

YEREMIA 1

¹Kano niko amakhuwa ka Yeremia omusiani wa Hilikia yaboola, owali mulala khubesaaliisi belitookho lia Anatsotsi mulukongo lwa Benjamini.

²OMWAMI Nyasaye yaboola nende Yeremia mumuyika kwekhumi nakhataru, Yosia omusiani wa Amoni nali omuruchi wa Yuda.

³Khandi yaboola ninaye olwa Yehoyakimu omusiani wa Yosia yali omuruchi wa Yuda. OMWAMI Nyasaye yaboola nende Yeremia akhandi akhanji okhuula khumuyika kwekhumi namulala kwoburuchi bwa Zedekia omusiani wa Yosia omuruchi wa Yuda. Mumwesi kwakharano omuyika okwo, abandu ba Yerusalemu batiilwa nibayilwa mubuhambe.

⁴OMWAMI Nyasaye yamboolela ari,

⁵“Ndakhumanya neshili kata okhukhulonga munda mwa mamawo, khandi ndakhwahula noshili okhwibulwa. Ndakhulobola okhuba omulakusi khubamahanga.”

⁶Nasi nemukalusia endi, “OMWAMI Nyasaye, shimanyile okhulomaloma ta, khandi eshili butswa omwana omutiiti.”

⁷Nebutswa OMWAMI Nyasaye yamboolela ari, “Shiolaboolakhwo mbu, oshili omwana tawe. Okhuula olatsia khubandu boosi abekhurumakhwo, khandi olarumbula koosi akekhulachilisia.

⁸Shiolabariakhwo ta, okhuba ndalabetsanga ninawe okhukhulinda. Nolwa isie OMWAMI Nyasaye emboola.”

⁹Mana OMWAMI Nyasaye nanyiila omukhonokwe natiila khumunwa kwanje naboola ari, “Lola, endeere amakhuwa kanje mumunwakwo.

¹⁰Inyanga yino, ekhuhelesiye obunyali khumahanga nende khuburuchi, oli nobunyali okhukasiula nende okhukalikulula, okhukasasia nende okhukarusia khuburuchi, okhukombakha nende okhukaralisia.”

¹¹OMWAMI Nyasaye niyareeba ari, “Yeremia, nishiina eshiololanga?” Nasi ningalusia endi, “Lisaka liomusaala kwomulusi.”[1]

¹²OMWAMI Nyasaye niyamboolela ari, “Oboolile habwene. Ne bulano enindililanga okhulola amakhuwa kanje nikaba nikosibwa habwene.”

¹³OMWAMI Nyasaye niyareeba khandi ari, “Nishiina eshindi eshiololanga?” Nasi ningalusia endi, “Endolanga inyungu, eyitekhungwa, eya amaatsi kapapachilangamwo eyifutarire elubeka lwemasaba.”

¹⁴OMWAMI Nyasaye niyamboolela ari, “Amatinyu kalarulilila Emasaba nikakwiila abandu boosi abamenyanga khushialo.

¹⁵Lola! Enanga amahanga kemasaba koosi okhwitsa. Ne buli mulala khubaruchi babwe alekhasia eshifumbishie shioburuchi hashilibwa shielitookho lia Yerusalemu. Balaseera amasiisi kalio koosi nende amataala keshialo shia Yuda koosi.

¹⁶Nasi ndalahelesia Abaisiraeli eshinyasio shichila bandekha, nibasambila abanyasaye bandi obubaane nende okhwinamila ebifwanani biabeene bakaasia.

¹⁷Bulano iwe Yeremia, wirecheshe. Tsia obaboolele amakhuwa koosi akekhulachilisia. Shiolabariakhwo ta, ne nobaria ndalakhukhola okhuba omuri muno imbeli wabwe.

¹⁸Inyanga yino ekhukhola okhuba owamaani shinga litookho liabotokhanwa nolukoba, okhuba isiilo yeshibia nende lisiisi liomukasa, khulwa okhuyinga abaruchi beshialo shia Yuda shiosi, abakhongo bashio, abesaaliisi bashio nende abandu bashio boosi.

¹⁹Balakhulwana, nebutswa shibalakhuhula ta, okhuba endi ninawe khandi ndalakhuhonokosia. Nolwa isie OMWAMI Nyasaye emboola.”