Read wanga YEREMIA 23 Bible Online

YEREMIA 23 - wanga bible

YEREMIA 23

¹Bali mushilaamo abaayi shiobuli abasishinjia nibasalaasia amakondi akomubwayilo bwanje!

²Khulweshio isie OMWAMI Nyasaye wa Isiraeli emboola khubaayi bayaanga abandu banje endi, “Inywe mwasalaasiye nimuloonda amakondi kanje nimulabalinda ta. Khulweshio siesi ndalamuhelesia eshinyasio khulwa okhubela ebikhole bienywe ebimayaanu.

³Mana ndalakhung'asia halala amakondi kanje akatong'a okhurula mushialo shiosi, eshia ndakasalasiamwo, nengakalusia mubwayilo bwako. Nako kalebulana nikenjiha.

⁴Ndalakahelesia abaayi abalakaaya obulayi, nako shikalatiilwakhwo noburi kata okhuhenda ta, ne libulaho kata elala eliakhakorekhwo,” isie OMWAMI Nyasaye emboola.

⁵OMWAMI Nyasaye aboola ari, “Tsinyanga tsitsanga olwa ndiliromboosilia Daudi omurombo okwobulunjishi, omuruchi ouliruka nobuchesi ne nakahola aka habwene nende akobulunjishi mushialo.

⁶Yuda yakhahonibwe mundalootsie naye Isiraeli yakhamenye mumulembe. Nalio eliira lie alilangwa mbu, ‘OMWAMI ouli obulunjishi bwefwe.’ ”

⁷OMWAMI aboola mbu, eshise shitsanga eshia abandu shibakhetsubekhwo ta, nibaboolanga mbu, shinga olwa OMWAMI Nyasaye aliho mumwoyo, owarusia abandu ba Isiraeli Misiri.

⁸Nebutswa bakhetsube nibaboola mbu, shinga olwa OMWAMI Nyasaye aliho mwoyo owabayiinia niyemilila Abaisiraeli okhurula mushialo shiemasaba okhurula mumahanga kandi koosi aka yali niyabasalasiliamwo mana balimenya mushialo shiabwe abeene.

⁹Oburume khubalakusi ababeeyi, omwoyo kwanje mwisie kwatiishe, amakumba kanje nako katechelanga, endi shinga omundu oumeelile, shinga omundu wa amalwa kahulile, khulwa okhubeela OMWAMI Nyasaye nende amakhuwake amatakatifu.

¹⁰Okhuba eshialo shitsulemwo obubeeyi, nashio eshialo shiikhuulanga khulwa okhubeela eshilaamo shiobubii nabwo obwayilo bwomushitsiimi buumile kararara. Abalakusi bakholanga akobumayanu, nibekhoonyela obunyali bwabwe okhukhola obushiamu.

¹¹OMWAMI aboola mbu, “Abalakusi nende abesaaliisi, boosi shibaritsanga OMWAMI Nyasaye ta, endutsi obumayaanu bwabwe kata okhuula muhekalu yanje.

¹²Tsinjila tsiabwe tsiabachendangakhwo tsiliba shinga habundu aharerere mushiilima; baleelusibwakhwo nibakwa, okhuba ndalabakhupa khushibii olwa kuula omwaka kwokhubahelesia eshinyasio.

¹³Endutsi likhuwa lieshisinyo, elia balala khubalakusi ba Samaria bakholile; balakulilanga muliira liomunyasaye Baali nibakosia abandu banje Abaisiraeli.

¹⁴Ne mubalakusi ba Yerusalemu, ndalutsi amakhuwa amabi akamakana; baheyanga khandi nibaboola akobubeeyi; batinyisinjia abo abakholanga obumayaanu; kho mbu abuleho khubo, ounyala okhulekha obumayaanu, boosi khwisie bali shinga abandu aba Sodomu. Abandu ba Yerusalemu bali shinga abandu ba Gomora”.

¹⁵Khulweshio OMWAMI Nyasaye omwene mahe aboola khubalakusi abo ari, “Ndalabahelesia indululusia balie, nimbahelesia amaatsi akobufila okhunywa, okhubeela obwinamili bwebifwanani butswaniile mushialo shiosi okhurula khubanabi ba Yerusalemu abo”.

¹⁶Kano niko aka OMWAMI Nyasaye omwene mahe aboola ari, “Shimularecheresiekhwo akabalakusi bamulakulilanga inywe ta. Bamusuubisinjia okhunaya amakhuwa akalaliho ta; bamulakulilanga kabeene bapaaranga, shikarulanga khwisie OMWAMI Nyasaye ta.

¹⁷Buli lwosi baboolelanga abo abali abakhayi abafwolanga likhuwa lianje mbu, ‘Mulahendekhwo ta! OMWAMI aboolanga mbu mulaba nomulembe! Ne khwabo abalondanga ebikhole biabwe ebimayaanu mubukhayi bwabwe mbu, shimulanyoolakho amasila koosi ta.’ ”

¹⁸Nebutswa niwiina mulala khubalakusi abo oumanyilisiye obulayi OMWAMI, khulwa okhuhulila aka OMWAMI aboola? Kata niwiina mulala khubo owareka amarwi okhurecheresia?

