Read wanga YEREMIA 25 Bible Online

YEREMIA 25 - wanga bible

YEREMIA 25

¹Mumuyika kwa khane kwomuburuchi bwa Yehoyakimu omusiani wa Yosia narukanga Yuda, OMWAMI Nyasaye yamboolela isie Yeremia amakhuwa kano okhulondana nabandu boosi aba Yuda. Omuyika okwo kwali okweimbeli kwobaruchi bwa Nebukadineza omuruchi wa Babuloni.

²Mana nasi nemboolela abandu amakhuwa ako boosi aba Yuda nende abo abamenyanga mu Yerusalemu;

³mbu khulwa oluhoono lwemiyika makhumi kabili nende chitaru olwa Yosia omusiani wa Amoni yali nali omuruchi wa Yuda, okhuula inyanga yino, OMWAMI aboolanga ninasi ne nasi emuboolelanga inywe buli lwosi; Nebutswa inywe shimurecheresinjia ta.

⁴Kata olwa OMWAMI Nyasaye akalushilanga okhuula akhandi akhanji okhurumila inywe abakhalabanibe nibo abalakusi, shimurecheresinjia kata okhureka eshirwi muhulile ta.

⁵Abalakusi abo bamuboolelanga mbu, bulano mwikalukhasie, buli mulala okhulekha obulamu bwenywe obumayaanu nende ebikhole bienywe ebimayaanu, mana mumenye mushialo eshia OMWAMI Nyasaye yamuhelesia inywe nende abakuuka benywe, okhurula khale okhuula inziayo.

⁶Mulalondekhwo khabanyasaye bandi, nimubakhalabanila nende okhubenamila ta, mulaasinyisiekhwo nabanyasaye aba amakhono kenywe kakaasia ta; mana isie shindalamuhelesia eshinyasio ta.

⁷Nebutswa OMWAMI Nyasaye aboola mbu, mwakhaya okhumurecheresia; mana nimumusinyisia khulwa abanyasaye benywe ne mwireerera abeene eshinyasio.

⁸“OMWAMI Nyasaye omwene mahe aboola mbu, kho bulano khulwa okhubela mbu shimuurecheresinjia ta,

⁹ndalalanga amahanga koosi akemasaba halala nende omukhalabani wanje Nebukadineza, omuruchi wa Babuloni. Ndalabareera okhulwana Yuda nende abamenyilemwo nende amahanga kandi koosi akamenyile hambi ninalio. Ndalalisasia nende akandi koosi akamenyile hambi ninalio; nende okhukalekha nikakwile amachichini inziayo, nikali habundu aha amarisia nende okhuhuka.

¹⁰Khandi ndalarusia mubo omwoyo kwokhwikhoya, nende obutsaatsahafu, omwoyo kwomwikhoyo okwa mwene eshiselelo nende omwoyo kwomweha, obuyoka bwokhuuma shinga kwoluchina nende bwobulafu obweitaha.

¹¹Eshialo shino shiosi shilaba likunda khandi shilatong'a eshikhaya, nako amahanga akali hambi khushio kalakhalabanila omuruchi wa Babuloni khulwemiyika amakhumi musafu.

¹²Nebutswa olunyuma olwa emiyika echio musafu okhuhwa, ndalahelesia eshinyasio omuruchi owa Babuloni nende lihanga elio eshinyasio. Ndalasishia lihanga lia Abakalidayo elo khulwa okhubela obumayaanu bwabwe khandi ndalalikhola okhutong'a likuunda inziayo.

¹³Nditsa okhureerela lihanga lino amatinyu koosi aka ndalaka khulio, niko amakhuwa akahandikwa mushitabu shino akomulakusi Yeremia yarumbula khumahanga koosi.

¹⁴Amahanga amanji nende abaruchi bamaani balikhola Abababuloni okhuba abasumba babwe; shinga butswa Abababuloni bakholanga abandu banje okhuba abasumba babwe. Ndalahelesia Abababuloni eshinyasio okhulondana neshinyasio shia bahelesinjia abandu banje”.

¹⁵OMWAMI Nyasaye wa Isiraeli niyamboolela ari, “Bukula okhurula mumukhono kwanje eshikombe shino eshitsulemwo idivai yoburuma bwanje, mana onywesie abamahanga koosi akekhurumangamwo.

¹⁶Ne olwa banywa, balameela nibayingoya khulwa okhubela lihe lia ndalaruma hakari wabwe”.

¹⁷Mana ndabukula eshikombe tsana eshio okhurula mumukhono kwa OMWAMI Nyasaye, ne nenyweesia amahanga ako koosi aka yali niyarumilekhwo.

