Read wanga YEREMIA 19 Bible Online

YEREMIA 19 - wanga bible

YEREMIA 19

¹OMWAMI Nyasaye niyamboolela ari, “Tsia okule isiongo okhurula khumulonji mana obukule balala khubakhulundu babandu nende babesaaliisi,

²orule ninabo mutsie mwibanda liomwana wa Hinomu elili habwinjililo bweshilibwa eshilangwa mbu Eshietsinjio. Ebweneyo obarumbulile amakhuwa kekhuboolela.

³Obaboolele mbu, hulile likhuwa elia OMWAMI Nyasaye inywe abaruchi ba Yuda nende abamenyanga mu Yerusalemu. Kano niko aka isie OMWAMI Nyasaye omwene mahe, Nyasaye wa Isiraeli emboola. Enzitsa okhureera amasila habundu hano, akalachila buli mundu yesi oukahulilakhwo alesundukha muno.

⁴Ndalakhola ako khulwa okhubeela abandu bandeshile khandi nibonoonia habundu hano khulwa okhuhaanilaho emisango khubanyasaye bandi abali abanyasaye ababo noho bakuuka babwe, noho abaruchi ba Yuda balamanyilekhwo eshindu shiosi khubo ta. Betsusiiye habundu hano neshitsayi shia abandu babula eshikha.

⁵Khandi bombashiile omunyasaye Baali ebimalilo biemisango khulwa okhusambilakhwo nomulilo abaana babwe shinga omusango. Shindabalachilisiakhwo okhukhola bario ta, kata likhuwa shinga elio shilitsakho mumapaaro kanje tawe.

⁶Kho mumanye mbu, isie OMWAMI Nyasaye emboola mbu, tsinyanga tsiitsanga olwa abandu shibalilangakhwo habundu hano mbu, Tofetsi noho Libanda liomwana wa Hinomu ta, habula hakhalangwe mbu, Libanda elia Obwirwi.

⁷Ndalasasia amakhuwa koosi habundu hano, kabandu ba Yuda nende Yerusalemu berechekhanga okhukhola. Ndalakhola abasuku babwe okhubahula nende okhubeera mwihe. Ndalahaana emilambo chiabwe okhuba ebiokhulia ebiamanyonyi nende tsisolo etsianabulimo.

⁸Ndalakhola litookho lino elia Yerusalemu okhuba eliamariisia, okhuba eshindu shiokhwisundukha; buli mundu oulabiraho alariisibwa, niyesundukha khulwa okhubela amanyasio koosi akali khulio.

⁹Ndalakhola abasuku benywe babotokhane litookho okhuula olwa ebilibwa biosi bihwa. Mana abo abekalilwe mwitookho mukari balalia abaana babwe abeene abasiani nende abakhaana, khandi omundu alalia omundu washie. Abandu nibabe nibariisiibwe muno.”

¹⁰Mana OMWAMI Nyasaye niyamboolela mbu, ndarache isiongo yali imbeli wabandu ba ndali ninabo,

¹¹nende okhubaboolela mbu, OMWAMI Nyasaye omwene mahe aboola ari, “Ndalaraka abandu bano nende litookho lino, mana kulaba shinga isiongo yelitoyi eyatiishe eyo, eyilanyala okhuliimasibwa halala ebikonjio biayo khandi tawe. Abandu balayabila abandu bashiabwe kata mwibanda lia Tofetsi shichila habundu undi shihalabakhwoho ahokhubayabila tawe.

¹²Isie OMWAMI Nyasaye emboola mbu, kano niko aka ndalakhola habundu hano nende khubamenyangaho, ndalakhola litookho lino libe eliomusilo shinga Tofetsi.

¹³Tsinzu tsia Yerusalemu, nende tsiabaruchi ba Yuda nende etsindi tsiosi etsia basambilakhwo obuubane khubilama khulwa okhwinamila tsing'ining'ini nende etsia idivai yahaanilwa abanyasaye bandi, tsiosi tsilaba etsiomusilo shinga litookho lia Tofetsi.”

¹⁴Mana Yeremia narula Tofetsi, ewa OMWAMI Nyasaye yali namurumile okhurumbula amakhuwake, ne nasinjila mulwanyi lwa Ihekalu ya OMWAMI Nyasaye naboolela abandu boosi ari,

¹⁵OMWAMI Nyasaye omwene mahe, Nyasaye wa Isiraeli aboola ari, “Ndalareera khwitookho lino nende amataala kali hambi khulio buli oluyia lwamasira ka ndarumbula khubo, okhuba boomia amakosi nibalahulila amalako kanje tawe.”