Read wanga YEREMIA 2 Bible Online

YEREMIA 2 - wanga bible

YEREMIA 2

¹OMWAMI Nyasaye yamboolela ari,

²“Tsia obarumbulile habulafu abandu boosi abamenyanga Yerusalemu nobaboolela mbu isie, OMWAMI Nyasaye emboola endi, “Nditsulilanga obwisiikwabwo khwisie olwa wali noshili omubuukha, obuheelibwo khwisie shinga ouli omusaatsawo, wambulilanga niunondakhwo mushitsiimi, eshialo eshilarakwamwo eshindu shiosi shiosi ta.

³Iwe Isiraeli, wali omutakatifu imbeli wanje, wali ebiamo biambeli bielichesa lianje. Boosi abakhusalisia bareebwakhwo eshikha, amasila kabakwila. Nolwa isie OMWAMI Nyasaye emboola.”

⁴Recheresie aka OMWAMI Nyasaye aboola, inywe abolwibulo lwa Yakobo, inywe abetsimbia tsia Isiraeli.

⁵OMWAMI Nyasaye aboola ari, “Nibubi shiina obwabakuuka benywe balola mwisie, obwachila nibangalukhanakhwo, nibelushila abanyasaye bandi babutswa, boosi nibekhola ababutswa?

⁶Shibayeereebakhwo abeene mbu, ‘OMWAMI Nyasaye owakhurusia mushialo shia Misiri ali heena ta? Nyasaye owakhwimilila mushitsiimi, mushialo eshiangalamwe khandi eshiamatikho, eshiumu khandi eshieshiilima eshimali ti, eshiomundu yesi alabirangakhwomwo, kata okhumenyamwo ta.’

⁷Mana nimureera mushialo shiobuyinda, mbu mwikhoye nimulia ebiamo biashio nende ebindu biashio ebilayi. Nebutswa olwa mwenjilamwo mwashionoonia, nimukhola eshialo shiobulaame bwanje okhuba eshieshisinyo.

⁸Nabo abesaaliisi shibayeereebakhwo mbu, ‘OMWAMI Nyasaye ali heena ta?’ Abachesi bamalako shibamanyile isie ta, abemilisi babandu banzonoonela, abalakusi balakulila muliira liomunyasaye Baali, khandi nibenamila ebifwanani bilalikhwo neinganga yosi yosi tawe.”

⁹OMWAMI Nyasaye aboola ari, “Khulweshio, ndalatsiililila okhumuyaasia okhuula khubetsukhulu nende khubisoni bienywe.

¹⁰Kho yambushe injelekha weinyanza mutsie mushialo shia Kupuro mulole, noho rume abandu mushialo shia Kidari barunilisie obulayi, okhulola likhuwa shinga lino niliba niliekholekhakhwo khale.

¹¹Lilikhwoho lihanga elialekha abanyasaye balio, ne niilinamila abanyasaye bandi, kata abanyasaye abo nibalali abanyasaye batoto ta? Nebutswa abandu banje bandeshile isie ouli oluyali lwabwe, nibalonda abanyasaye balalikhwo neinganga yosi yosi ta.

¹²Khulweshio, ohuchisibwe iwe likulu khulwa likhuwa lino, otechele nobeyabeya muno.

¹³Okhuba abandu banje bakholile amakhuwa amabi kabili kano; bayandeshile isie ouli eshinoko shiamaatsi kobulamu, nibeyabila abeene amayabo kamaatsi kakhamangamwo.”

¹⁴Kho Isiraeli nomusumba noho? Yebulwa nali mubuhambe noho? Kho mbushiina abasukube nibamuyimanga?

¹⁵Abasukube bamuhoolelangakhwo shinga tsitalanyi, bahoolanga nomwoyo omukhongo. Bachilile eshialoshie nishikwa likunda, nako amatookhoke kakwisibwa amakunda akabulamwo abandu.

¹⁶Okhumeeta khwako, abandu beshialo shia Memufi nende Tapane basasiiye olusiimbilwo.

¹⁷Kho Isiraeli, shiniwe omwene owireereere kano, khulwa okhundekha isie OMWAMI Nyasayewo owakhwimililanga khunjila noho?

¹⁸Ne bulano, neinganga shiina yolanyoola khulwa okhwileeta khu Misiri, kata okhunywa amaatsi komwalo kwa Naili? Noho okhwileeta khu Asiria, kata okhunywa amaatsi komwalo kwa Yufurate?

¹⁹Obumayanubwo bulakhuhelesia eshinyasio, khandi obukhayibwo bulakhukondoshela. Omanye, khandi ololekhwo shinga olwa buli obubi khandi obululu muno, okhundekha isie OMWAMI Nyasayewo. Shiolikhwo noluyali khwisie tawe. Nolwa OMWAMI Nyasaye aboola.

