Read wanga YEREMIA 15 Bible Online

YEREMIA 15 - wanga bible

YEREMIA 15

¹Mana OMWAMI Nyasaye niyamboolela ari, “Kata Musa nende Samweli nibakhasinjiile imbeli wanje ne nibaasaaya, shindakhabeele neshisa khubandu bano ta. Barusie imbeli wanje. Lekha baruleho batsie!

²Ne nibakhureeba mbu, ‘Khutsie heena?’ Nawe obakalusie mbu isie OMWAMI Nyasaye emboola endi, ‘Abarecheshelwa okhwiirwa nobulwale, balafwa khulwa obulwale, abarecheshelwa okhwiirwa mwihe, balafwila mwihe; abarecheshelwa okhwiirwa neinzala balafwa khulwa inzala, abarecheshelwa okhutiilwa okhuba ababohe, balatiilwa okhuba ababohe.’

³Isie OMWAMI Nyasaye emalile okhurechekha amasila kane kano akokhubasishia; lihe elitsa okhubeera, tsimbwa etsilabanyanyakula, amanyonyi akalababotsokola nende tsisolo nabulimo etsilanyanyakula nitsibasaalisia.

⁴Ndalabakhola babe eshilolelo shiokhurisia khuburuchi bwosi obweshialo, khulwa okhubeela amakhuwa ka Manase omwana wa Hezekia, yakhola Yerusalemu olwa yali nali omuruchi wa Yuda.

⁵OMWAMI aboola mbu, Niwiina oulamubeelelela inywe abandu ba Isiraeli? Niwiina oulamwikhuulila inywe? Niwiina oulasinjila nabiranga khunjila okhureeba akobulamu bwenywe?

⁶Inywe mwandobele, mwandeshele nimukalukha inyuma. Niko akachila ndalamureerera eshinyasio nende okhumusishia. Shienyala okhumulolelakhwo tsimbabasi khandi ta.

⁷Ndalabaseera noluteru hashilibwa shielitookho mushialo eshio. Nditsa okhusishia abandu banje khulwa okhwiirira abaana babwe ehale. Shichila shibekalukhasiye okhulekha obulamu bwabwe obubii ta.

⁸Ndalenjiya abakhasi abalekhwa okhuba abanji okhushila omuyeshe kweinyanza. Ndalareera omumululi mushiteere khubanyinamwana abaraaka. Ndalaleera nebasuendusia nobutsunwi nende amarisia.

⁹Omukhasi owebula abaana musafu nafuma, bulano yetsukhane nabula omwana. Amalile okhuhela emuyiachie echiokhumalilikha, eliubalie limalile okhuyeela olwa shishili eshiteere afimbibwe omurwe nakoyasibwa. Ne abo abashiliho abalamu, ndalabahana beerwe nolukanga nabasuku babwe. Nolwa isie OMWAMI Nyasaye emboola.”

¹⁰Endi omundu weikhabi imbi muno! Eshiachila mama niunzibula khushialo khuno nishiina? Endi omundu wokhusoolana nende okhuyingana nende buli mundu mushialo. Eshili okhuhosiakhwo noho okhwihosia khumundu yesi eshindu shiosi ta, nebutswa buli mundu yanamilaanga eshilaamo shiobubi.

¹¹OMWAMI, ebilaamo biabwe biosi bikhoya toto biandiila, nimba nindilakhukhalabanila obulayi ta; khandi nimba nindilakhusaaya khulwa abasuku banje olwa bali nibali mumanyakhano nende mushibela.

¹²Omundu yanyala okhufunaka eshichuma eshieshibia eshirula emasaba noho kata eshiomukasa?

¹³OMWAMI niyamboolela ari, “Ndalaruma abasuku okhubukula nibayila butswa obulakalusiliakhwo inganga ta, obuyinda nende amabishilo kabandu banje, khulwa okhubahelesia eshinyasio, okhulondana nobwonooni bwabwe, obwa bakhola buli habundu mushialo.

¹⁴Ndalabakhola bakhalabanile abasuku babwe mushialo shia balamanya ta. Okhubela liruma lianje lili shinga omulilo, ne nelisamba inziayo.”

¹⁵Mana nasi nengalusia nemboola endi, “OMWAMI, omanyile mbu, enyakhananga khulwa eliiralio. Helesia abasandinjia eshinyasio! Shiolalekha banzira isie tawe! Ndolelakhwo tsimbabasi mana obakholele akabakwanile okhukholelwa!

¹⁶Iwe OMWAMI Nyasaye omwene mahe, olwa waboola amakhuwako, ndakahulila, mana nikasaangaasia isie, nikaba okokhuchamisia omwoyo kwanje, okhuba isie emanyikhanga khulwa eliiralio.

¹⁷Shindayekhalakhwo nabandu bokhwikhoya nobuyoka ta, kata shindasaangaalakhwo ninabo ta, ndekhala butswa sienyene neshilungwa namaaniko okhuba wanzitsusiamwo obusinyishibwo.

¹⁸Eshichila amanyakhano kanje nikalawa ta nishiina? Kata eshichila amakonzo kanje nikalahona olwa kasilikhwa ta nishiina? Noho toto wakhaba niwangaatia, shinga lwomuchela kwamaatsi kukhamakhamanga mushimiyu?”

¹⁹Mana OMWAMI Nyasaye nakalusia naboola ari, “Noba niungalushila, nasi siesi emba ndalakhukalusia mubulamubwo bwali bwokhuranga, nawe oba olaakhalabanila khandi. Noba noboola amakhuwa amalayi akakhoyeele, nolaboola akobuyingwa ta, oba olaba omundu wokhuboolela amakhuwa kanje nawe noboolela abandu bandi. Abandu baletsanga nibeekhung'asia aha oli, iwe shiolatsiitsanga khubo tawe.

²⁰Ndalakhukhola obe olukoba lwelisiisi liomukasa khubandu bano. Balakhuseera, nebutswa shibalakhuhula ta, okhuba isie endi ninawe, okhukhureesia nekhuhonokosia.” Nolwa OMWAMI Nyasaye aboola,

²¹“Ndalakhureesia okhurula mumakhono kabamayaanu, nikhununula okhurula mumatere kamariisia.”