Read wanga YEREMIA 27 Bible Online

YEREMIA 27 - wanga bible

YEREMIA 27

¹Olunyuma lwa Zedekia omusiani wa Yosia okhwemekhwa okhuba omuruchi wa Yuda, likhuwa lino lietsela Yeremia okhurula khu OMWAMI Nyasaye niliboola mbu,

²kano niko aka OMWAMI Nyasaye yamboolela mbu, “Okasie lichoki mana olibohe obutinyu khwikosilio nebitorofu.

³Mana orume likhuwa khu baruchi ba Edomu, Moabu, Amoni, Tiro nende Sidoni okhubirira khu abarume babwe abali nibetsile Yerusalemu okhulola omuruchi Zedekia.

⁴Obalachilisie baboolele abaruchi babwe mbu, OMWAMI Nyasaye omwene mahe, Nyasaye wa Isiraeli aboola mbu,

⁵Khulwa obunyali bwanje obukhongo nende amaani kanje ndalonga eshialo, abandu nende tsisolo tsiosi etsili khushialo, nasi eshihaananga khumundu yesi owa endola mbu akwanile okhuhebwa.

⁶Emalile okhukhola ebialo bienywe biosi okhuba hasi womukhalabani wanje womuruchi Nebukadineza wa Babuloni, ekholile kata tsisolo nabulimo okhumukhalabanila.

⁷Amahanga koosi kalamukhalabanila, kalakhalabanila omwanawe omusiani nende eshisonishie okhuula olwa eshise shiula eshia lihangalie lihulwa. Ne nilwo olwa amahanga amanji nende abaruchi abanji balimukhola okhuba omusumba wabwe.

⁸Nebutswa oburuchi bwosi noho lihanga liosi eliloba okhuba hasi woburuchi bwa Nebukadineza, ndalalimulula okhubirira mwihe, inzala nende olumbe okhuula lwomuruchi Nebukadineza alimulula liosi pe, isie OMWAMI Nyasaye amalile okhuboola ako.

⁹Kho shimularecheresie akabalakusi benywe noho abafumu, noho abamalooro noho abalosi bamuboolela ta. Bamuboolelanga bari, ‘Mulamukhalabanile omuruchi owa Babuloni ta.’

¹⁰Bamukatinjia ne balachila murusibwe mushialo shienywe, ndalamuloonda mutsie ehale ewa mulafwila.

¹¹Nebutswa lihanga liosi liosi elifuchilila okhuba hasi womuruchi wa Babuloni nende okhumukhalabanila, ndalalilekha litsiililile okhuba mushialo shialio, lishilime nende okhumenyamwo, isie OMWAMI Nyasaye emboola endio.”

¹²Isie Yeremia ndali nemalile okhuboolela omuruchi Zedekia wa Yuda amakhuwa malala ako. Ndamuboolela endi, “Ofuchilile okhuba hasi womuruchi wa Babuloni, omukhalabanile ye halala nabandube mana obeho mwoyo.

¹³Eshichila iwe nende abandubo mufwe okhubirira mwihe noho inzala noho olumbe nishiina? Okhuba ako niko aka OMWAMI Nyasaye amalile okhurumbula khwihanga liosi liosi elikhaya okhuba hasi wa Babuloni.

¹⁴Shiolarecheresiakhwo amakhuwa kabalakusibo baboolanga mbu, ‘Shiolakhalabanila omuruchi wa Babuloni ta,’ ta, Nebutswa bakhulakulilanga akobubeeyi.”

¹⁵OMWAMI Nyasaye omwene aboola ari, “Shiyabarumakhwo ta, kho bakhubeyanga muliiralie. Khulweshio alakhuloonda okhurula mushialoshio oleerwa halala nende abalakusi abakhubeyanga abo.”

¹⁶Mana nemboolela abesaaliisi nende abandu boosi endi, “OMWAMI Nyasaye aboola ari, mularecheresie amakhuwa akabalakusi benywe bamuboolelanga mbu ebimanulwa bia Ihekalu bili ahambi okhukalusibwa okhurula Babuloni tawe. Bamuboolelanga butswa obubeeyi.

¹⁷Mulabarecheresie ta. Mufuchilile okhuba hasi womuruchi wa Babuloni mana mulabaho mwoyo. Eshiakhachila litookho lino likwe likunda nishiina?

¹⁸Nibaba nibali toto abalakusi khandi nibali noburume okhurula khu OMWAMI Nyasaye, kho leshe bareebe OMWAMI Nyasaye omwene mahe mbu ebimanulwa biasikala muhekalu nende munzu yoburuchi, yomuruchi wa Yuda, nende ebili Yerusalemu bileshe okhuyilwa Babuloni.

¹⁹Okhuba kano niko aka OMWAMI Nyasaye omwene mahe aboola okhulondana nende tsisiilo, ebichibi, amatanji kamaatsi nende ebimanulwa biosi ebiasikala mwitookho lino,

²⁰ebia omuruchi Nebukadineza wa Babuloni yalekhamwo olwa yabukula Yehoyakini omusiani wa Yehoyakimu omuruchi wa Yuda nende abakhulundu boosi aba Yuda nende Yerusalemu nabayila mubuhambe Babuloni.

²¹OMWAMI Nyasaye omwene mahe, Nyasaye wa Isiraeli aboola okhuloondana khubimanulwa biasikala muhekalu nende munzu yomuruchi wa Yuda nende mwitookho lia Yerusalemu mbu,

²²biosi bilabukulwa nibiyilwa Babuloni, ne bilabayo okhuula khunyanga yomwene ndilibipaarakhwo okhubikalusia Yerusalemu. Isie OMWAMI Nyasaye emalile okhuboola.”