²⁰“Okhuba iwe wafunaka likokololio khale muno, khandi wakhalaka eminyololochio, mana noboola ori, ‘Shindilabetsanga omusumba khandi ta!’ Wenamila abanyasaye bandi shinga omutamba, khubuli eshikulu eshirambi nende mubuli eshiinikha shiomusaala omutendemu.

²¹Nebutswa isie ndakhuraaka shinga omutsabibu omulayi, okhurula khumwo indayi inzeleleshe. Kho bulano wonoonoshe orie khandi niwikhola omutsabibu omunabulimo?

²²Kata noba niwisinga neisabuni indayi ifwana irie, kata okhuchiikhoonyela inyinji muno, obwonoonibwo bulatsiililila butswa okhuba imbeli wanje.” Nolwa isie OMWAMI Nyasaye emboola.

²³“Wakhaboola orie mbu, ‘Isie shindikhwo nobwonooni ta,’ kata mbu ‘shindayenamilakhwo abanyasaye ba Baali ta?’ Lolakhwo obwonooni bwawakhola mwibanda, yitsulilakhwo butswa aka wakholayo, oli shinga ingamia imoosi eyenya okhwilukha.

²⁴Noho shinga isishili eyanala okhumenya mushitsiimi, olwa yenya okhwilukha, abulaho ounyala okhuchiikalila tawe. Tsisishili tsisaatsa nitsichienya shitsinyakhana tawe, ebise biayo biokhwilukha nibiula niyinyoolekhaho butswa.

²⁵Iwe Isiraeli, olachoonyakhwo ebilenjebio, kata okhuhalakha hamwoyo tawe. Nebutswa iwe oboolanga ori, ‘Tawe, ako namakhaya, isie ndaheela abanyasaye bamahanga kandi, mana nibo abandinamilanga.’ ”

²⁶OMWAMI Nyasaye aboola ari, “Shinga omwifi afwimbungwa omurwe natiililwe, nolwa Abaisiraeli bosi khandi balafwimbwa omurwe bario; bo abeene, abaruchi babwe, abemilisi babwe, abesaaliisi babwe nende abalakusi babwe.

²⁷Okhuba baboolelanga omusaala bari, ‘Niwe papa wanje’ khandi baboolela lichina bari ‘Niwe owanzibula.’ Bashiukhaane nibandekha, nebutswa olwa banyoola amatinyu, ne bamboolela bari, ‘Yitsa okhuhonokosie!’

²⁸Kho bulano abanyasaye benywe, abamwekasilia bali heena? Leshe betse, endolekhwo nibaba nibanyala okhumuhonokosia, olwa muba nimuli mumatinyu! Okhuba inywe abandu ba Yuda muli nabanyasaye abanji shinga obunji bwamatookho kenywe.

²⁹Eshichilanga nimwiyiniakana nishiina? Ninywe abeene abashiukhana nimundekha.” Nolwa isie OMWAMI Nyasaye emboola.

³⁰“Isie ndamuhelesia eshinyasio, nebutswa shimwabukulamwo oluchendo tawe. Olukanga lwenywe abeene nilwo olwamulula abalakusi benywe shinga italanyi imbalaba.

³¹Inywe Abaisiraeli, hulile akemboolanga isie OMWAMI Nyasaye. Isie ndikholile eshitsiimi, noho eshialo shieshiilima eshikhongo khu Isiraeli noho? Mbushiina abandu banje nibaboola bari, ‘Ifwe khuli abalekhuule, shikhulakhwinamilakhwo khandi ta?’

³²Mana omukhaana outsia mushiselelo yakhebilila ebiisiahobie, noho omweha okhwibilila eshifwaloshie shieshiselelo? Nebutswa abandu banje banzibilila oluhoono olurambi muno.

³³Toto mwene wamanya muno tsinjila tsiokhunyoola abatamba! Kata abakhasi abamayanu, wabeechesia injendayo.

³⁴Ebifwalobio bilikhwo eshitsayi shiabatakha ababula eshikha, aba walanyoolakhwo nibafunakanga inzuyo ta. Okhumeeta khwako,

³⁵iwe oboolanga mbu, ‘Isie embula eshikha, endi nobwatoto mbu OMWAMI Nyasaye shiali noburuma ninasi tawe.’ Nebutswa isie ndalakhuhelesia eshinyasio, khulwa okhuboola mbu, ‘Shindayonoonakhwo tawe.’

³⁶Mbushiina niwifwola omwene, noyiyayiya? Abamisiri balakhufwimbia omurwe butswa, shinga olwa Abasiria bakhufwimbia omurwe.

³⁷Kata ebweneyo wakhachelele noreere amakhonoko khumurwe mushifwimbwa murwe. Okhuba OMWAMI Nyasaye alobile abawisikangamwo, shibalakhukhoonyakhwo eshindu shiosi shiosi tawe.”