Read wanga YEREMIA 12 Bible Online

YEREMIA 12 - wanga bible

YEREMIA 12

¹Iwe OMWAMI Nyasaye, iwe oli omulunjishi, kata nimba nikhwiyiniakanilanga. Nebutswa enzenya okhureera amalilo kanje imbeliwo; Eshichilanga abamayaanu nibanyalilwa mumakhuwa kabwe nishiina? Mbushiina abeshikhalikhali baralilanga?

²Wabaraaka mana nibarombookha, bakhula nibaama ebiamo, nomunwa baboola amakhuwa amalayi khwiwe, nebutswa mumioyo chiabwe bali ehale khwiwe.

³Nebutswa iwe OMWAMI Nyasaye wamanya isie, ololanga injenda yanje, khandi wandeema okhulola nimba nindakhuheela. Khwesa noyiniaho abandu abamayanu bano shinga amakondi akatsia okhusinzwa! Obaahulile inyanga yokhutsia okhusinzwa!

⁴Eshialo shiefwe shilekhuula khulwa eshimiyu okhuula liina? Nabwo obunyasi buli mumukunda bulatsiililila okhuniala okhuula liina? Tsisolo nende amanyonyi bifwitsanga khulwa okhubeela obumayanu bwabandu befwe, okhuba abandu baboolanga mbu, “Nyasaye shialolanga aka khukholanga ta.”

⁵OMWAMI Nyasaye areeba ari, “Noba niwilukhana nomundu owilukha khubilenje, ne nochoonya, kho wakhelukhana orie netsifarasi? Noba niwisichirala nokwa mushialo eshiangalamwe, kho olaba orie mushialo eshiemitsuru emikhongo shia Yorodani?

⁶Okhuba kata abasiani benywe, abeinzu yenywe beene bakhukhobanga iwe, bakhuyinganga habulafu. Shiolabasubililakhwo kata olwa baboola amakhuwa amalayi khwiwe tawe.”

⁷OMWAMI Nyasaye aboola ari, “Ndaleshile abandu banje, ndalobile abandu belihanga lianje eliahule. Ndahanile abandu bandaheela mumakhono kabasuku babwe.

⁸Abandu banje abahule bangalukhanekhwo, bali shinga italanyi mushitsiimi. Baahoolelangakhwo, niko akachila nebasila.

⁹Abandu banje abaahule bali shinga linyonyi, eliyimungwa okhurula tsimbeka tsiosi namahungu. Tsie mulanje tsisolo nabulimo tsiosi, tsitse tsilie lisabo.

¹⁰Abaayi abanji basasiiyie omukunda kwanje kwemitsabibu. Batubanjiliile omukunda kwobuyinda bwanje nebilenje. Bakwisiye omukunda kwanje omunulu okhuba eshiangalamwe.

¹¹Bakukwisiye likunda, kutoonyile eshikhaya khandi kuhabila. Eshialo shiosi shikwisibwe likunda, nebutswa abulaho outeebakhwo likhuwa.

¹²Khubutenje bwebikulu ebili mushitsiimi, abandu betsile abokhusasia. Olukanga lwanje lumululanga okhurula khundulo weshialo okhuula khundulo khundi. Abulaho ouli nomulembe.

¹³Abandu banje baraaka ingano, nebutswa bachesa oluyongo; Bakhalabana namaani koosi, nebutswa shibanyoolakhwo eshindu shiosi ta. Khulwa okhubeela liruma lianje, ebirache biabwe biabachesa bilabafwimbia omurwe abeene.”

¹⁴OMWAMI Nyasaye aboola khubamenyani abamayanu babandube ari, “Inywe mwonooniye obulaame bwanje obwa ndahelesia abandu banje ba Isiraeli, khulwako ndalamurusia mushialo shiabwe. Ndalarusiamwo kata aboluyia lwa Yuda.

¹⁵Nebutswa olunyuma lwokhubarusiamwo ndilibalolela eshisa khandi, ndilikalusia buli lihanga mushialo shialio.

¹⁶Ne nibaba nibafuchilila nomwoyo kwosi okhweka tsinjila tsia abandu banje khandi nibetsuba nibaboola bari, ‘Shinga olwa OMWAMI Nyasaye aliho mwoyo,’ shinga olwa ndechesia abandu banje okhwitsuba okhurula khumunyasaye Baali, kho boosi khandi balaralila hakari wabandu banje.

¹⁷Nebutswa lihanga liosi elikhaya okhumbulila ndalaliyiniaho nende okhulisishia liosi pe. Nolwa isie OMWAMI Nyasaye emboola”.