Read wanga YEREMIA 17 Bible Online

YEREMIA 17 - wanga bible

YEREMIA 17

¹OMWAMI Nyasaye aboola ari, “Obwonooni bwa Yuda bwahandikwa nolukalamu lweshibia, bwasarwa mumioyo chiabwe neshibia shia alumasi nende khutsimbeka tsiosi tsieshimalilo shiemisango shiabwe.

²Abandu benywe benamilanga hashimalilo shiemisango nende ebifwanani ebiombashilwa omunyasaye omukhasi mbu Ashera habuli aha omusaala omutendeemu kuli, nende khubutenje bwebikulu,

³nende khubikulu bindi ebili mushialo eshiakwalaala. Ndalakhola abasuku benywe babukule nibayila obuyinda bwenywe nende amabikho kenywe, khulwa okhubela obwonooni bwosi obwa mwakhola buli habundu mushialo muno.

⁴Okhuula mulalekha eshialo shia ndamuhelesia ne ndalamukhola mukhalabanile abasuku benywe mushialo eshicheni eshia mulamanyilekhwo ta, okhuba liruma lianje liakhanga shinga omulilo ne lilatsiililila okhusamba inziayo.”

⁵OMWAMI Nyasaye aboola ari, “Ali mushilaamo shiobubi omundu yesi, owisikanga omundu washie, Omundu owisikanga amaani komundu washie, Omundu womwoyokwe kwebilila OMWAMI Nyasaye.

⁶Omundu oyo ali shinga eshitsakha eshili mushialo eshiangalamwe, shialalolakhwo lilayi liosi nilimwitsila ta. Alamenyanga habundu ahangalamwe mushitsiimi, eshialo shieliloba liomunyu shiomundu yesi yesi alanyala okhumenyamwo tawe.

⁷Nebutswa noweikhabi omundu yesi owisikanga OMWAMI, owa OMWAMI niye obunaayilobwe.

⁸Ali shinga omusaala okwarakwa hamatsi, okulandinjia emisi chiakwo hamuchela. Siikuhendanga mutsinyanga tsiomubasu omululu ta, shichila amasafu kakwo kabetsanga amabisi, kata shikulahenda mumwika kweshimiyu shiliho ta, kata okhulekha okhwama eshiamo ta.

⁹Omwoyo kwomundu nomukaati okhushila ebindi biosi; shikunyala kwasilikhwa kwahona ta ne abulaho oukumanyile obulayi!

¹⁰Isie OMWAMI Nyasaye erunilisinjia amapaaro komundu nengahenjelesia okhuula mumwoyo mukari mwomundu. Nakachila erunganga omundu, okhulondana neinjendaye, nende ebikholebie.”

¹¹Omundu ounyoolanga obuyinda munjila eyilali ya habwene ta ali shinga ikhwale eyikonelanga niyalula abaana balali bayo ta. Balakosia obuyinda obwo nibaakhoola hakari wemiyika chiobulamu bwabwe, ne mukhumalilikha babe abakofu bamaani abayingwa.

¹²Khuli nende eshifumbi eshioluyali shioburuchi, eshifumbi shiachinguulwa hekulu; habwene yaho niho habundu wefwe hatakatifu.

¹³Iwe OMWAMI Nyasaye ouli obunaayi bwa Isiraeli, abo bosi abakhuloba iwe balafwimbwa omurwe, abo abakhulekha iwe balarulaho, shinga ameera akahandikwa mulufu, okhubeela bakhuleshile iwe OMWAMI Nyasaye, ouli eshinoko shiamaatsi kobulamu.

¹⁴E OMWAMI usilishe ne nasi ndalahona; uhonie mana nasi ndalahona, okhuba niwe owa nditsoominjia.

¹⁵Abandu bareebanga bari, “Kali heena amarisia aka OMWAMI yalaka khwinywe? Akareere bulano!”

¹⁶Nebutswa isie shindakhunichilisiakhwo mbu obareerire amatinyu ta, shindabekombela okhuba neshise shiosi shiamasika tawe. Iwe OMWAMI omanyile amakhuwa ako, omanyile obulayi akandaboola.

¹⁷Shiolaba eshirisio khwisie tawe, niwe habundu wanje ahobwilushilo, olwa amatinyu keetsa.

¹⁸Bahafibwe tsisoni abo abasandinjia, nebutswa nasi endeshe okhuhafibwa tsisoni, bo bafwe emioyo, nebutswa nasi ndalafwakho omwoyo ta. Bareere inyanga ya amatinyu; basishie nobusasishi okhuula khabili.

¹⁹OMWAMI Nyasaye niyamboolela ari, “Tsia osinjile mushilibwa shiabandu abaruchi ba Yuda benjililangamwo khandi nibarulilamwo mwitookho, nende mubilibwa bindi biosi bia Yerusalemu noboola ori,

²⁰‘Hulile likhuwa elia OMWAMI Nyasaye inywe abaruchi ba Yuda, nabandu ba Yuda nende abamenyanga Yerusalemu abenjilanga nende okhurulila mubilibwa bino.’

²¹“Obaboolele mbu, isie OMWAMI Nyasaye emboola mbu, murecheresie khulwa omulembe kwobulamu bwenywe, mulachinjekhwo omusiko kwosi kwosi khunyanga ya Isabato ta, kata okhukwinjisilia mubilibwa bia Yerusalemu tawe.

²²Kata mularusiakhwo omusiko kwosi kwosi mutsinzu tsienywe khunyanga yeisabato, kata okhukhola omulimo kwosi kwosi tawe. Nebutswa okhuula muchiahule inyanga yeisabato okhuba indakatifu shinga olwa ndalachilisia abakuuka benywe.

²³Nabo abakuuka benywe, shibarecheresia kata okhukayililisiakhwo ta, habula boomia amakosi kabwe nibakhaya okhuhulila nende okhulonda amalako kanje.”

²⁴Isie OMWAMI Nyasaye imboola endi, “Nimwakharechelesia obulayi bwene, ne nimulabisiliakhwo omusiko kwosi kwosi mubilibwa bielitookho lino khunyanga ya Isabato, nebutswa nimukhola inyanga eyo okhuba indakatifu khulwa okhulekha okhukholakhwo omulimo kwosi.

²⁵Lihanga lino liba lilatsiililila inziayo. Buli lwosi owomulwibulo lwa Daudi alarukanga mwitookho lia Yerusalemu. Abaruchi nende abalondililibe balachendelanga khumakari ketsisishili buli lwosi mubandu ba Yuda. Nabo abandu balamenyanga mwitookho lino inziayo.

²⁶Abandu baleetsa nibarula mumataala ka Yuda nende tsisoma etsibotokhane Yerusalemu, okhurula mubialo bia Benjamini, elubeka lwebikulu biamumbo, okhurula mubialo biebikulu nende okhurula Negabu, nibareera muhekalu yanje emisango emisambe, ebihaanwa, emisango chieyimele, obubaane nende emisango chiokhukhupa orio.

²⁷Nebutswa okhuula bambulile khandi balinde Isabato okhuba indakatifu. Balachingakhwo omusiko kwosi okhubirira mubilibwa bia Yerusalemu khunyanga eyo ta, nibakhola bario, emba ndalayafia omulilo khubilibwa bia Yerusalemu. Omulilo kuba kulasamba tsinzu tsiabaruchi ba Yerusalemu, ne abulaho omundu yesi oulanyala okhukusimia.”