Read wanga YEREMIA 18 Bible Online

YEREMIA 18 - wanga bible

YEREMIA 18

¹OMWAMI Nyasaye yaboolela Yeremia ari,

²“Rula okholomoshe otsie munzu yomulonji, noli ebweneyo ndalakhuboolela amakhuwa kanje.”

³Kho nekholomokha nenzia munzu yomulonji, nimunyoola nalonjelanga ebindu khwikurutumu liokhulonjelakhwo.

⁴Ne buli shindu shia yalonganga olwa shionoonekhanga nashishilonga, yashisasinji mana aloonga khandi eshindu shindi eshiyiakha shinga lwomwene aba niyeenya.

⁵Mana OMWAMI Nyasaye niyamboolela ari,

⁶“Inywe Abaisiraeli, mupaara mbu, isie OMWAMI Nyasaye shienyala okhumukhola shinga lwomulonji oyo yakhola ta? Mumanye mbu, shinga olwa litoyi lili mubunyali bwomulonji, nolwa mwesi muli murio mubunyali bwanje.

⁷Ne eshise shiosi shiosi eshia emboola mbu, enzia okhusiula, okhulikulula noho okhusasia lihanga noho oburuchi bwosi bwosi,

⁸ne lihanga elo noho oburuchi obwo bwikalukhasie nibulekha okhukhola obumayanu bwabwe, kho isie shiemba ndalakhola aka ndalaka okhubakholela tawe.

⁹Ne khandi, nemba nemboola mbu, enzia okhuraaka noho okhumbakha lihanga noho oburuchi bwosi bwosi,

¹⁰mana lihanga elo nilikhola obumayanu imbeli wanje, nilikhaya okhumbulila isie, kho shiemba ndalalikholela amalayi aka ndalaka okhulikholela tawe.

¹¹Kho bulano, boolela abandu ba Yuda nende abamenyanga mu Yerusalemu mbu, isie OMWAMI Nyasaye emboola mbu, erecheeshe amasila okhumwitsila nende tsinjila tsiobumayanu khwinywe. Mungalushile nimulekha tsinjila tsienywe tsimayaanu, mwikalukhasie injenda yenywe nende ebikhole bienywe.

¹²Nebutswa nabo balakhukalusia nibaboola bari, ‘Ako namakhaya khulatsiililila nebikhole biefwe abeene, buli mulala khwifwe nakhole obukhayi obuli mumwoyokwe omumayaanu.’ ”

¹³OMWAMI aboola ari, “Reberesie mumahanga koosi, niwina owahulilakhwo amakhuwa shinga kano, Isiraeli akholile likhuwa libi liamakana.

¹⁴Ebikulu bietsinyanda bia Lebanoni biakhabulakhwo itsaluchi noho? Emichela chiamaatsi amanyifu echia khubikulu biashio chiakhakhama amaatsi?

¹⁵Nebutswa abandu banje banzibiliile, basambilanga abubaane ebifwanani biabutswa, ebibakholanga okhwisichirala okhurula kutsinjila tsiabwe, nende khumihanda chiabwe chiakhale. Balondelanga khunjila tsia tsinjeeli, khutsinjila etsilakasibwa tawe.

¹⁶Bakholile eshialo shiabwe okhuba eshiamarisia, eshiokhulechelesibwa inziayo. Buli mundu oubirayo, yesundukha nareesia omurwekwe khulwa akaalola.

¹⁷Ndalasalaasia abandu banje imbeli wabasuku babwe, ndalabasalaasia shinga olufu, olutuumuulwa nomuyeka kwebukwe. Ndalabafutarira nebalekha, shindalabakhoonya olwa amasila kabetsela tawe.”

¹⁸Mana abandu nibaboola bari, “Chende khwirecheshe khwiire Yeremia, okhuba shikhulabukha abesaaliisi abokhwechesia ta, noho abobuchesi okhukhwibaalila kata abalakusi okhukhulakulila amakhuwa ka Nyasaye ta! Yetse khumwinjilile namakhuwake omwene, ne kata khulalondakhwo khumakhuwake akaboolanga tawe.”

¹⁹Mana nisaaya nisaba OMWAMI Nyasaye nemboola endi, “Iwe OMWAMI Nyasaye, urecheresie, nohulila okhusaaya kwanje. Hulila kabasuku banje baboolanga khwisie!

²⁰Amalayi kakhoyeele okhurungwa amabi? Bayabile obwiina obwokhunzira. Yitsulila mbu ndasinjiile imbeliwo, mana nimboola amakhuwa amalayi khulwabo, khulwa okhurusiaho lirumalio khubo.

²¹Khulweshio OMWAMI lekha abaana babwe inzala yibeere, lekha beerwe nolukanga mwihe. Abakhasi babwe babe abakumba khandi babe abalekhwa, Abasaatsa babwe beerwe noluumbe, nabo abaana babwe abasiani beerwe mwihe.

²²Lekha tsimbungu tsihulilishe okhurula munzu tsiabwe, olwa abareerera abaseeri metsukhana. Okhuba bayabile obuko okhundiila isie, nibareka eshireko shiokhundiila ebilenje bianje.

²³Iwe OMWAMI Nyasaye, omanyile obwirechesi bwabwe bwokhunzira, olababeela tsimbabasi obumayanu bwabwe obwo ta, kata okhusasia obwonooni bwabwe tawe. Bakwe hasi imbeliwo obakhupe lwoba notiilwa neliruma.”