Read wanga YEREMIA 14 Bible Online

YEREMIA 14 - wanga bible

YEREMIA 14

¹Okhulondanda neshimiyu, OMWAMI Nyasaye yaboolela Yeremia ari,

²“Abandu ba Yuda bekhuulanga, nako amatookho kabwe kasikhanga. Abandu balio bekhuulanga nibakalakala hasi, khandi tsimbungu tsia Yerusalemu tsihulilikhanga.

³Abakhongo balio barumanga abakholi babwe okhureera amaatsi, nabo batsitsanga mutsisebele, nebutswa shibanyoolangamwo amaatsi tawe. Bachelelanga netsisiongo tsiabwe nitsibulamwo amaatsi, bafwimbilwe omurwe khandi bafwile emioyo, befuunikha mumoni mwabwe khulwa tsisoni.

⁴Abalima bafwimbilwe emirwe, khandi befuuniishe tsimoni khulwa tsisoni, okhuba ifula shiyikwitsanga tawe, khandi okhuba eshialo shiafululukha.

⁵Kata eshitsusu mubulimo, shilekha omwana washio omutoro ushili indaana shichila obunyasi shibuliho tawe.

⁶Tsisishili tsianabulimo tsisinjiile khubutenje bwebikulu ebikhaya, tsiheeselanga shinga amabine khulwa okhubula omuya; tsimoni tsiatsio tsilolanga amaweliweli shichila tsibula shia tsilia tawe.

⁷Nabo abandu baboolanga bari, kata lwobumayanu bwefwe bukholanga obuloli khwifwe, Iwe OMWAMI Nyasaye, okhuhabine khulwa oluyali lweliiralio. Okhuba obukori bwefwe nobunji muno, khwakhwonoonela iwe.

⁸Niwe obunaayi bwa Isiraeli; omuhabini wa Isiraeli mubise biamatinyu, nishiina eshiakhachila ololeshe shinga omundu omucheni mushialo shiefwe, shinga omundu ouli muluchendo akotokha habundu okhunyoola ahokhukona khulwa eshilo shilala shionyene?

⁹Nishiina eshiakhachila obe shinga omundu omukoyanu, shinga omundu wamaani ulanyala okhuhonokosia ta? Kata kario, iwe OMWAMI Nyasaye, oli halala ninefwe, nefu khuli abandubo; olakhulekha tawe!”

¹⁰Naye OMWAMI Nyasaye aboola ari, “Abandu bano bachama okhutiimatiima butswa bario, shibeleshesinjiakhwo okhuchendachenda ta. Niko akachila isie OMWAMI Nyasaye shindalabafuchilila okhuba abandu banje ta. Bulano ndaletsulila obumayanu bwabwe, nende okhubahelesia eshinyaashio khulwa obwonooni bwabwe”.

¹¹OMWAMI Nyasaye niyamboolela ari, “Shiolasaayilakhwo abandu bano amalayi tawe.

¹²Kata nibeyima eshiokhulia khulwokhusaaya, shindalahulilakhwo okhuhaba khwabwe ta. Khandi kata nibakhakholela emisango emisambe nende okhuhaana emisango chieimele, shindalabafuchilila ta. Nebutswa ndalabamulula okhubirira mwihe, inzala nende olumbe”.

¹³Nasi nemboola endi, “Iwe OMWAMI Nyasaye, lola, abalakusi bababoolelanga bari, ‘Shimulalolakhwo lihe kata inzala ta, habula mulaba nomulembe kwonyene mushialo muno.’ ”

¹⁴Mana OMWAMI Nyasaye niyangalusia ari, “Abalakusi abo balakulanga akobubeeyi muliira lianje. Isie shindabarumakhwo kata okhubalachilisiakhwo noho okhuboola ninabo tawe. Bamuboolelanga amalolelo kobubeeyi, obufumu bwabutswa, nende obubatsa bwamapaaro kabwe abeene.

¹⁵Khulwako OMWAMI Nyasaye aboolela abalakusi bobubeeyi, abalakulanga muliiralie kata nalaabaruma ta, khandi ababoolanga bari, ‘Lihe nende inza shibilakhwitsilakhwo mushialo shino tawe,’ ari, ‘Ndalamululila abalakusi abo mwihe nende inzala.’

¹⁶Ne abandu balakulilungwa abo, balebalwa khutsinjila tsia Yerusalemu nibafwa khulwa inzala nende lihe, nibabulakhwo kata owokhubayabila, bo beene, abakhasi babwe, nende abaana babwe abasiani nabakhaana. Okhuba ndalabarunga abeene obumayanu bwabwe.

¹⁷OMWAMI Nyasaye yandachilisia okhuboolela abandu bano ari, lekha tsimoni tsianje tsilile amasika eshilo neshiteere, khandi tsilalekhakhwo okhulila ta, okhuba omukhaana omushisila wabandu banje baremilwe nibalekhwa netsimbala tsikhongo muno, banyoolile amasila keshibeela amakali muno.

¹⁸Ninzia ebulafu mushibakala, lola, emilambo chiabandu beeriirwe mwihe nechiliyo! Ne nindinjila mwitookho, lola, amalwale karulana neinzala nakaliyo! Okhuba abalakusi nende abesaaliisi batsiilililanga okhukhola obukhala bwabwe mushialo shiosi, nebutswa shibali nobumanyilisi tawe.”

¹⁹OMWAMI Nyasaye, iwe walobeele Yuda elala? Omwoyokwo kwasinyisiibwe nende Zayuni? Eshichila nokhusaalisia obubi orio, mbu kata shikhunyala okhuhona ta nishi? Khwanaaya okhulola omulembe, nebutswa shikhwanyoolakhwo lilayi liosi ta; khwanaya okhunyoola eshise shiokhuhonibwa, nebutswa lola, khwanyoola amasila.

²⁰Iwe OMWAMI Nyasaye, khwiyama obwonooni bwefwe, nende obumayanu bwabakuuka befwe, okhuba khukhwonoonile iwe.

²¹Khulwoluyali lweliiralio, olakhwibala ta, olafwola eshifumbishio shioburuchi shioluyali ta. Yitsulila indakano ya wakaasia ninefwe, ne olachifunaka tawe.

²²Alikhwoho kata mulala khubanyasaye abobubeeyi bamahanga kandi ounyala okhukwisia ifula? Kata likulu liakhanyala okhukwisia ifula yolunyilila? Iwe shiniwe OMWAMI Nyasaye, Nyasaye wefwe? Niwe obunaayi bwefwe, okhuba niwe oukholanga kano koosi.