¹⁸Abaranjilila nabelitookho lia Yerusalemu nende abamatookho koosi ka Yuda, halala nende abaruchi bako nende abemilisi bako boosi banywesibwa mushikombe eshio, kho mbu babe eshitsiimi, habundu ahamarisia nende okhuhuchisia; mbu abandu bekhoonyelenje eliira lia habundu aho okhuba elieshilaamo shiobubi shinga olwa bekhoonyelanga okhuula olwa leelo. Abalondakhwo balaba:

¹⁹Omuruchi wa Misiri, abakhalabanibe, abemilisibe, abandube boosi,

²⁰nabarende boosi abamenyanga mubo, abaruchi beshialo shia Uzi, abaruchi boosi aba Abafilisiti, Ashikeloni, Gaza, Ekironi nende abatong'a mu Ashidodi.

²¹Abandu boosi beshialo shia Edomu, Moabu, Amoni,

²²nende abaruchi boosi beshialo shia Tiro nende Sidoni, nende abaruchi abolukuku oluli injelekha weinyanza;

²³abamenyanga mwitookho lia Dedani, Tema, Buzi nende abandu boosi abetumanga emirwe lituuma.

²⁴Abaruchi boosi beshialo shia Ebwarabu, abaruchi boosi abetsimbia tsindi etsiatsookana, abamenyanga mushitsiimi;

²⁵abaruchi boosi abeshialo shia Zimuri, Elamu nende Media,

²⁶abaruchi boosi abebialo biemasaba, ebiehale nende hambi, nibalondana buli mulala khuhundi. Aboburuchi bwosi obuli khushialo boosi balanywa. Olunyuma lwa abo okhunywa, omuruchi wa Babuloni yesi anywe.

²⁷Mana olababoolela ori, “Kano niko aka OMWAMI Nyasaye omwene mahe, Nyasaye wa Isiraeli aboola, munywe, nimumeela, nimusala, nimukwa hasi nimulabukha khandi ta khulwa okhubeela lihe lia ndalareera hakari mwinywe.”

²⁸Nibakhakhaya okhubukula eshikombe eshio eshili mumukhono kwa okhunywa, nawe obaboolele mbu isie OMWAMI Nyasaye omwene mahe emboola mbu okhuula banywe!

²⁹Lola bulano nditsanga okhureera amatinyu khwitookho lianje omwene; kho mupaaranga mbu munyala okhwihonokokha eshinyasio shianje? Shimulakhaywa okhuhelesibwa eshinyasio ta, okhuba emureereranga omumululi khubandu boosi abamenyanga khushialo. Isie OMWAMI Nyasaye omwene mahe emboola.

³⁰“Bulano iwe Yeremia orumbule amakhuwa kano khubo: ‘OMWAMI Nyasaye alahoola okhurula ikulu mwikulu, omwoyokwe kulatulukha okhurula ewa ali mushimenyoshie eshitakatifu; Alahoola namaani koosi khubandube, alachinga olukhu shinga omundu ouswala tsinzabibu ne buli mundu khushialo alamuhulila.

³¹Ne obuyoka obwo bulahulilikha buli habundu khushialo, okhuba OMWAMI Nyasaye ali nobuyaasi khumahanga, alakhalachila abandu eshiina boosi, nabo abamayaanu baleerwa nolukanga! Isie OMWAMI Nyasaye emboola.”’

³²OMWAMI Nyasaye omwene mahe aboola ari, “Lola amasila kaletsa khubuli lihanga nikalosiakhwo elindi, imbumbuyeka nayo ilabuukha niyihutsa okhurula khundulo khwosi khweshialo.”

³³Khunyanga eyo aba OMWAMI Nyasaye aleera, emilambo chiabwe chilasaalana okhurula elubeka lulala okhuula khulubeka lundi lweshialo. Abandu abo shibalekhulwakho ta, emilambo chiabwe shichilakhuunjelesibwakhwo ta, kata khandi shichilayabilwa ta, chilatong'a okhuba imbolela khwiloba.

³⁴Inywe abaayi mwikhuule, lile nimukalakala mwikoshe inywe abemilisi ababandu, tsinyanga tsiokhusinzwa nende okhusalasibwa khwenywe tsiulile; Mulasinzwa shinga amamiiku amahule.

³⁵Abaayi shibalabakhwo nende habundu ahokhwilushila ta, kata abemilisi ba abandu shibalabakhwo nahabundu aha okhwilushila okhwihonokokha ta.

³⁶Recheresie okhulila kwabaayi, nende okhwayula kwabemilisi ba abandu! OMWAMI Nyasaye asasinjia obwayilo bwabwe,

³⁷nabo abandu ababelenje nibehotselesiiye banyasibwe khulwa okhubeela liruma lilulu elia OMWAMI Nyasaye.

³⁸OMWAMI Nyasaye aleshile abandube, shinga olwa italanyi yilekhanga imbangatsi yayo; eshialo shiabwe shiosi shikwile eshitsiimi eshikhaya, khulwa okhuubela lihe liababasandinjia, nende oburuma obwa OMWAMI Nyasaye.