Read wanga YEREMIA 21 Bible Online

YEREMIA 21 - wanga bible

YEREMIA 21

¹Lino nilio likhuwa elietsela Yeremia okhurula khu OMWAMI Nyasaye, lwomuruchi Zedekia yaruma Pashuri omusiani wa Milikia nende omwisaaliisi Zefania omusiani wa Maaseya khu Yeremia namuboolela ari,

²“Chama okhureebelekhwo khu OMWAMI Nyasaye okhuba Nebukadineza omuruchi wa Babuloni akhuseeranga. Haundi OMWAMI Nyasaye yakhakhukholela akamakana shinga olwa akholanga buli lwosi, mana akhole Nebukadineza akhurulekhwo.”

³Mana Yeremia nababoolela ari,

⁴“Tsie muboolele Zedekia, mbu OMWAMI Nyasaye, Nyasaye wa Isiraeli aboola ari, lola, iwe Zedekia, ndalashiukhasia abelihebo nende ebimanulwa biabwe ebia wikhoonyelanga okhuseera omuruchi wa Babuloni nende Abakalidayo ababotokhane litookho. Ndalabakhung'asia boosi halala hakari mwitookho.

⁵Isie omwene ndalakhuseera namaani neliruma khandi nesinyishe muno.

⁶Ndaleera abamenyi bomwitookho muno boosi halala netsisolo, baleerwa nolumbe olubii muno.

⁷Olunyuma lwelihe elio, isie OMWAMI Nyasaye ndalakhuhana iwe omuruchi Zedekia nabakhongobo nende boosi abehonokokha okhwiirwa mwihe, inzala nende olumbe mumakhono ka Nebukadineza omuruchi wa Babuloni, nende mumakhono kabasuku benywe abakhabanga okhumwiira mwesi pe. Omuruchi Nebukadineza alamwiira, shialalekhakhwo kata mulala khwinywe, noho okhumulolelakhwo tsimbabasi kata eshisa ta.” Isie OMWAMI Nyasaye emboolile.

⁸“Nawe Yeremia oboolele abandu mbu, kano niko aka OMWAMI Nyasaye aboola ari, ‘Lole, era imbeli wenywe injila eyitsia mubulamu nende eyitsia mukhufwa.

⁹Omundu yesi oulatong'a mwitookho lino alafwa khulwa olukanga noho inzala noho olumbe olubii. Nebutswa yesi oularula elwanyi welitookho niyehaana khubakalidayo ababotokhane litookho, alabaho omulamu, okhuba alahonokosia obulamubwe.

¹⁰Emalile okhulaka mbu okhuula litookho lino lisasibwe, nolwa isie OMWAMI Nyasaye emboola. Ndalahaana litookho lino mumakhono komuruchi wa Babuloni naye alalisamba nomulilo liosi pe.’ ”

¹¹OMWAMI Nyasaye naboola ari, oboolele abeinzu yoburuchi ya Yuda ori, “Recheresie likhuwa elia OMWAMI Nyasaye,

¹²inywe abolwibulo lwa Daudi! Isie OMWAMI Nyasaye emboola mbu, mukhalachenje habwene okhuchaaka mumabwibwi nimuhonokosia abayayilwe emiandu chiabwe okhurula mumakhono kababasandinjia. Nimulakhola murio ta, liruma lianje lilabukha shinga omulilo, lilasamba buli shindu ne abulaho oulalisimia khulwa okhubeela ebikhole bienywe ebimayaanu.

¹³Lola, isie bulano emulwananga inywe abamenya mwibanda, inywe abamenya khulwanda mumuhololokhwe, inywe ababoolanga muri, ‘Niwiina oulakhuseera ifwe? Niwiina ounyala okhwinjila mushimenyo shiefwe?’

¹⁴Ndalamuhelesia eshinyasio okhulondana nebikhole bienywe, Isie OMWAMI Nyasaye emboola. Ndalahafia omulilo mumutsuru kwenyu, nakwo kulasamba buli shindu eshimubotokhane.”