Read wanga YEREMIA 22 Bible Online

YEREMIA 22 - wanga bible

YEREMIA 22

¹OMWAMI Nyasaye aboola ari, “Yeremia, tsia munzu yomuruchi wa Yuda, oboolele abandu amakhuwa kano mbu,

²iwe omuruchi wa Yuda, owikhalanga khushifumbi shioburuchi shia Daudi, halala nende abakhongobo nende boosi ababiriranga mubilibwa bino, recheresie likhuwa elia OMWAMI Nyasaye.

³Isie OMWAMI Nyasaye emboola mbu, mukholenje akahabwene khandi akobulunjishi. Muhonokosinjie ouyaayilwe emianduchie okhurula mumakhono ka oyo oumusandinjia. Mulakholekhwo amabi kata okhusandia abarende noho abaana ababisandu kata abakhasi abalekhwa tawe, kata mularatsiekhwo eshitsayi shiomundu oubula eshikha habundu hano tawe.

⁴Nimuba toto nimulonda habwene lilako lino, kho abaruchi balekhalanga khushifumbi shioburuchi shia Daudi, abalabiriranga mubilibwa bioburuchi bino nabakhongo babwe nende abandu babwe nibaninile khumakaari ketsifarasi nende khutsifarasi.

⁵Nebutswa nimulalonda lilako lino ta, isie OMWAMI Nyasaye nditsuba mbu inzu yoburuchi yino yilasasibwa niyikwa likunda. Isie OMWAMI Nyasaye nolwa emboola.”

⁶OMWAMI Nyasaye aboola okhulondana nende inzu yoburuchi eya Yuda ari, “Kata noba nololekhanga khwisie owelikondo lilayi shinga eshialo shia Giliadi, khandi shinga ebikulu bia Lebanoni, toto ekhwitsubila mbu ndalakhukwisia eshitsiimi, khandi litookho liabandu balanyala okhumenyamwo ta.

⁷Ndalakhurumila abandu okhukhusasia buli mulala khubo neshimanulwa mumakhono, balarema emisaalachio emilayi chiemisiita, nibachisukuna mumulilo.

⁸“Mana abandu abanji abamahanaga bakhabiri khwitookho lino, ne nibareebana abeene khu beene bari, ‘Eshichila OMWAMI Nyasaye nakholela litookho likhongo lino amakhuwa kano nishiina’?

⁹Nabo abashiabwe abo balibakalusia bari, ‘khulwa okhubela abandu belitookho lino bafunaka indakano eya OMWAMI Nyasaye wabwe mana nibenamila nende okhukhalabanila abanyasaye bandi.’ ”

¹⁰Mulalilekhwo khulwa omundu oumalile okhufwa kata okhumwikhuula tawe. Nebutswa mulile obululu khulwa oyo outsitsanga mubuhambe okhuba shialichelelakhwo okhulola eshialoshie tawe.

¹¹Okhuba OMWAMI Nyasaye aboola okhulondana nende Yoazi omusiani wa Yosia, owakalukha mushilenje shia samwana okhuba omuruchi wa Yuda ari, “shialikalukhakhwo khandi hano tawe,

¹²habula alifwila mushialo shia bamuyiilamwo okhuba omuhambe; shialikalukhakhwo mushialo shino khandi ta.”

¹³Oli mumatinyu iwe Yehoyakimu, iwe oumbakhanga inzuyo mubushiamu, niumbakha ebisika bieikulu mutsinjila tsilali tsiahabwene ta. Iwe oukholanga abandu okhukhukholela emilimo eshikhaya butswa, nolabarunga omurungo kwabwe ta.

¹⁴Iwe omwene oboola mbu, “Ndaleyumbashila inzu ikhongo muno, eyili nebisika bieikulu ebikhongo.” Mana ochikasilie amatirisha, nokhoma tsimbao tsiemisiita khwisisi nende okhuchibakha irangi iranzayi.

¹⁵Iwe opaaranga mbu olaba omuruchi khulwa okhwitsiala mukhumbakha nemisiita? Papawo yalitsanga nende okhunywa, nende okhukhola akahabwene khandi akobulunjishi, kho mana nanyalilwa mumakhuwake koosi.

