Read wanga YEREMIA 20 Bible Online

YEREMIA 20 - wanga bible

YEREMIA 20

¹Omwisaaliisi Pashuri omusiani wa Imeri, owali omwimilisi omukhongo muhekalu eya OMWAMI Nyasaye, yahulila Yeremia narumbulanga obulakusi obwo;

²Mana nanywekha omulakusi Yeremia namuboha mumakokolo akali mushilibwa shielubeka lwemukulu lwa Benjamini ahambi nende Ihekalu eya OMWAMI Nyasaye.

³Olwa bwashia inyanga yalondakhwo, Pashuri yabolola Yeremia okhurula mumakokolo ako. Naye Yeremia namuboolela ari, “OMWAMI Nyasaye shiakhulanganga eliiralio khandi mbu, Pashuri ta, habula mbu Amarisia tsimbeka tsiosi.”

⁴Okhuba OMWAMI Nyasaye aboola ari, “Lola ndalakhukhola okhuba owamarisia khwiwe omwene nende khubetsabo boosi. Baleerwa nolukanga lwabasuku babwe norerekhwo tsimoni. Ndalahaana abandu ba Yuda boosi mumakhono komuruchi wa Babuloni, naye alabayila mubuhambe nende okhubeera nolukanga.

⁵Okhumeeta khwako, ndalahana obuyinda bwelitookho liabwe bwosi nende emiandu chiabwe chiosi nende ebindu biosi biobukusi halala nende amabishilo kabaruchi ba Yuda koosi khubasuku babwe, abalabiyaaya nibabiyila Babuloni.

⁶Nawe Pashuri halala nabeinzuyo boosi mulatiilwa nimuyilwa mumboye Babuloni. Olafwila ebweneyo noyabilwayo halala nabetsabo boosi aba walakulilanga obubeeyi.”

⁷Iwe OMWAMI Nyasaye, iwe wangaatiye, nasi nengatilisibwa, iwe oli owamaani okhuushila, ne umbulile. Isie enzeshelelungwa eshiteere tulu, buli mundu yanzeshelelanga.

⁸Buli olwerumbula likhuwa, ndiyiniakana, elanjilisia nomwoyo omukhongo nemboola endi, “Induli, obusasishi!” Okhuba okhurumbula likhuwa elia OMWAMI Nyasaye khuchilanga nenyekwa nende okhuchaaywa eshiteere shiosi.

⁹Nebutswa nemboola mbu, shindalarumbulakhwo, OMWAMI Nyasaye, kata okhuboolakhwo muliiralie ta, eshindu shinga omulilo shisambanga mumwoyo kwanje, shili shinga omulilo okwikaliilwe mumakumba kanje. Endeemanga muno okhukwikalila nebutswa shienyalilwa ta.

¹⁰Embulilanga abandu abanji nibamoonya. Amariisia kambotokhane. Abanji baboola bari, “Chende khutsie khumuboole khubakhongo amakhuwake!” Kata abetsa banje abaheelwa, boosi balindililanga okhukwa khwanje. Baboolanga bari, “Haundi alakaatibwa, mana khumutiile nikhurunga eshikwoli.”

¹¹Nebutswa iwe OMWAMI Nyasaye oli ninasi, iwe oli khwisie shinga omulwani omululu, khulweshio, abakhobanga abo balakwa, ne shibahula ta.

¹²Nebutswa OMWAMI Nyasaye omwene mahe, iwe ohenjelesinjia abalunjishi, khandi ololanga koosi akali mumwoyo nende mumapaaro kabandu. Kho chama endole norunga eshikwoli khubasuku banje, okhuba endere omuse kwanje imbeliwo.

¹³Mumwimbile OMWAMI Nyasaye, mumwitsoomie OMWAMI Nyasaye! Okhuba ahonokosiye abasandibungwa, okhurula mumakhono kabandu abamayaanu.

¹⁴Yilaamwe eshilaamo shiobubi inyanga yandebulilwakhwo eyo. Inyanga ya mama wanje yanzibulilakhwo yilabakhwo neikhabi indayi tawe!

¹⁵Ali mushilaamo shiobubi omundu oyo, owareerera papa wanje amakhuwa naboola mbu, “Wibuliilwe omwana omusiani,” nachila papa niyekhoya muno.

¹⁶Omundu oyo akhoyile okhuba shinga amatookho ako aka OMWAMI Nyasaye yamulula nalakalolelakhwo tsimbabasi ta. Omundu oyo akhoya wahulilanga tsimbungu mumabwibwi, nende olukhu lwelihe mushiteere,

¹⁷okhubeela shiyaanzira neshili munda mwa mama ta. Mama niye owakhabeele eshilindwa shianje, nayo indaye yakhatonyile ikhongo inziayo.

¹⁸Eshiachila nirula munda mwa mama wanje nishiina? Ndarulamwo mbu enyoolenje amatinyu nende eshibeela, nende okhumenya obulamu bweshifimbwa murwe noho?