¹⁹Lole imbumbuyeka eya OMWAMI njieyo! Obululubwe bwishile eshimbalakusi shishile hasi bilaatishila khumirwe chia abamayaanu.

²⁰Oburima obwa OMWAMI shibulashiukhana okhulekha okhwitsa ta, okhuula olwa alaba nakholile akomwoyokwe kuchoomile okhukhola. Mulamanyilisia obulayi amakhuwa ako, munyanga tsiolunyuma.

²¹OMWAMI Nyasaye aboola ari, “Shindaarumakhwo abalakusi bano ta, nebutswa kata kario batsia; Shindaabahelesiakhwo obulakusi bwosi ta, nebutswa batsiilililangao khulakula muliira lianje.

²²Nibakharecheresiye obamanya amapaaro kanje kamukari, khane bakharumbule oburume bwanje khubandu banje, mana bakhakholile abandu banje okhulekha obulamu bwobwonooni bwa bamenyanga nende ebikhole biabwe biobumayaanu bia bakholanga.”

²³OMWAMI Nyasaye areeba ari, “Kho endi Nyasaye olwa emba nendi ahambi ninenywe, ne nendi ehale shiendi Nyasaye ta?

²⁴Omundu yakhanyala okhwibisa hamabiswi aha ndalanyala okhumulola ta? Shimumanyile mbu isie OMWAMI Nyasaye endi buli habundu, mwikulu nende khushialo ta? Isie OMWAMI Nyasaye ereeba.

²⁵Ndahuliile kabalakusi ababeeyi abo balakulanga muliira lianje nibaboola bari, ‘Endoorire, endoorire’.

²⁶Obubeeyi obwo bulatsiililila okhuula liina? Abalakusi abo balatsiililila okhuboola akobubeeyi komumioyo chiabwe okhuula liina?

²⁷Abalakusi abo bapaaranga mbu amalooro kabwe ka bafumulilananga abeene khu beene kanyala okhukhola abandu banje banzibilile, shinga butswa bakuuka babwe batsibilila khulwa okhwinamila omunyasaye Baali.

²⁸Omulakusi ouli nelilooro aboole aka liloorolie elio, ne oyo ouli noburume bwanje bwokhurumbula, arumbule oburume obwo nobwisikwa. Obulayi bwolububa khungano nishiina?

²⁹Likhuwa lianje lisamba shinga omulilo, lili shinga inyundo eyarakanga tsinyanda ebitonye.

³⁰Khulweshio, isie OMWAMI Nyasaye endobele abalakusi abebananga oburume, mana baburumbula shinga obuli oburula khwisie.

³¹Efukula khandi abalakusi abo abalakulanga amakhuwa kabwe abeene, mana baboola mbu karulanga khwisie.

³²Recheresie aka isie OMWAMI emboolanga! Isie efukula abalakusi ababoolanga amalooro kabwe ketsulamwo obubeeyi. Baboolanga amalooro ako mana bashiukhasia abandu banje nobubeeyi bwabwe nende okhwiyitsiala khwabwe. Shindabarumakho kata okhubalaka mbu batsie tawe, shibalikhwo nobukhoonyi bwosi khubandu ta. Isie OMWAMI Nyasaye emboolile.”

³³OMWAMI niyamboolela ari, “Yeremia, olaba mulala khubandu banje, noho omulakusi kata omwisaaliisi wokhureeba ari, ‘Oburume obwa OMWAMI nishiina?’ Obaboolele ori, ‘Ninywe omusiko khu OMWAMI, ne alamurusiaho.’

³⁴Ne omundu yesi khubandu banje noho omulakusi noho omwisaaliisi niyakhekhoonyela amakhuwa kano mbu, ‘Omusiko okwa OMWAMI, emba ndalabahelesia eshinyasio nende abetsinzu tsiabwe.’

³⁵Eshindu shia mukhoyele okhureebana mukhoyele okhureebana abeene khu beene muri, ‘OMWAMI Nyasaye aboolilekhwo shiina?’

³⁶Nebutswa likhuwa mbu, omusiko okwa OMWAMI Nyasaye, mulalirumbulekhwo ta. Elia omundu aboola nomusiko khuye mwene. Abandu bashiaminjia amakhuwa aka OMWAMI Nyasaye ouliho mwoyo, OMWAMI Nyasaye omwene mahe, Nyasaye wabwe.

³⁷Khulweshio mulareeba omulakusi mbu, OMWAMI akalusiyekhwo arie, kata OMWAMI aboolilekhwo shiina?

³⁸Ne nibakhaya okhuhulila amalako kanje mana nibarumbula amakhuwa kano mbu omusiko okwa OMWAMI,

³⁹kho obaboolele mbu isie nditsa okhubayuula nebasukuma ehale, abo abeene nende amatookho kabwe aka ndabahelesia nende bakuuka babwe.

⁴⁰Ne ndalareera khwinywe okhuchaywa khulahwaho ta, eshifibwa murwe eshikhongo eshilanyala okhwibililwa ta.”