Read wanga YEREMIA 13 Bible Online

YEREMIA 13 - wanga bible

YEREMIA 13

¹OMWAMI Nyasaye yamboolela ari, “Tsia okule eshikhonelo Eshieikitani, oshibohe mushishienje, nebutswa olashiinikha mumaatsi tawe.”

²Kho ndatsia nengula eshikhonelo ne nindiboha mushishienje shianje shinga olwa OMWAMI Nyasaye yali niyandachilisiye.

³OMWAMI Nyasaye niyamboolela olwa khabili ari,

⁴“Bukula eshikhonelo eshia wakula shia wiboyele mushishienje mana otsie khumwalo kwa Yufurate oshibise mumbinga mutsinyanda.”

⁵Kho nenzia neshibisamwo shinga olwa OMWAMI Nyasaye yali niyandachilisiye.

⁶Ne olunyuma lwetsinyanga tsinyinji, OMWAMI Nyasaye yamboolela ari, “Tsia bulano khumwalo kwa Yufurate obukule eshikhonelo shia ndakhulaka okhubisayo.”

⁷Mana nenzia khumwalo kwa Yufurate neyabulula eshikhonelo eshio okhurula mumbinga mwa ndali nindashibisa, nebutswa olwa ndashirusiamwo shiali nishionooneshile, nishibulakhwo inganga.

⁸Mana OMWAMI Nyasaye niyamboolela ari,

⁹“Isie OMWAMI Nyasaye emboola mbu, shinga olwa eshikhonelo shino shionoonekha nolwa enzia okhusasia obwichinjimisi bwa Yuda nende isunga ya Yerusalemu.

¹⁰Abandu abamayanu bano, abakhaya okhuhulila amalako kanje, abaloondanga akobwenyi bwomumioyo chiabwe khandi abenamilanga abanyasaye bandi balaba shinga eshikhonelo shino eshibulakhwo inganga yosi.

¹¹Okhuba, shinga olwa eshikhonelo shitinyanga mushishienje shiomundu nolwa ndahambaana nabandu boluyia lwa Isiraeli nende olwa Yuda, kho mbu babe abandu banje, banzitsoominjie nende okhulolesia oluyali lweliira lianje. Nebutswa shibayambulila tawe.”

¹²OMWAMI Nyasaye, Nyasaye wa Isiraeli niyamboolela ari, “Yeremia, boolela abandu ba Isiraeli mbu, buli isiongo yitsusibwemwo idivai. Nabo balakhukalusia bari, ‘Opaaranga mbu ifwe shikhumanyile mbu buli isiongo ikhoyele okhwitsusibwamwo idivai ta?’

¹³Nawe obaboolele mbu, OMWAMI Nyasaye aboola ari, ‘Ndalabameesia nende idivai abandu abamenyanga mwihanga lino liosi, abaruchi abekhalanga khushifumbi shioburuchi shia Daudi, abesaaliisi, abalakusi nende abandu bandi boosi abamenya mu Yerusalemu.’

¹⁴Khandi OMWAMI Nyasaye aboola ari, ‘Nditsa okhubakhupania abeene khu beene, basamwana khubaana babwe abasiani, shindalabakhwo neshisa noho okhubalolela tsimbabasi, mbu endeshe okhubamulula tawe.’ ”

¹⁵Inywe abandu ba Isiraeli recheresie muhulile, mulabe nobwichinjimisi ta, okhuba OMWAMI Nyasaye niye ouboolile.

¹⁶Helesie OMWAMI Nyasaye wenywe oluyali, nashili okhureera eshiilima, khandi nimushili okhwisichirala ebilenje bienywe khubikulu mushiilima eshimali ti. Munayanga okhuba nobulafu, nebutswa alabukalukhasia okhuba eshiilima, alabukhola okhuba eshiilima eshimali ti.

¹⁷Nebutswa nimuba nimulahulila ta, omwoyo kwanje kuba kulalila masilisi khulwa obwichinjimisi bwenywe, natsio tsimoni tsianje tsiba tsilalila amasika obululu nikaroonya hasi. Shichila abandu ba OMWAMI Nyasaye batiililwe nibayilwa mubuhambe.

¹⁸OMWAMI Nyasaye niyamboolela ari, “Boolela omuruchi nende nyinamwana ori, ‘Rule khubifumbi bienywe bioburuchi mwikhale hasi, okhuba olusimbi lwenywe lweing'oono lwoburuchi lufwaluulwe okhurula khumirwe chienywe.’

¹⁹Amatookho kolubeka lwemulambo wa Yuda kamalile okhubotokhanwa, abulaho yesi yesi oukekula tawe. Abandu boosi ba Yuda batiililwe nibayilwa mubuhambe, bayililwe mubuhambe boosi pe.”

²⁰Inywe abandu ba Yerusalemu, chinguule tsimoni tsienywe hekulu mana mulole abo abetsanga okhurula emasaba. Lituuli liemiruko lia mwahebwa okhulinda lili hena? Lituulilio liemiruko emilayi elo lili hena?

²¹Noboole shiina olwa abandu ba wapaaranga mbu nabetsabo, betsa okhukhuhula nibakhuruka? Shiolaba butswa nende obutsuunwi shinga bwomukhasi ulumwa inzubula?

²²Nawe omwene olereeba mumwoyo ori, “Khulwa shiina amatinyu kano nikaanyoola?” Nikhulwa okhubeela obunji bwobumayanubwo, obuchila ebifwalobio nibikunyulwa, nawe nokwibwakhwo nende okhwonoonibwa namaani.

²³Mana omundu omumali weshialo shia Etsiopia yakhanyala okhwikalukhasia obukondo bweshikhobashie, noho ingwe okhwikalukhasia amakondokondo kayo? Kho mwesi inywe abanala okhukhola amabi, shimunyala okhukhola kobulunjishi tawe.

²⁴Khulweshio ndalamusalaasia shinga omukhutsi, okutuumuulungwa nomuyeka kwomushitsiimi.

²⁵OMWAMI Nyasaye aboola ari, “Kano niko akalakhunyoola, eshichelo shiomukabo kwekhuhelesiye iwe, okhuba wanzibilila isie, nosubililila mububatsa.

²⁶Isie omwene ndalakunyula ebiifwalobio, mana eshifwabwishio shiloleshe ebulafu.

²⁷Enduutsi akebikholebio bieshisinyo, obuheyibwo nende obwilaasi bwobutambabwo nibiibakaale habulafu khubikulu. Iwe Yerusalemu, oli mushilaamo shiobubi! Olatsiililila okhuba oweshisinyo orio okhuula liina?”