Read wanga YEREMIA 16 Bible Online

YEREMIA 16 - wanga bible

YEREMIA 16

¹Mana OMWAMI Nyasaye niyamboolela ari,

²“Shiolateshiakhwo omukhasi mana wibule ninaye abaana abasiani nabakhaana habundu hano ta.”

³Okhuba kano niko aka OMWAMI Nyasaye alaka okhwikholekha khubaana abasiani nende abakhaana abebulwa mushialo muno, nende khubebuli babwe,

⁴bakheerwe khulwa amalwale akamakana. Shibakhekhuulwekhwo noho kata okhuyabilwa ta, nebutswa bakhabe shinga imbolela khwiloba. Bakheerwe nolukanga nende inzala, nachio emilambo chiabwe chiakhabe ebiokhulia biamanyonyi komwikulu nende tsisolo etsiokhushialo.

⁵Okhuba kano niko aka OMWAMI aboola ari, “Shiolatsiakhwo munzu ya amasika kalimwo, kata olatsiakhwo okhwikhuula noho okhubalolela eshisa ta, okhuba ndabayiniyekhwo tsikhabi tsianje, obuheeli bwanje nende eshisa shianje.

⁶Abandu bosi aboluyali nende ababula oluyali balafwiila mushialo shino. Shibalayabilwakhwo kata okhwikhuulwa ta, ne abulaho yesi ouletuma lituma noho okhubeka omurwekwe khulwa bo.

⁷Abulaho oulahelesia abafwiliilwe eshiokhulia shiokhubalemia omwoyo, noho kata eshiokhunywa eshiokhubalemia omwoyo, khulwa okhufwiilwa nyinamwana noho sabwe tawe.

⁸Ne olenjilakhwo munzu mwa lisabo lili, mana wikhale okhulia noho okhunywa ninabo tawe.

⁹Okhuba isie OMWAMI Nyasaye omwene mahe, Nyasaye wa Isiraeli emboola endi, ‘Ndalaholelesia habundu hano obuyoka bwosi bwobusaangaafu nende obwomwikhoyo, nende obuyoka bwosi obwa mwene eshiselelo nende bwomweha. Kano koosi ndalakakhola mutsinyanga etsia mushiliho abalamu, nimukalola obulayi bwene habulafu.’

¹⁰Ne lwolaboolela abandu abo amakhuwa kano koosi, nabo balakhureeba bari, ‘Eshichila OMWAMI Nyasaye nalaka amasila amalulu kano khwifwe nishiina? Khukholile obumayanu shiina? Kho khukholile obwonooni shiina khu OMWAMI Nyasaye wefwe?’

¹¹Nawe ababoolele mbu, isie OMWAMI Nyasaye emboola endi, ‘Abakuuka benywe bandekha, nibalonda khubanyasaye bandi, nibabakhalabanila nende okhubenamila. Bandekha kata nibalahulikhwo amalako kanje ta.

¹²Neenyu mwakholile amabi muno okhushilakhwo bakuuka benywe, okhuba buli mulala khwinywe nowelikosi eliumu khandi owamapaaro amabi, ne khandi shimurecheresinjia tawe.

¹³Khulweshio ndalamusukuna nemuyinia mushialo muno nimutsia mushialo eshicheni eshia inywe beene kata abakuuka benywe balashimanyilekhwo tawe. Mushialo eshio, mulakhalabanila abanyasaye bandi eshilo neshiteere, okhuba shindalamulolelakhwo aka obukoosia tawe.’ ”

¹⁴OMWAMI Nyasaye aboola ari, “Eshise shitsanga olwa abandu balilekha okhwitsuba nibaboola bari, ‘Shinga olwa ashiliho mwoyo OMWAMI Nyasaye owarusia abandu ba Isiraeli Misiri,’

¹⁵nebutswa bakhetsube nibaboola bari, ‘Shinga olwa aliho mwoyo OMWAMI Nyasaye owarusia aba Isiraeli mushialo shiemasaba nende okhurula mubialo biosi ebiandabasalasiamwo!’ Okhuba ndalabakalusia mushialo shiabwe eshia ndahelesia abakuuka babwe.”

¹⁶OMWAMI Nyasaye aboola ari, “Nebutswa bulano, ndalabarumila abanaabi abanji, nabo balabatiila.Olunyuma ndalabarumila abayimi abanji nabo balabayiima khubuli khushikulu nende olukulu nende mumbangasi etsia tsinyanda.

¹⁷Tsimoni tsianje tsilolanga tsinjila tsiabwe tsiosi, shibebisilekhwo okhurula khwisie noho kata obwonooni bwabwe okhwibisa okhurula khumoni tsianje ta.

¹⁸Ndalabahelesia eshinyasio akhandi khabili khulwa okhubela obwonooni bwabwe nende obumayanu, shichila bonooniye eshialo shianje nebifwanani ebilali ebilamu ta shinga emilambo khandi betsusiye eshialo shianje nabanyasaye bobubeeyi.”

¹⁹Iwe OMWAMI Nyasaye, Niwe amaani kanje khandi olukoba lwanje; niwe obwilushilo bwanje khushise eshia amatinyu. Abandu bamahanga bakhetse khwiwe okhurula tsimbeka tsieshialo tsiosi, nibaboola bari, “Abakuuka befwe shibalikhwo nobulaame bwosi ta habula bali butswa nende abanyasaye abobubeeyi, ebindu ebikhaya butswa ebilalikhwo neinganga yosi yosi ta.

²⁰Omundu Namundu yakhanyala okhwikasilia omwene omunyasaye? Kho bulano abenabo shiniabanyasaye nahatutu tawe.”

²¹Niko akachila OMWAMI naboola ari, “Bulano eshise shino ndalabeechesia bamanye obulayi amaani kanje nende obunyali bwanje mana nabo balamanya mbu eliira lianje nisie OMWAMI Nyasaye.”