¹⁶Yakhalachilanga abamanani nende abatakha habwene, kho nanyalilwa mumakhuwake koosi. Eshio nishio eshisina shiokhumanya isie OMWAMI Nyasaye.

¹⁷Nebutswa tsimonitsio nende omwoyokwo biachooma butswa khukhunyoola emiandu echilali chia habwene ta, nende khuratsia eshitsayi shiababula eshikha; buli lwosi osandinjia abashio nende okhubakholela amahababa.

¹⁸“Khulweshio, isie OMWAMI Nyasaye emboola khu Yehoyakimu omusiani wa Yosia, omuruchi wa Yuda mbu, olwa alifwa, abulaho oulimwikhuula naboola ari, ‘Oo omusiani wefwe!’ ‘Oo omukhaana wefwe!’ Abulaho olimwikhuula naboola ari, ‘Oo omwami wanje!’ ‘Oo owoluyali wanje!’

¹⁹Aliyabilwa shinga isishili. Alikhweswa nayilwa ehale, nafubwa elwanyi webilibwa bielitookho lia Yerusalemu.”

²⁰Inywe abandu ba Yerusalemu, tikulushe mutsie Lebanoni nimukhupa tsimbungu, lanjilisie obutinyu mushialo eshia Bashani. Lanjilisie nomwoyo omukhongo nimuli khubikulu bia Moabu, okhuba abaheelwa benywe boosi bahulilwe.

²¹Ndamuchetsiyia olwa mwali nimushili nomulembe, nebutswa inywe mwaboola mbu, “Shikhulakhurechelesia tawe.” Okwo nikwo omwiimakwo okhurula muburaakabwo, shiumbulilanga isie tawe.

²²Abemilisi benywe balahutswa nibayilwa nomuyeka, nabo abaheelwa benywe balatiilwa nibayilwa mubuhambe. Nolwa mulifwimbibwa omurwe nende okhulibwa tsisoni, khulwa okhubeela obumayaanu bwenywe bwosi obwa mwakholela isie.

²³Inywe abamenya Lebanoni, inywe abamenya mumulembe mushialo shiemisiita, mulishenya mubutsunwi, obutsunwi shinga bwomukhasi oulumwa inzibula!

²⁴OMWAMI Nyasaye aboola khu Konia omusiani wa Yehoyakimu omuruchi wa Yuda ari, “Nditsuba nimboola mbu, toto mwene shinga olwa eshiliho mwoyo, kata niwakhabeele ingaka yeshibalikho yokhumukhono kwanje omusaatsa, khane ndakhakhufwalule warulakhwo,

²⁵mana ekhuhane mumakhono aka abo abakhabanga okhukhusasia. Ndakhakhuhanile mumakhono kabakhurisinjia, kata mumakhono komuruchi Nebukadineza wa Babuloni nende mumakhono aka Abakalidayo.

²⁶Ndalakhulonda otsie ehale mushialo eshicheni iwe omwene nende mamawo owakhwibula. Mulaba abasumba mushialo eshio eshia inywe mwesi mulebulilwamwo ta, ne khandi mulifwiila ebweneyo.

²⁷Mulikoomba muno okhukalukha mushialo shino, nebutswa shimulichelelakhwo ta.”

²⁸OMWAMI Nyasaye areeba ari, Uno niye Konia, ouli shinga isiongo eyatiishe, eya buli omundu asukuna butswa elwanyi? Mbushiina ye omwene nende abaanabe nibasukunwa ehale, mushialo eshia balamanyilekhwo ta?

²⁹Oo eshialo, Oo eshialo Oo eshialo! Recheresie likhuwa elia OMWAMI Nyasaye.

³⁰OMWAMI Nyasaye aboola ari, “Muhandiche omundu uno okhuba shinga oubula abaana; Omundu oulanyala okhuralila mubulamubwe tawe. Okhuba abulaho womulwibulolwe ouli ralila abulaho khubo oulikhala khushifumbi shioburuchi eshia Daudi noho kata okhurukakhwo khandi mushialo shia Yuda.”