Read wanga YEREMIA 24 Bible Online

YEREMIA 24 - wanga bible

YEREMIA 24

¹Olunyuma lwomuruchi Nebukadineza okhuyila mubuhambe Babuloni Yehoyakini omusiani wa Yehoyakimu, abemilisibe, ababaatsi bobusitsa nende abeeraanyi okhurula Yerusalemu, OMWAMI Nyasaye yandolesilia lilolelo lino; ndalola ebimwelo bibili biamakhuyu nibirerwe hasi imbeli wa Ihekalu.

²Eshimwelo shilala shialimwo amakhuyu amalayi muno, shinga amakhuyu karanjililanga okhwenga; nashio eshimwelo shindi shialimwo amakhuyu amabi muno, amabi muno akalanyala okhulibwa ta, shichila kali nikabiyiile elala.

³OMWAMI niyareeba ari, “Yeremia, olutsikhwo shiina? Nasi nengalusia mbu, amakhuyu; amakhuyu akali amalayi, namalayi kamakana, nebutswa akali amabi nako namabii muno akalanyala okhulibwa ta.”

⁴Mana OMWAMI niyamboolela mbu

⁵Isie OMWAMI, Nyasaye wa Isiraeli, endolanga mbu abandu ba Yuda aba ndayinia habundu hano nebayila mubuhambe Babiloni mushialo shia aba Kalidayo bali shinga amakhuyu amalayi kano.

⁶Nditsa okhubalindanga buli lwosi mana ebakalusie mushialo shino. Ndalabombakha nindilabasasula ta. Ndalabaraka shindalabasiuula ta.

⁷Ndalabanyalila okhuumanya isie mbu nisie OMWAMI Nyasaye, nabo balaba abandu banje, nasi ndalaba Nyasaye wabwe, okhuba balangalushila nende omwoyo kwabwe kwosi.

⁸“Nebutswa OMWAMI aboola mbu, Amakhuyu amabi muno niko omuruchi Zedekia wa Yuda, abemilisibe, abandu boosi abatong'a mu Yerusalemu nende abo abamenyanga Misiri. Ndalabakhola shinga amakhuyu amabi, amabolo muno akalanyala okhulibwa ta.

⁹Ndalabareerera amasila amatinyu mbu amahanga kandi koosi kalatechela. Abandu bakhabatseshelele nibabayinya, nibabahalabila nende okhwikhoonyela ameera kabwe okhuba shinga eshilaamo buli habundu aha ebasalasia.

¹⁰Ndalabareerera lihe, inzala nende olumbe, okhuula olwa boosi balaba nibasishiibwe okhurula mushialo shia ndabahelesia bo nende abakuuka babwe”.