Read wanga YEREMIA 26 Bible Online

YEREMIA 26 - wanga bible

YEREMIA 26

¹Mukhuchaka khwomuburuchi bwa Yehoyakimu omusiani wa Yosia mushialo shia Yuda, OMWAMI Nyasaye yaboolela Yeremia mbu,

²Isie OMWAMI Nyasaye emboola endi, “Sinjila mulwanyi lweinzu yanje isie OMWAMI Nyasaye. Oboolele abandu bamatookho koosi ka Yuda abetsanga hano okhwinamila munzu eya OMWAMI Nyasaye, amakhuwa koosi aka ndakhulachilisia. Obaboolile buli shindu, nolalekhakhwo likhuwa liosi ta.

³Haundi bakhanyala okhuhulila, mana buli mulala niyekalukhasia okhurula khunjila imbii, kho nasi endeshe okhureera obusasishi bwerecheeshe okhubareerera khulwa ebikhole biabwe ebimayaanu.”

⁴Obaboolele kano mbu, OMWAMI Nyasaye aboola ari, “Nimulambulila nimulonda amalako kanje ka ndamureraho ta,

⁵khandi nimulahulila amakhuwa kabakhalabani banje abalakusi baboolanga aba emurumilanga buli eshise ta, ne kata kario nimwamala okhukhaya okhubarecheresia,

⁶kho ndalasasia Ihekalu yino shinga olwa ndasasia eyali Shiilo, ne ndalakhola litookho lino libe elieshilaamo shiobubi khumahanga koosi akeshialo”.

⁷Abesaaliisi, abalakusi nende abandu boosi nibahulila omulakusi Yeremia naboolanga amakhuwa ako muhekalu eya OMWAMI.

⁸Nebutswa bwangu bwene olwa Yeremia yamala okhuboolela abandu boosi amakhuwa koosi aka OMWAMI yali namulachilisiye okhuboola; abesaaliisi, abalakusi nende abandu boosi bamutiila nibamuboolela bari, “Okhuula ofwe!

⁹Nishiina eshichilile nolakula muliira elia OMWAMI mbu Ihekalu yino yilasasibwa shinga eyali Shiilo, ne khandi litookho lino liakhatonye likunda khandi eshitsiimi?” Mana abandu boosi nibekhung'aasia khu Yeremia muhekalu eya OMWAMI.

¹⁰Olwa abemilisi ba Yuda bahulilakho amakhuwa ako, batikulukha barula munzu yoburuchi nibatikulukha nibatsia okhuula muhekalu eya OMWAMI, mana nibekhala habwinjililo weshilibwa eshiyia eshia Ihekalu eyo.

¹¹Mana abesaaliisi nende abalakusi nibaboolela abemilisi tsana abo nende abandu boosi mbu, omundu uno okhuula yeerwe khulwa okhubeela alakuule nafukula litookho lino. Mukahulile namarwi kenywe abeene!

¹²Mana Yeremia naboolela abemilisi abo boosi nende abandu boosi ari, “OMWAMI yarumile okhulakula nefukula Ihekalu yino nende litookho lino khulwa amakhuwa koosi aka muhuliile.

¹³Khulweshio bulano mwikalukhasie okhulekha tsinjila nende ebikhole bienywe ebimayaanu, mana muhulile aka OMWAMI Nyasaye wenywe aboola. OMWAMI aba aleekalukhasia nalekha okhureera khwinywe amasila kalachile okhumurelera.

¹⁴Isie nasi endi mumakhono kenywe, mukhole liosi elia mulola mbu nelilayi khandi likwanile

¹⁵Nebutswa toto bwene mumanye mbu nimunzira, mulaba nimwirerere abeene eshilaamo shiobubi, khulwa okhuratsia eshitsayi eshibula eshikha; ne mulareerera litookho lino nende abandu boosi abamenyanga mulio eshiilamo shiobubi. Kali toto mbu OMWAMI Nyasaye yaruma okhumuboolela inywe amakhuwa kano mukahulile”.

¹⁶Mana abemilisi abo nende abandu boosi nibaboolela abesaaliisi nende abalakusi abo bari, “Omundu uno aleerwa ta! Aboolile ninefwe muliira elia OMWAMI Nyasaye wefwe”.

¹⁷Mana balala khubakhulundu beshialo eshio nibasinjila nibaboolela abandu abali nibakhung'anileho boosi bari,

¹⁸“Olwa Hezekia yali omuruchi wa Yuda, omulakusi Mika okhurula Moreshetsi yaboolela abandu mbu OMWAMI Nyasaye omwene mahe aboolile ari, ‘Litookho lia Zayuni lilasinyakwa shinga omukunda, Yerusalemu lilakwa amanjichini, nashio eshikulu shia Ihekalu shilakwa omutsuru.’ ”

¹⁹Omuruchi Hezekia nende abandu ba Yuda shibeera omulakusi Mika ta. Nebutswa omuruchi Hezekia yaria Nyasaye mana nasaba OMWAMI okhumubeela tsimbabasi. Mana OMWAMI nakalukhasia amapaaroke nalekha okhureera amasila ka yali nalachile okhubareerela. Bulano khuli hambi okhwireerera abeene amasila amatinyu kamakana.

²⁰(Yaliho omusaatsa undi mbu Uria, omusiani wa Shemayia okhurula Kiriatsi Yearimu, owalakula muliira elia OMWAMI Nyasaye nafukulanga litookho lino nende lihanga shinga olwa Yeremia yakhola.

²¹Olwa omuruchi Yehoyakimu, abelihebe nende abemilisibe bahulila aka Uria yali naboolile, omuruchi yateema mbu amwiire. Nebutswa Uria yahulila, mana niyelukha khulwa okhuria, natsia Misiri.

²²Mana omuruchi Yehoyakimu, naruma Elinatsani omusiani wa Akibori nende abandu bandi Misiri khulwa okhwenda Uria.

²³Bamureera khumuruchi Yehoyakimu owamala namwiira mana omubilikwe nikusukunwa habulafu mubilindwa ebiabandu boosi.)

²⁴Nebutswa Ahikamu omwana wa Shefani yatereranga omulakusi Yeremia kho mbu abandu bakhaywe okhumutiila mana bamwiire.