Read wanga YEREMIA 10 Bible Online

YEREMIA 10 - wanga bible

YEREMIA 10

¹Hulile likhuwa elia OMWAMI Nyasaye amuboolela inywe abeinzu ya Isiraeli

²kano niko aka OMWAMI Nyasaye aboola mbu muleeka emiima chiamahanga kandi ta kata mulahuchisibwe khubilolelo biomwikulu, olwa kata amahanga kandi kahuchisibwe ninabio ta.

³Okhuba idiini ya abandu bano yibula inganga. Omusaala kuremungwa mumutsuru nikukwa, kubatsungwa nende ebikholelo biomubaatsi.

⁴Basiayangakhwo ifeetsa nende itsahabu kukhomungwa kutinya nemisumari nende inyundo mbu kuleshe okhusikukha nikukwa.

⁵Ebifwanani ebio bili shinga omuhomo kwokhurisia amanyonyi mumukunda kwamahondo, shibinyala okhuboola ta, okhuula bichingwe okhuba shibinyala okhuchenda ta. Mulabirie ta shibinyala okhukhusalisia ta noho kata okhukhukhola likhuwa liosi lilayi ta.

⁶Iwe OMWAMI Nyasaye, abulaho oufwanana ninawe, oli omukhongo muno khandi obunyali bweliiralio nobukhongo.

⁷E omuruchi owa amahanga, niwiina oulanyala okhuria ta? Okhuba nikhwo okhukhoyeele iwe mubachesi bosi abamahanga nende mubaruchi bwabwe bosi abulaho ouli shinga iwe.

⁸Bosi nabayingwa khandi babula obuchesi bechesibungwa nebifwanani ebibaatse ebio ebibula inganga.

⁹Ebifwanani ebio nibisiayilwekhwo ifeetsa eyeeranywa okhurula Tarishishi nende itsahabu okhurula mushialo shia Ofiri, biosi nemilimo chia aberanyi bobusitsa babifwalile ebifwalo ebiranzayi nende ebieisabarau, ebianabwa nabanabi bobusitsa.

¹⁰Ne OMWAMI Nyasaye niye Nyasaye watoto, niye Nyasaye ouliho mwoyo omuruchi weinziayo. Olwa aba neliruma eshialo shitechelanga nako amahanga shikanyala okhwisimilisilia lirumalie ta.

¹¹“Baboolele ori, ‘Abanyasaye bano abalaalonga likulu nende eshialo ta, bakhasishe okhurula khushialo nende hasi welikulu.’ ”

¹²Nebutswa Nyasaye niye owalonga eshialo nobunyalibwe yaraho eshialo nobuchesibwe yabambula likulu nobumanyilisibwe.

¹³Olwa ayiiba nomwoyo omukhongo amaatsi akali mwikulu kahoola aleranga amaleesi akolucheka okhurula khundulo weshialo. Aleranga oluhenu halala neifula mana alera omuyeka okhurula mwibishilo mwakwo.

¹⁴Buli mundu abula obuchesi khandi nomuyingwa. Buli omwiranyi oweitsahabu afimbibwe omurwe nebifwananibie ebio Ebifwananibie ebio nobiobubeeyi obukhaya bibula obulamu mubio.

¹⁵Shibilikhwo ebieinganga yosi ta nebiobubeeyi butswa bilasasibwa olwa OMWAMI Nyasaye yetsa okhubahelesia eshinyasio.

¹⁶Nebutswa Nyasaye wa Yakobo shiali shinga ebifwanani ebio ta, okhuba niye owalonga ebindu biosi, mana yaahula Isiraeli okhuba abandube mwene. Eliiralie niye “OMWAMI Nyasaye omwene mahe.”

¹⁷Khung'asie emiandu chienywe, inywe ababotokhanwe.

¹⁸Okhuba OMWAMI Nyasaye aboola mbu, khushise eshio ndalarusia nebasukuna elwanyi weshialo shino, abo abamenyanga mushio khandi ndalabakhupia khushibi, mana bosi banyoole obutsuuni.

¹⁹Woowe isie Yerusalemu okhuba esalisibwe! Amafumire kanje namabi muno! Nebutswa nemboola mbu, toto mwene kano koosi namateemo ne okhuula ekesimilisie.

²⁰Liheema lianje lisasulwe emikoye chialio, chiosi chikhalisbe abaana banje bosi bandeshile nibatsia, ne shibashiliho tawe Abulaho oulalisinjia liheema lianje khandi, noho wokhuachikha tsingubo tsinzeelesia ta.

²¹Nasi Yeremia nemboola mbu, Abaayi bakwiile abayingwa shibareeba amebaalo okhurula khu OMWAMI Nyasaye ta, khulweshio, shibalaba nobutsililili obulayi ta nako amakondi kabwe kalasalasibwa.

²²Rechelesie! Oburume bwitsanga, obukoyanu obukhongo bwitsanga okhurula elubeka lwemasaba. Okhukwisia amatookho ka Yuda amakunda kalakwa eshimwenyo shia amabwe.

²³OMWAMI Nyasaye, emanyile mbu, abulaho omundu ouli nobunyali khubulamubwe. Abulaho omundu ounyala okhwimilila obulamubwe.

²⁴E OMWAMI Nyasaye okhukalusie mubulunjishi nebutswa olakhulunjisia neliruma ta kata nobululu ta, khwakhasikha.

²⁵Sundula obululubwo khu amahanga akalakhwinamilanga iwe ta, nende khubandu abalakhumanyilisinjia iwe ta. Okhuba bamulula abolwibulo olwa Yakobo Babamulula nokhubamalilana elala, mana nibalekha eshialo shiabwe okhutong'a amachinjini.