Read wanga YEREMIA 11 Bible Online

YEREMIA 11 - wanga bible

YEREMIA 11

¹OMWAMI Nyasaye yaboolela omulakusi Yeremia ari,

²“Hulila amakhuwa keindakano yino mana otsie oboolele abandu ba Yuda nende abamenya mwitookho lia Yerusalemu.

³Obaboolele mbu, kano niko aka OMWAMI Nyasaye wa Isiraeli aboola mbu, ali mushilaamo shiobubi omundu yesi ouloba okhulonda amalako keindakano yino.

⁴Yino niyo indakano yandakaasia nende abakuuka benywe olwa ndabarusia mushialo shia Misiri, eshialo eshiabasamba obululu muno shinga omulilo kwomwirumbi. Ndabalachilisia okhumbulila nende okhukhola buli shindu eshia ndabalaka. Ndababoolela mbu, nibaba nibambulila, balaba abandu banje, nasi ndalaba Nyasaye wabwe.

⁵Nibaba nibalonda amalako ako, emba ndaloosia obusuubisie bwandasuubisia abakuuka babwe mbu, ndakhabahelesie eshialo eshiyinda khandi eshinulu, eshia bulano bali ninashio.” Nasi ningalusia endi, “Kabe kario OMWAMI Nyasaye.”

⁶OMWAMI Nyasaye niyamboolela ari, “Rumbula obutinyu amalako keindakano yino, mumatookho ka Yuda nende khutsinjila tsia Yerusalemu. Oboolele abandu balonde nibakhola amalachilisio keindakano yino.

⁷Okhurula khushise shia ndarusilia abakuuka benywe Misiri, okhuula olwa leelo, enzilililanga okhubachetsiyia ningalushila mbu, ‘Muuritsenje.’

⁸Nebutswa shibalonda amebaalo kanje kata okhumbulila ta. Buli mulala khubo yatsiililila okhuba omukhayi khandi omumayaanu. Kho ndabahelesia eshinyasio okhulondana namalachilisio keindakano yino, eya ndabalachilisia mbu bachilonde, nebutswa baloba.”

⁹Mana OMWAMI Nyasaye niyamboolela mbu, “Abandu ba Yuda nende abamenyanga mu Yerusalemu, basanjilananga okhuukholela induli.

¹⁰Bakalushiile okhukhola obwonooni bwabakuuka babwe, abakhaya okhuhulila amalako kanje. Benamiile nende okhukhalabanila abanyasaye bandi. Aboluyia lwa Isiraeli nende lwa Yuda boosi bafunaache indakano yanje, eya ndakaasia nende abakuuka babwe.

¹¹Khulwako, isie OMWAMI Nyasaye endaka mbu, ndalabareerera amasira akabalanyala okhwihonokosia ta. Kata olwa betsa okhuhabila, shindalahuhulila ta.

¹²Mana abomumatookho ka Yuda nende abamenyanga mu Yerusalemu balatsia okhuhabila abanyasaye bandi aba basambilanga obubane, nebutswa abanyasaye abo shibanyala okhubahoniakhwo khunyanga ya amasila ako kata nahatuutu ta.

¹³Abanyasaye benywe inywe abandu ba Yuda nabanji shinga obunji bwamatookho kenywe. Khandi shinga obunji bwemihanda chia Yerusalemu buli, nolwa mwakaasia ebimalilo biemisango chieshisinyo; ebimalilo biemisango chiokhusambilakhwo omunyasaye Baali obubane.

¹⁴Khulwako, iwe Yeremia, olaahabilakhwo khulwa abandu bano kata okhubeekhuulila noho okhubasaayila ta, okhuba shindalabahulila olwa baahabila khunyanga ya banyoola amasila kabwe tawe.”

¹⁵OMWAMI Nyasaye areeba ari, “Abandu ba ndaheela bali nobunyali shiina bwokhwinjila muhekalu yanje olwa baba nibakhola obumayanu? Bapaaranga mbu ebitsubo nende inyama yemisango binyala biekalila amasila kaleshe okhubakwila? Ako kanyala toto okhubasangasia bo?

¹⁶Khale isie OMWAMI Nyasaye ndali nindabakulikha mbu, ‘Omuseituni omutendeemu khandi omukaasu okuli nebiamo ebilayi.’ Nebutswa bulano nokhukukuma okhukhongo shinga okhwelikulu, ndalakusamba nomulilo, nako amasaka kakwo kalayia nikafululukha koosi pe.

¹⁷Isie OMWAMI Nyasaye omwene mahe, owamuraaka shinga omusaala, emalile okhulaka amasila khuboluyia lwa Yakobo nende lwa Yuda, khulwa okhubeela obumayanu bwabwe obwokhusambila omunyasaye Baali obubane obwabuusia liruma lianje.”

¹⁸OMWAMI Nyasaye yamanyia, nasi nemanya, yamanyia obumayanu bwabwe obwa bali nibatutanga okhuukholela.

¹⁹Nebutswa ndali butswa shinga likondi liholo eliyilwa okhusinzwa. Shindamanya mbu barechekhanga okhunzira, olwa baboola bari, “Chende khusasie omusaala nebiamo biakwo, chende khumurusieho mushialo shiabali mwoyo, kho mbu aleshe okhwitsulilwakhwo khandi ta.”

²⁰Nebutswa bulano OMWAMI Nyasaye omwene mahe, iwe ouyaasinjia habwene khandi ouchelenga amapaaro nende obuchesi bwabandu, chama endolekhwo eshikwolishio khubo, okhuba endeere amakhuwa kanje imbeliwo.

²¹Khulweshio OMWAMI Nyasaye omwene mahe aboola khubandu bolukongo lwa Anatsotsi abakhabanga okhunzira nibaboola bari, “Shiolalakulakhwo muliira elia OMWAMI Nyasaye ta, nolakula khuba khulakhwiira.”

²²OMWAMI Nyasaye omwene mahe aboola ari, “Lola, ndalabahelesia eshinyaasio. Abaraaka baleerwa mwihe, nabo abaana babwe abasiani nabakhaana baleerwa neinzala,

²³abulaho kata mulala oulahonokokha ta. Okhuba khumuyika kweshinyaasio, ndalareera amasila khubandu ba Anatsotsi.”